ރާއްޖޭގައި ތެލުގެ އަގަށް ގެންނަ ބަދަލުތަކާއި ގުޅިގެން ޓެކްސީ ސެންޓަރުތަކުން ޓްރާންސްޕޯޓް އެންޑް ސިވިލް އޭވިއޭޝަން ނަހުލާ އަލީއާއި ބައްދަލު ކުރަން 5 ދުވަހުގެ މުހުލަތެއް ދީފިއެވެ.
ޓެކްސީތަކުން ނަގާ އަގު ބޮޑު ކުރުމަށް ނިންމާފައިވާ ނިންމުން މިނިސްޓަރ ނަހުލާއާއި ހިއްސާ ކުރައްވައި ބައްދަލު ކުރުމަށް އެދި ފޮނުވި ސިޓީގައި ބުނެފައިވަނީ ޓެކްސީ ޚިދުމަތުގެ އަގުނެގުމުގައި، ޚިދުމަތުގައި އުޅޭ ހުރިހާ ބާރުތަކެއްގައި މީޓަރު ހަރުކޮށްގެން އަގު ނެގުމުގެ އިންތިޒާމު، ވީ އެންމެ އަވަހަކަށް ތަންފީޒު ކުރުމަށް ހުރިހާ ޓެކްސީ ސެންޓަރުތަކުގެ އިއްތިފާގުން ފާސްވެ އެކަމަށް މަސައްކަތް ފެށުމަށް ނިންމާފައިވާކަމަށެވެ.
ޕްރައިވެޓް ސެކްޓަރއަކުން ޕަބްލިކް ޚިދުމަތެއްގެ ގޮތުގައި ދެމުންގެންދާ މި ޓެކްސީ ޚިދުމަތުގައި މީޓަރު ހަރުކުރުމުގެ އިންތިޒާމު ހަމަޖެއްސުމަށާއި އަގު ކަނޑަ އެޅުމަށް، ޚިދުމަތުގައި އުޅޭ ޑްރައިވަރުންނާއި މަޝްވަރާކޮށް، ޑްރައިވަރުންނާއި ޓެކްސީ ސެންޓަރުތަކުގެ އިހުތިޔާރުގެ ތެރެއަށް ލިބިގެންވާ ކަމަށް، ހުރިހާ ޑްރައިވަރުންނާއި ހުރިހާ ޓެކްސީ ސެންޓަރު ތަކުންވެސް ޤަބޫލު ކުރާކަމަށެވެ.
ޓެކްސީ ޚިދުމަތުގެ ދާއިރާއަށް ދިމާވެފައިވާ އެންމެހާ ގޮންޖެހުންތަކާއި، ޚިދުމަތުގައި އުޅޭ އެންމެހާ ޑްރައިވަރުންގެ ގެއްލިފައިވާ ހައްގު ތަކާއި، ޑްރައިވަރުންނަށް ދިވެހިރައްޔިތެއްގެ ހައިސިއްޔަތުން، ޤާނޫނުއިން ލިބެންޖެހޭ ހައްގު ތަކުން އެންމެހާ ޑްރައިވަރުން މަހްރޫމްވެފައިވާކަމަށް އަޅުގަނޑުމެންނަށްވެސް ޤަބޫލުކުރެވޭތީ އާއި އަދި ހަމައެހެންމެ މިނިސްޓްރީގެ ބައެއް އަމަލު ތަކުގެ ސަބަބުން ގިނަ އަދަދެއްގެ ޑްރަވަރުން، ތިޔަ މިނިސްޓްރީއާއި މެދު ކުރާ ތުހުމަތު ތަކާއި ދާއިރާގެ ޚިދުމަތުގައި އުޅޭ އެންމެހާ ފަރާތްތަކުން ތިޔަ މިނިސްޓްރީއާއި މެދު ގެއްލިފައިވާ އިތުބާރާއި އުފެދިފައިވާ ހިތްނުތަނަވަސްކަމާއި، ޑްރައިވަރުންނަށް ދިމާވާ ދަތި އުދަގޫތަކާއި، ޓެކްސީ ދާއިރާއަށް ރައްޔިތުން ކުރާ އިތުބާރުވެސް ގެއްލިފައިވާތީވެ، ހުރިހާ ޓެކްސީ ސެންޓަރު ތަކުގެ އިސްވެރިންނާއި ކޮންމެ ސެންޓަރަކުން އިސްކޮށް އުޅޭ މަދުވެގެން 2 ޑްރައިވަރުންނާއި އެކު، މިނިސްޓަރ ޢާއިޝަތު ނަހުލާ އާއި އެކު މަޝްވަރާ ބައްދަލުވުމެއް އިންތިޒާމު ކޮށްދިނުމަށް މިސިޓީގައި ވަނީ ދަންނަވާފައެވެ.
މި ސިޓީ ލިބޭ ތާރީޚުން ފެށިގެ 5 ދުވަސް ތެރޭގައި، ބައްދަލުވުން ބާއްވާނެ ދުވަހެއް، ހުރިހާ ސެންޓަރު ތަކަށް ލިޔުމަކުން އަންގަވައިދެންވުމަށް ވަނީ އެދިފައެވެ. އަދި 5 ދުވަސް ތެރޭގައި ލިޔުމަކުން ޖަވާބެއް ނުލިބިއްޖެ ނަމަ، ހުރިހާ ޓެކްސީ ސެންޓަރު ތަކުން މިނިސްޓަރ ޢާއިޝަތު ނަހުލާ އާއި ބައްދަލުކޮށްލުމަށް މިނިސްޓްރީއަށް ދާނެ ކަމަށްވެސް ވަނީ ބުނެފައެވެ.
