މަޝްހޫރު ޑައިރެކްޓަރ އަދި ޕްރޮޑިއުސަރ ކަރަން ޖޯހަރް ހުށައަޅައިދޭ ޝޯ "ކޮފީ ވިތު ކަރަން"ގެ 7 ވަނަ ސީޒަން ޖޫން މަހުގެ ތެރޭގައި ގެނެސްދޭން ފަށާނެ ކަމަށް ރިޕޯޓްތައް ބުނެފިއެވެ.
"ކޮފީ ވިތު ކަރަން" އަކީ ބޮލީވުޑްގެ އެންމެ މަޝްހޫރު ތަރިންނަށް ފުރުސަތުލިބޭ ޓޯކް ޝޯ އެކެވެ. މިއީ 2004 ގައި ގެނެސްދޭން ފެށި ޝޯއެކެވެ. މިހާތަނަށް 6 ސީޒަނެއް ގެނެސްދިން އިރު އެންމެ ފަހު ސީޒަން ގެނެސްދިނީ 2019 ގައި އެވެ.
ކޯވިޑް-19ގެ ސަބަބުން މި ޝޯ މެދުކެނޑުމަށް ފަހު އަނެއްކާވެސް ޝޯ ފަށާއިރު މި ސީޒަންގައި ވެސް ފުރުސަތު ލިބޭނެ ކަމަށް ބެލެވެނީ ކަރަންއާ އެންމެ ގާތް ތަރިންނަށް ކަމަށް ވެއެވެ.
ޝޯގެ އެންމެ ފަހުގެ ތައްޔާރީތައް ވަމުން އަންނަ އިރު ކަރަން މިހާރު އަންނަނީ "ރޮކީ އޯރް ރާނީ ކީ ޕްރޭމް ކަހާނީ" ޑައިރެކްޓް ކުރަމުންނެވެ. ދުވަސްތަކަކަށް ފަހު ޑައިރެކްޓަރުގެ ގޮނޑި ހޫނުކުރަމުން ކަރަން އަންނަ އިރު މި ފިލްމުން ފެނިގެން ދާނީ ކަރަންގެ އެންމެ ފޭވަރިޓް ތަރިން ކަމަށްވާ އާލިއާ ބަޓާއި ރަންވީރު ސިންގްއެވެ.
މި ފިލްމްގެ ޝޫޓިންގ ނިންމާލުމަށްފަހު ކަރަން، ޝޯގެ ރެކޯޑިން ފަށައި، ޖޫން މަހުގެ ތެރޭގައި ސްޓާ ވޯލްޑުން ޝޯ ގެނެސްދޭން ފަށާނެއެވެ.
