"ދެކެދެކެވެސް ޕްރޮޑަކްޝަން" އިން "ބަލްގިޝް" އަދި "ސިޔާސީ މަންޖޯޅި"ގެ ނަމުގައި ދެ ޓީވީ ސީރީޒެއް އުފެއްދުމުގެ މަސައްކަތް ފަށައިފިއެވެ.
މުޙައްމަދު ޢަބްދުﷲ (މުހައްމާ)ގެ "ދެކެދެކެވެސް ޕްރޮޑަކްޝަން" އިން އުފައްދަ މި ކުރު ދެ ސީރީޒްގެ މަސައްކަތް މިހާރު އަންނަނީ ވަރަށް ހަލުވި ސްޕީޑުގައި ކުރަމުންނެވެ. ދެ ސީރީޒްގެ ޝޫޓިންގ ވެސް ކުރިއަށް ދަނީ ރ. އަތޮޅު ދުވާފަރާއި މާކުރަތުގައެވެ.
"ބަލްގިޝް"އަކީ ރޯދަ މަހަށް ހާއްސަ ކޮށްގެން ހަދާ ޑްރާމާއެކެވެ. މި ޑްރާމާ އަކީ ލޯބީގެ ޑްރާމާއެކެވެ. "ސިޔާސީ މަންޖޯޅި" އަކީވެސް ހަމަ ފަސް އެޕިސޯޑުގެ ޑްރާމާއެކެވެ. މި ޑްރާމާ އަކީ ހެއްވާ މަޖާ ކަންތައްތަކެއްގެ ތެރެއިން ކޮންމެވެސް ވަރަކަށް ސިޔާސީ ކަންތައްތަކެއްވެސް ފެންނާނެ ޑްރާމާއެއް ކަމަށް ޕްރޮޑިއުސަރ މުހައްމާ މައުލޫމާތުދެއެވެ.
"ބަލްގިޝް" ގެ މުހިންމު ރޯލުތަކުން ފެންނާނީ ޝިފާ، ޢަލީ އާޒިމް (ދޮން އައްޔަ)، އަޙްމަދު ނިމާލް، އާމިރާ، ޢާރިފާ (އަރީ)ގެ އިތުރުން މާއްޓެ އެވެ. މި ޑްރާމާ ދައްކަން ހަމަޖެހިފައިވަނީ ރޯދަމަހު ޗެނަލް 13 އިންނެވެ.
"ސިޔާސީ މަންޖޯޅީ"ގެ ކާސްޓުގައި ޝިފާ، ދޮން އައްޔަ، މާއްޓެ، ނަސީރުބެ އަދި ނިމާލްގެ އިތުރުންވެސް އިތުރު އައު ކުދިން ފެންނާނެ ކަމަށް ޕްރޮޑިއުސަރ މުހައްމާ މައުލޫމާތުދެއެވެ. މި ޑްރާމާ ދައްކާނެ ވަކި ދުވަހެއް އަދި ހާމަނުކުރި ނަމަވެސް މި ޑްރާމާވެސް ގެނެސްދިނުމަށް ހަމަޖެހިފައި ވަނީ ޗެނަލް 13 އިންނެވެ.
މިހާރުވެސް ޗެނަލް 13 އިން "ބަލްގިޝް"ގެ ޓްރެއިލާ އަންނަނީ ދައްކަމުންނެވެ. އަދި ވަރަށް އަވަހަށް "ސިޔާސީ މަންޖޯޅީ"ގެ ޓްރެއިލާވެސް އާންމުކުރާނެ ކަމަށް މައުލޫމާތު ލިބެއެވެ.
