ބޮލީވުޑް ތަރި ޖޯން އަބްރަހަމަކީ ތަފާތު އެކްޓަރެކެވެ. އޭނާ އެންމެ ފާހަގަ ކޮށްލެވެނީ މަސައްކަތަށް ބަހައްޓާ ޝައުގުވެރިކަމާއި ދޭ އަހަންމިޔަތުގެ ސަބަބުންނެވެ.
ޖޯނަކީ ކުރާކަމެއް ވަރަށް ފުރިހަމަ އަށް ކުރަން ބޭނުންވާ މީހެއް ކަމަށާއި މަސައްކަތަށް 100 ޕަސެންޓް ދިނުމަކީ އޭނާ އަބަދުވެސް އެންމެ އިސްކަމެއް ދޭކަން ކަމަށް ޖޯން ވަނީ ބުނެފައެވެ.
އަދި ދާދިފަހުން ޖޯން ވަނީ އޭނާ ފިލްމު އިންޑަސްޓްރީގައި ހޭދަކުރި މުއްދަތުގެ ތެރެއިން ފާއިތުވީ 17 ނުވަތަ 18 އަހަރުގެ ތެރޭގައި ޗުއްޓީ ނެގީ އެންމެ 3 ދުވަހަށް ކަަމަށް ބުނެ ގިނަ ބަޔަކު ހައިރާން ކޮށްލާފައެވެ.
ފިލްމު އިންޑަސްޓްރީގެ މީހުންނަކީ ވަރަށް ބިޒީ ޝެޑިއުލްގައި މަސައްކަތް ކުރާ ބައެއްކަމުން، ޗުއްޓީ ހޭދަކޮށްލުމާއި، އާއިލާއާ އެކުގައި ވަގުތު ހޭދަކުރަން ޖެހޭވަރަށް ނުކުރެވޭ އެކްޓަރުން ގިނައެވެ.
ޝިލްޕާ ޝެޓީގެ ފިޓްނަސް ޝޯގައި ވާހަކަދައްކަމުން ޖޯން ބުނެފައިވަނީ އެއީ ވަރަށް ނަސީބު ދެރަ ކަމެއް ކަމަށެވެ. އަދި އެއީ ރަނގަޅު ކަމެއް ކަމުގައި ނުދެކޭ ކަމަށާއި ކޮންމެ މީހަކަށް ވެސް ޗުއްޓީ ބޭނުން ވާނެ ކަމަށް އޭނާ އިއުތިރާފް ވެފައިވެއެވެ.
ޖޯން ފާހަގަ ކުރެވެނީ ބޮލީވުޑްގައި ވަރަށް ފިޓްކޮށް ހުންނަ އެކްޓަރެއްގެ ގޮތުގައެވެ. އަދި ފިޓްކޮށް ހުރުމަށް އޭނާ ވަނީ ތަފާތު ޝޯ ތަކުގައި ސަޕޯޓަރުންނަށް ނަސޭހަތް ވެސް ދީފައެވެ.
ޖޯން މިވަގުތު އަންނަނީ ފިލްމު "ޕަތާން"ގެ މަސައްކަތް ކުރަމުންނެވެ. މި ފިލްމު ރިލީޒް ކުރުމަށް ތާވަލް ކޮށްފައިވަނީ އަންނަ އަހަރަށެވެ.
