ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ތައިރޮއިޑް ފަރުވާއަކަށް މިއަދު ސާޖަރީއެއް ކުރަން ޖެހުމުން އެވަގުތުކޮޅަށް އެމަނިކުފާނުގެ ޒިންމާތައް ނައިބް ރައީސާއި ހަވާލުކުރި ކުރުމަކީ ކުޑަވަގުތުކޮޅަކަށްވެސް އެމަނިކުފާނު ޤާނޫނު އަސާސީއާއި ޚިލާފްނުވާނެކަމުގެ ރީތި މިސާލެއްކަމުގައި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ތައިރޮއިޑް ފަރުވާއަކަށް މިއަދު ކުރެއްވި އޮޕަރޭޝަނަށްފަހު ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތަކާ އެމަނިކުފާނު އަލުން ހަވާލުވެ ވަޑައިގެންނެވީ ވެރިކަމުގެ ބާރުތައް ނައިބް ރައީސާއި ހަވާލު ކުރެއްވިތާ 3 ގަޑިއިރުގެ ތެރޭގައެވެ.
ރައީސް މިކަމުގައި އަމަލު ކުރައްވާފައިވާ ގޮތަށް ގިނަ ބަޔަކު ދަނީ ތަޢުރީފް ކުރައްވަމުންނެވެ. މެމްބަރު އަހުމަދު ވިދާޅުވީ މިއީ ކުޑަވަގުތޮޅަކަށްވެސް ޤާނޫނު އަސާސީއާއި ޚިލާފް ނުވާނޭކަން ރައީސުލްޖުމްހޫރިއްޔާ ހަމަކޮށްދެއްވި ފުރިހަމަ މިސާލެއްކަމަށެވެ. އަދި އަލުން އެމަނިކުފާނުގެ އޮޕަރޭޝަނަށްފަހު ހާޅުކޮޅު ރަނގަޅުވެ، ބާރުތަކާއި ހަވާލުވުމަކީ ލިބިގެންދިޔަ ބޮޑު ހިންހަމަ ޖެހުމެއްކަމަށް އަހުމަދު ވިދާޅުވިއެވެ.
ކުޑަ ވަގުތުކޮޅަކަށްވެސް ޤާނޫނު އަސާސީއާއި ޚިލާފްވެ ވަޑައިނުގެން ދެއްކެވި ރީތި ނޫމޫނާއެއީ ރީތި މިސާލެއް. އަލުން ވެރިކަމުގެ ޒިންމާތަކާއި ހަވާލުވެ ވަޑައިގަތުމަކީ އުފަލެއް.
– އަހުމަދު ވިދާޅުވިއެވެ.
ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތަކާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަލުން ހަވާލުވެވަޑައިގެންނެވީ ޤާނޫނު އަސާސީގެ 123 ވަނަ މާއްދާގެ (ހ)ގައި ވާގޮތުގެ މަތިން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އެކަން ލިއުމުން އެންގެވުމަށްފަހު ހެނދުނު 9:30 ގައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އެމަނިކުފާނުގެ މަޤާމުގެ މަސްއޫލިއްޔަތުތަކާއި ވާޖިބުތައް އަދާކުރެއްވުމަށް ވަގުތީގޮތުން ޢުޛުރުވެރިވެޑައިގަންނަވާ ޙާލަތެއް މެދުވެރިވެފައިވާތީ ރައީސުލްޖުމްހޫރިއްޔާގެ މަސްއޫލިއްޔަތުތައް ވަގުތީގޮތުން ރައީސުލްޖުމްހޫރިއްޔާގެ ނައިބު ފައިޞަލް ނަސީމާ ހަވާލު ކުރެއްވީ މިއަދު ހެނދުނު 6:00 ޖެހިއިރުއެވެ.
