ރަޝިއާއިން ޔޫކުރެއިންއަށް އަރާ އެގައުމަށް އުދުވާނީ ހަމަލާ ދޭން ފެށިތާ މިއަދަށް އެއް މަސް ފުރިއްޖެއެވެ.

ގެއްލުން ބޮޑު މިހަނގުރާމައަށް މިއަދަށް އެއް މަސް ފުރިގެންދާއިރު، ހުޅަނގުގެ ގައުމުތަކުން ބުނަމުންދަނީ، ހަގުރާމަ ފެށުމަށްފަހު، ޔޫކުރެއިންގެ ވެރިރަށް ބާރުގެ ދަށަށް ގެނެސް، ޔޫކުރެއިގެ ސަރުކާރު ބަދަލުކުރުމަށް ރަޝިއާއިން ކަނޑައެޅި ލަނޑުދަޑިތައް ހާސިލް ނުވެ، ރަޝިއާގެ އަސްކަރިއްޔާ މިވަގުތު އޮތީ ހާސްކަމެއްގެ ތެރޭގައި ކަމުގައެވެ.

އަދި ރަޝިއާއިން ކަނޑައެޅި މުހިންމު އަސްކަރީ ލަނޑުދަޑިތައް ހާސިލްނުވެ ދިއުމުގެ ނަތިޖާއެއްގެ ގޮތުން، ރަޝިއާއިން އެއްވެސް ބެލުމެއްނެތި މިހާރު ޔޫކުރެއިންއަށް ދެމުންދާ ހަމަލާތަކާއި ގުޅިގެން، އާންމު ރައްޔިތުންނަށް ލިބެމުންދާ ގެއްލުންތައް އިންތިހާއަށް އިތުރުވެގެން ގޮސްފައިވާކަމަށްވެސް އެމެރިކާއާއި އިނގިރޭވިލާތުން ވަނީ ބުނެފައެވެ.

ހުލަނުގެ ގައުމުތަކުގެ އިންޓެލިޖެންސް މައުލޫމާތުތައް ބުނާ ގޮތުގައި ހަނގުރާމައަށް މިއަދަށް އެއްމަސް ފުރިގެން ދާއިރު، ރަޝިއާގެ އަސްކަރިއްޔާ އެންމެ ބޮޑަށް ފެއިލް ވެގެން ގޮސްފައިވަނީ، ލޮޖިސްޓިކްސްއާއި ކޮމިއުނިކޭޝަން އެކަށީގެންވާ ގޮތުގައި ނުދެމެހެއްޓިގެންނެވެ. އަދި މީގެ އިތުރުން ޔޫކުރެއިން ސިފައިންގެ ހިއްވަރާއި އެކުލުންތެރިކަންވެސް ވެގެން ދިޔައީ ރަޝިއާ ސިފައިންނަށް ކުރިމަތިވި ވަރަށް ބޮޑު ގޮންޖެހުމަކަށް ކަމުގައި މަސްރަހު ދިރާސާ ކުރާ ފަރާތްތަކުން ވަނީ ފާހަގަ ކޮށްފައެވެ.

ޔޫކުރެއިންގެ ޑިފެންސް މިނިސްޓްރީން ބުނެފައިވަނީ، އެގައުމުގެ ވެރިރަށް ކީވްގެ ވަށައިގެންވާ ބައެއް އަވަށްތައް މިހާރުވަނީ އަލުން ޔޫކުރެއިން ސިފައިންގެ ބާރުގެ ދަށަށް ވަނީ ގެނެސްވައެވެ. އަދި ހިތްވަރު އެލިފައިވާ ރަޝިއާގެ ބައެއް ސިފައިން ވަރަށް އަވަހަށް ވަށާލާނެކަމަށްވެސް ޔޫކުރެއިންގެ ޑިފެންސް މިނިސްޓްރިން ވަނީ ބުނެފައެވެ.

ރަޝިއާ ސިފައިން އަދިވެސް ދަނީ، ޔޫކުރެއިންގެ މަރިޮޕޯލް ހިފުމަށްޓަކާ އެސިޓިއަށް އަދިވެސް ހަމަލާތައް ދެމުންނެވެ. 400،000 އެއްހާ މީހުން ދިރިއުޅެމުން ދިޔަ މިސިޓީގައި މިހާރު ބާކީ ތިބީ 100،000 މީހުންކަމަށްވެސް މީޑިއާތަކުން ރިޕޯޓު ކޮށްފައިވެއެވެ. އަދި ރަޝިއާގެ އަސްކަރިއްޔާއިން މިސިޓީ ވަށާލާފައި ވުމާއި ގުޅިގެން ސިޓީގައި ތިމި މީހުން މިހާރު ކާ އެއްޗިއްސަށް ޖެހިފައިވާއިރު، މި ސިޓީގެ %90 އިމާރާތްތައް ހަލާކުވެފައިވާ ކަމަށްވެސް މީޑިއާތަކުން ދަނީ ރިޕޯޓު ކުރަމުންނެވެ.

ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނި ހަމަލާ ދޭން ފެށިފަހުން މިހާތަނަށް 121 ކުޑަކުދިން މަރުވެ 167 ކުދިންނަށް އަނިޔާވެފައި ވާކަމުގައި ޔޫކުރެއިންގެ ޕްރޮސެކިއުޓަރޖެނެރަލްގެ އޮފީހުން ވަނީ ބުނެފައެވެ.