ފާއިތުވެދިޔަ ހަފްތާގައި، ދުނިޔެއިން ކޯވިޑް 19ގައި މަރުވެފައިވާ މީހުންގެ އަދަދު %40 އިތުރުވެގެން ގޮސްފައިވާކަން ދުނިޔޭގެ ސިއްޙަތު ޖަމިއްޔާއިން ހާމަކޮށްފިއެވެ.
އެހެންނަމަސް ސިއްޙަތު ޖަމިއްޔާ WHO އިން ބުނެފައިވާ ގޮތުގައި، ކޯވިޑް19ގައި މަރުވީ މީހުންގެ އަދަދު ފާއިތުވެދިޔަ ހަފްތާގައި ކުއްލިއަކަށް އިތުރު ވެގެން ގޮސްފައިވާ ސަބަބެއް ކަމުގައި ބެލެވިފައިވަނީ، އެމެރކިކާގައި މިބަލީގައި މަރުވާ މީހުންގެ އަދަދު ރިޕޯޓުކުރުމުގައި ގެނެސްފައިވާ ބަދަލުތަކުން ސަބަބުންނާއި، އަދި އިންޑިއައިން މަރުވެފައިވާ މީހުންގެ އަދަދު އަޕްޑޭޓު ކުރުމެވެ.
ދުނިޔޭގެ ސިއްޙަތު ޖަމިއްޔާއިން އެންމެ ފަހުން އާންމުކޮށްފައިވާ، ހަފްތާގެ ރިޕޯޓުގައި ބުނެފައިވާގޮތުން، ދުނިޔޭ ހުރިހާ ކަންކޮޅުތަކެއްގައިވެސް، މިބައްޔަށް ޕޮޒިޓިވް ވަމުންދާ މީހުންގެ ނިސްބަތްވަނީ ދަށަށް ގޮސްފައެވެ. މީގެ ތެރޭގައި، ފާއިތުވި ޑިސެމްބަރުމަހުން ފެށިގެން ކޯވިޑަށް ޕޮޒިޓިވް ވަމުންދާ މީހުންގެ ނިސްބަތް މަތިވަމުންއައި ހުޅަނގު ޕެސިފިކް ސަރައްހައްދުވެސް ހިމެނޭކަމަށް ބުނެފައި ވެއެވެ.
ސިއްޙަތު ޖަމިއްޔާއިން އާންމު ކޮށްފައިވާ މައުލޫމާތުގައި ވާގޮތުން ފާއިތުވެދިޔަ ހަފްތާގައި ދުނިޔެއިންވަނީ 10 މިލިއަން މީހުން ކޯވިޑަށް ޕޮޒިޓިވް ވެފައެވެ. އަދި 45،000 މީހުންވަނީ ފާއިތުވެދިޔަ ހަފްތާގައި މި ބަލީގައި މަރުވެފައެވެ. ކޯވިޑް ބަލީގައި މަރުވި މީހުންގެ އަދަދު ފާއިތުވެދިޔަ ހަފްތާގައި އާދަޔާ ޚިލާފަށް މަތިވެގެން ގޮސްފައިމިވަނީ، އޭގެ ކުރީ ހަފްތާގައި މި ނިސްބަތް %23 އިން ދަށަށް ގޮސްފައި ވަނިކޮށެވެ.
ކޯވިޑްގެ ހާލަތު މުޅި ދުނިޔޭގައިވެސް ރަގަޅުވަމުން އައުމާއި ގުޅިގެން، މި ބައްޔާއި ދެކޮޅަށް އަޅާފައިވާ ފިޔަވަޅުތައް ދުނިޔޭގެ ގިނަ ގައުމުތަކުން މިހާރުވަނީ އުފާލާފައެވެ. ގިނަ ގައުމުތަކުން ފިޔަވަޅުތައް އުވާލާފައިވަނީ، އެ ގައުމުތަކުގެ އާބާދީގެ ބޮޑު ބަޔަކަށް ވެކްސިންގެ 2 ޑޯޒް ދީ ނިމިފައި ވާތީއެވެ.
އެހެންނަމަވެސް، ދުނިޔޭގެ ސިއްޙަތު ޖަމިއްޔާ WHO ބުނެފައިވަނީ، ކޯވިޑް ބައްޔާއި ދޭތެރޭ އެކަށީގެންވާ ގޮތެއްގައި ފާރަވެރި ނުވެވިއްޖެނަމަ، އަލަށް އުފަންވަމުން އަންނަ ވޭރިއެންޓްތައް ދެނެގަތުމުގައި ގޮންޖެހުންތަކާއި ކުރިމަތި ލާންޖެހުމުގެ އިތުރުން، ބައްޔާއި ދެކޮޅަށް އަޅަންޖެހޭ ފިޔަވަޅުތައް އެޅުމުގައިވެސް ދަތިތަކާއި ކުރިމަތިކާން ޖެހޭނެއެވެ.
ކޮމެންޓު ފޮނުވާ