ބީއެމްއެލް ކޭޝް އެޖެންޓުން މެދުވެރިކޮށް މިހާރު ހިލޭ ފައިސާ ނެގޭނެ

ގައުމީ ބެންކުގެ ކޭޝް އެޖެންޓުން މެދުވެރިކޮށް ހިލޭ ފައިސާ ނެގޭ ގޮތް ހަމަޖައްސައިފިއެވެ.

މި ބަދަލާއެކު ބީއެމްއެލްގެ ޑެބިޓް ކާޑު ބޭނުންކޮށްގެން ކޭޝް އެޖެންޓުން މެދުވެރިކޮށް ދުވާލަކު 2000 ރުފިޔާ ނަގާއިރު ފީ ގެގޮތުގައި ކުރިން ނަގަމުން އައި 10 ރުފިޔާ ނުނަގާނެކަމަށް ގައުމީ ބެންކުން ބުނެއެވެ. ބީއެމްއެލުން ބުނީ އެކައުންޓުން ފައިސާ ނެގުމުގެ އިތުރަށް މިވަގުތު 40 ކޭޝް އެޖެންޓުން މެދުވެރިކޮށް ފައިސާ ޖަމާކުރުމާއި، ކްރެޑިޓް ކާޑާއި ލޯނަށް ފައިސާ ދެއްކުމުގެ ހިދުމަތްވެސް ލިބޭނެއެވެ.

މުޅި ރާއްޖެއަށް ބެންކިންގ ހިދުމަތް ފުޅާކުރުމަށްޓަކައި ބެންކުން ކޭޝް އެޖެންޓުންގެ ހިދުމަތް ތައާރަފް ކޮށްފައިވަނީ 2014 ވަނަ އަހަރުއެވެ. މިއީ ބެންކުގެ ބްރާންޗެއް ނުވަތަ އޭޓީއެމެއް ނެތް ރަށްރަށުގައި އަސާސީ ބެންކިންގ ހިދުމަތް ދިނުމަށް ތައާރަފްކުރި ހިދުމަތެކެވެ.

މިއަދާ ހަމަޔަށް 200 އަށްވުރެ ގިނަ ކޭޝް އޭޖެންޓުން މެދުވެރިކޮށް އަތޮޅުތެރޭގައި ފައިސާ ނެގުމުގެ ހިދުމަތް ބީއެމްއެލުން ދަނީ ފޯރޮކޮށްދެމުންނެވެ. އަދި 40 އެޖެންޓުން މެދުވެރިކޮށް އެއްވެސް ފީއަކާ ނުލައި ފައިސާ ޖަމާކުރުމުގެ އިތުރުން ފައިސާ ދެއްކުމުގެ ހިދުމަތްވެސް ލިބޭނެ ކަމަށް ގައުމީ ބެންކުން މައުލޫމާތުދެއެވެ.