އިދިކޮޅު ޕީޕީއެމްގެ 5،000 މެމްބަރުން އެހެން ޕާޓީތަކަށް ވަގަށް ގެންގޮސްފައިވާކަމަށާއި، މިކަން ބަލައި ފިޔަވަޅު އެޅުމަށް ޕީޕީއެމްއިން އިލެކްޝަންސް ކޮމިޝަންގައި އެދިއްޖެއެވެ.
އިލެކްޝަން ކޮމިޝަންގައި މިކަމަށް އެދިފައިވާކަން ހާމަކޮށް ޕީޕީއެމްގެ ސެކެޓްރީ ޖެނެރަލް މުހައްމަދު ތޮލާލް ވިދާޅުވީ މިދިޔަ އަހަރުގެ އޮކްޓޯބަރު މަހުން ފެށިގެން މިހާތަނަށް ޕީޕީއެމްގެ 5،000 އަށްވުރެ ގިނަ މެމްބަރުން އެހެން ޕާޓީތަކަށް ވަގަށް ގެނެސްގޮސްފައިވާކަމަށެވެ.
މިމައްސަލަ އަކީ އިލެކްޝަންސް ކޮމިޝަނުން ސީރިއަސް މައްސަލައެއްގެ ގޮތުގައި ޕީޕީއެމްއިން ވަގަށް ގެންދިޔަ މެމްބަރުން އަލުން ޕީޕީއެމްއަށް ލިބޭނެ ގޮތެއް ހަމަޖައްސައި ދިނުމަށް ތޮލާލް ވަނީ އެދިފައެވެ. އަދި މިކަން ކުރި ސިޔާސީ ޕާޓީތަކާއިމެދު އިލެކްޝަންސް ކޮމިޝަނުން އަޅަންޖެހޭ ފިޔަވަޅު އެޅުމަށްވެސް ތޮލާލްވަނީ ގޮވާލާފައެވެ.
2021 ވަނަ އަހަރުގެ އޮކްޓޯބަރު މަހުން ފެށިގެން ޕީޕީއެމްގެ 5،000 އަށްވުރެ ގިނަ މެމްބަރުން ވަނީ އެހެން ޕާޓީތަކަށް ވަގަށް ގެންގޮސްފަ. މިމައްސަލަ އިލެކްޝަންސް ކޮމިޝަނުން ބައްލަވައި އެކަން ކުރި ޕާޓީތައް ޖޫރިމަނާކޮށް ފިޔަވަޅު އަޅާ އަދި އެ މެމްބަރުން ޕީޕީއެމްއަށް އަލުން ވައްދަންޖެހޭ.
– ތޮލާލް ވިދާޅުވިއެވެ.
2021 Oct. in feshigen @ProgressPartyMV ge 5k varu members vanee ehen party thakah vagah gengossa. Mi massala @ElectionsMv in bahlavaa ekan kuri party thah jurimana koh fiyavalhu alhaa adhi e members PPM ah alun vahdhan jehey @cnm_mv @Mihaarunews @avasmv @sunbrk @vaavu @Raajje_tv pic.twitter.com/a6h9cFlsAk
— Mohamed Tholal (@Tholal) April 15, 2022
އިލެކްޝަން ކޮމިޝަންގެ ދަފްތަރު ދައްކާ ގޮތުން މިވަގުތު ޕީޕީއެމްގައި ތިބީ 34،237 މެމްބަރުންނެވެ. ސިޔާސީ ޕާޓީތަކުގެ މެންބަރަކަށް ވުމަށްޓަކައި ސައްޙަ ނޫން ފޯމު ހުށައެޅުމުގެ މައްސަލަ ހައްލުކުރުމަށް، ސިޔާސީ ޕާޓީތަކުން އިލެކްޝަންސް ކޮމިޝަނަށް ހުށަހަޅާ ފޯމުތައް ވަކި މުއްދަތަކަށް އާންމު ކުރުމަށް އިލެކްޝަންސް ކޮމިޝަނުން ވަނީ ނިންމާފައެވެ.
ސިޔާސީ ޕާޓީތަކަށް މީހުން ވެއްދުމުގައި ސައްޙަ ނޫން ފޯމު ހުށައެޅުމުގެ މައްސަލައަކީ ބޮޑު މައްސަލައަކަށް ވީނަމަވެސް މިކަން ހުއްޓުވޭނެ ހަރުދަނާ ނިޒާމެއް މިހާތަނަށް ރާއްޖޭގައި ޤާއިމްކުރެވިފައެއް ނުވެއެވެ. މިކަމަށް ހައްލެއް ހޯދުމަށް އިލެކްޝަންސް ކޮމިޝަނުން ވަނީ އެކޮމިޝަނަށް ހުށަހަޅާ ފޯމުތައް އާންމު ކުރުމަށް ނިންމާފައެވެ. ސިޔާސީ ޕާޓީތަކުންނާއި، އާންމު ފަރާތްތަކުން ހުށަހަޅާ ފޯމުތައް އިލެކްޝަންސް ކޮމިޝަނުން ބެލުމަށްފަހު 7 ދުވަހުގެ މުއްދަތަކަށް އިލެކްޝަންސްގެ ދަފްތަރުގައި ހުށަހަޅާ ފޯމުތަކުގައި ހިމެނޭ މީހުންގެ މައުލޫމާތު އާންމު ކުރުމަށް ވަނީ ނިންމާފައެވެ.
