ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނި ހަމަލާ ދޭން ފެށިފަހުން މިހާތަނަށް 121 ކުޑަކުދިން މަރުވެ 167 ކުދިންނަށް އަނިޔާވެފައި ވާކަމުގައި ޔޫކުރެއިންގެ ޕްރޮސެކިއުޓަރޖެނެރަލްގެ އޮފީހުން ބުނެފިއެވެ.
އަދި އެންމެފަހުން ރަޝިއާއިން ދިން ހަމަލާތަކުގައި މަރުވެފައިވަނީ، 14 އަހަރުގެ ފިރިހެން ކުއްޖަކާއި 9 އަހަރުގެ އަންހެން ކުއްޖެއް ކަމަށްވެސް ޕްރޮސެކިއުޓަރޖެނެރަލްގެ އޮފީހުން ބުނެފައި ވެއެވެ. ޕްރޮސެކިއުޓަރޖެނެރަލްގެ އޮފީހުން ޓެލެގްރާމް އެކައުންޓުގައި އާންމު ކޮށްފައިވާ ސްޓޭޓްމަންޓުގައި ބުނެފައިވާ ގޮތުގައި، މި ދެކުދިން މަރުވެފައިވަނީ، ޔޫކުރެއިންގެ ބާރުގެ ދަށުގައި އޮންނަ އެގައުމުގެ ޑޮނެސްކު ރީޖަންގައެވެ.
މި ސްޓޭޓްމަންޓުގައި ބުނެފައިވާ ގޮތުން، މި މާރިޗްމަހުގެ 17ވަނަ ދުވަހު، ރަޝިއާގެ ސިފައިންގެ މީހަކުވަނީ، ވެރިރަށް ކީވްގެ، ރަޝިއާއިން ހިފާފައިވާ ކުޑަ އަވަށެއްގައި ބައްޕައަކު އޭނާގެ 14 އަހަރުގެ ފިރިހެން ދަރިފުޅުގެ ކުރިމަތިގައި މަރާލާފައެވެ. އަދި މިކުއްޖާއަށް ލިބުނު އަނިޔާތަކަށް މިހާރުދަނި ފަރުވާ ދެމުންކަމުގައިވެސް މި ސްޓޭޓްމަންޓުގައި ބުނެފައި ވެއެވެ.
ޔޫކުރެއިންގެ ޕްރޮސެކިއުޓަރގެ އޮފީހުން ބުނެފައިވާ ގޮތުގައި ހަގުރާމާގައި މިހާތަނަށް، ރަޝިއާއިން ދީފައިވާ ހަމަލާތަކުގައި އެގައުމުގެ 220 ސްކޫލަކާއި 155 ކިންޑަރގާޓެންއެއްވަނީ ސުންނާފަތި ވެފައެވެ.
ޔޫއެން ހައިކޮމިޝަނަރ ފޯރ ހިއުމަންރައިޓްސް ވަރަށް ފަހުން ވިދާޅުވެފައިވާ ގޮތުގައި، ޔޫކުރެއިންގައި ހިގަމުންދާ ހަގުރާމާގައި މިހާތަނަށް އެގައުމުގެ 902 މީހަކު މަރުވެ، 1،459 މީހަކަށް ވަނީ އަނިޔާވެފައެވެ. މަރުވެފައިވާ މީހުންގެ ތެރެއިން ގިނަ މީހުން މަރުވެފައިވަނީ، ޔޫކުރެއިންގެ އިރުމަތީގެ ޑޮނެސްކްއާއި ލުހާންސްކު ސަރަހައްދުގައެވެ. މި ސަރަހައްދުގެ އެއްބައި ކޮންޓްރޯލް ކުރަމުންދަނީ، ރަޝިއާގެ އެހީތެރިކަމާއެކު، ވަކިވެގަތުމަށް ހަގުރާމަ ކުރަމުންދާ ހަގުރާމަވެރިންނެވެ.
