ރަޝިޔާއިން ޔޫކުރެއިންއަށް އަރާ އެގައުމަށް އަސްކަރީ ހަމަލާ ދޭން ފެށުމާއި ގުޅިގެން، ރަޝިއާއި ދެކޮޅަށް އަޅާނޭ ދަތިކުރުމުގެ ފިޔަވަޅުތަކާ ގުޅޭގޮތުން ޖީ7ގެ ގައުމުތަކުން މަޝްވަރާކުރަން ފަށާއިފިއެވެ.
ވައިޓް ހައުސްއިން މައުލުމާތު ދީފައިވާ ގޮތުގައި، އޮންލައިންކޮށް ކުރިޔަށްދާ މި ބައްދަލުވުމުގައި ބައިވެރިވަމުން ދަނީ:
އެމެރިކާގެ ރައީސް ޖޯ ބައިޑްން
ޖާރމަން ޗާންސެލަރ އޮލާފް ޝޮލްޒް
ކެނެޑާގެ ބޮޑުވަޒީރު ޖުސްޓިން ޓްރޫޑޯ
ފްރާންސްގެ ރައީސް އެމަނުލް މެކްރޮން
އިޓަލީގެ ބޮޑުވަޒީރު މާރިއޯ ޑްރަގި
ޖަޕާނުގެ ބޮޑުވަޒީރު ކިޝިޑާ ފުމިއޯ
އިނގިރޭސި ބޮޑުވަޒީރު ބޮރިސް ޖޯންސަން
ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑަރ ލެޔެން
ޔޫރަޕިއަން ކައުންސިލްގެ ރައީސް ޗާރލްސް މައިކަލް
ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެމްބާގު އެވެ.
ރަޝިއާއި ދެކޮޅަށް ގުޅިގެން އަޅާނޭ ފިޔަވަޅުތަކާއި ގުޅޭގޮތުން، ދުނިޔޭގެ އެންމެ މުއްސަދި 7 އިގްތިސާދު ހިމެނޭ ގައުމުތަކުން މަޝްވަރާ ކުރަމުން ދާއިރު، ރަޝިއާއިން ގެންދަނީ، ޔޫކުރެއިންގެ ވެރިރަށް ކީވްއަށް ވަނުމަށްޓަކާ އެ ސިޓީވަށައިގެން ޔޫކްރެއިންގެ އަސްކަރިއްޔާގެ މަގާމްތަކަށް ވަރުގަދަ ހަމަލާތަކެއް ދެމުންނެވެ. އަދި ޔޫކުރެއިންއިން ނިއުސް ރިޕޯޓަރުން މައުލޫމާތު ދެމުންދާ ގޮތުގައި ރަޝިއާ ސިފައިންނާއި ޔޫކުރެއިން ސިފައިން ދަނީ ވަރުގަދައަށް ހަމަލާ ބަދަލު ކުރަމުންނެވެ.
މިހާރު ކުރިޔަށްދާ ޖީ7ގެ ގައުމުތަކުގެ ވެރީންގެ ބައްދަލުވުމަށްފަހު، ރަޝިއާއި ދެކޮޅަށް އެމެރިކާއިން އަޅާނޭ ފިޔަވަޅުތައް ހާމަ ކުރެއްވުމަށްޓަކާ އެމެރިކާގެ ރައީސް ޖޯ ބައިޑްން އެގައުމުގެ ރައްޔިތުންނާއި މުޚާތަބް ކުރެއްވުމަށް ވަނީ ހަމަޖެހިފައެވެ.
ރަޝިއާއިން ޔޫކުރެއިންގެ މިނިވަންކަމަށް އަރާ، އެގައުމަށް އުދުވާނީ ހަމަލާ ދޭން ފެށުމާއި ގުޅިގެން، ދުނިޔޭގެ ގައުމުތަކުން ރަޝިއާއާއި ދެކޮޅަށް އަޅާނޭ ފިޔަވަޅުތައް އިއުލާން ކުރަމުން ދާއިރު، ޔޫރަޕިއަން ޔޫނިއަންއިން ރަޝިއާއާއި ދެކޮޅަށް އަޅާ އިގްތިސާދީ ދަތިކުރުމުގެ ފިޔަވަޅުތަކުން ރަޝިއާގެ އިގްތިސާދު ފުނޑު ފުނޑު ކޮށްލާނެކަމަށް ވިދާޅުވެ، ރަޝިއާއި ދެކޮޅަށް އަޅާނޭ ދަތިކުރުމުގެ ފިޔަވަޅުތަކުގެ އޮނިގަޑު ޔޫރަޕިއަން ކޮމިޝަންގެ ރައީސާ އުރުސުލާ ވިން ޑަރ ލެޔެން ވަނީ ހާމަ ކުރައްވާފައެވެ.
ބްރަސަލްސްގައި ވާހަކަ ދައްކަވަމުން، ރަޝިއާއި ދެކޮޅަށް އަޅަން ނިންމާފައިވާ ކަމަށް، ޔޫރަޕިއަން ކޮމިޝަންގެ ރައީސް އިއުލާން ކުރައްވާފައިވާ ފިޔަވަޅުތަކުގެ ތެރޭގައި އިޔޫގައި ހުރި ރަޝިއާގެ އެސެޓްތައް ފްރީޒް ކުރުމާއި، އަދި އޭގެ އިތުރުން ރަޝިއާގެ ބޭންކުތަކަށް ޔޫރަޕިއަން ފައިނޭންޝަލް މާރކެޓްތަކަށް ވަނުމުގެ ފުރުސަތު ބަންދުކުރުން ހިމެނެއެވެ.
ޔޫރަޕިއަން ކޮމިޝަންގެ ރައީސް އުރުސުލާ ވިދާޅުވި ގޮތުގައި މިގޮތުން އަޅާ ފިޔަވަޅުތަކުގެ ނަތީޖާއެއްގެ ގޮތުން، ޔޫކުރެއިންގެ އިގްތިސާދުގެ ކެޕިޓަލް އައުޓުފްލޯ އިންތިހާއަށް މަތިވެ، އޭގެ ނަތީޖާއެއްގެ ގޮތުން އިންފްލޭޝަން މަތިވެ، އަދި އެންމެފަހުން ރަޝިއާގެ އިންޑަސްޓްރީތައް އެކީ ހަލާކުވެގެން ދާނެކަމަށެވެ.
އަދި މީގެ އިތުރުން، ދުނިޔޭގެ ބޮޑެތި ހައިޓެކް ކުންފުނިތަކުން ރަޝިއާއި މުޢާމަލާތު ކުރުމަށް ދަތިކޮށް، ކަޓިން-އެޖް ސޮފްޓެވެއަރތަކަށް ބޭނުންވާ ހައި-ޓެލް ކޮމްޕޯނެންޓްތައް ރަޝިއާއަށް ލިބުން ދަތިކުރާނެ ކަމަށްވެސް މިއަދު ޔޫރަޕިއަން ޔޫނިއަންއިންވަނީ ހާމަ ކޮށްފައެވެ.
ޔޫރަޕިއަން ޔޫނިއަން ރަޝިއާއި ދެކޮޅަށް އަޅާނެ އިގްތިސާދީގޮތުން ދަތިކުރުމުގެ ފިޔަވަޅުތަކުގެ މައިގަޑު އަސާސްތައް ހާމަކޮށްފައި ވާއިރު، އެމެރިކާ އަދި އިނގިރޭސިވިލާތުންވެސް ދަނީ ރަޝިއާއި ދެކޮލަށް އަޅާނެ ދަތިކުރުމުގެ ފިޔަވަޅުތައް ހާމަކުރުމަށް ތައްޔާރު ވަމުންނެވެ.
މިގޮތުން އިނގިރޭސިވިލާތުގެ ރައްޔިތުންނާ ޓީވީ މެދުވެރިކޮށް ވާހަކަ ދައްކަވަމުން އިނގިރޭސި ބޮޑުވަޒީރު ބޮރިސް ޖޯންސަން ވިދާޅުވެފައިވަނީ، ރަޝިއާއިން ޔޫކުރެއިން އުދުވާނީ ހަމަލާ ދޭން ފެށުމާއި ގުޅިގެން، ރަޝިޔާގެ އިގުތިސާދަށް ބޮޑެތި ގެއްލުން ދެނިވި ފިޔަޅުވަޅުތައް އެގައުމުން އަޅާނެ ކަމަށެވެ.
އަދި ރަޝިއާގެ ރައީސް ޕުޓިންއަކީ ޚުދުމުޚްތާރު ވެރިއެއްކަމުގައި ވިދާޅުވަމުން، ޖޯންސަން ވިދާޅުވެފައިވަނީ، ޔޫރަޕް ސަރަހައްދުގައި ބޮޑު ހަގުރާމައެއް ޕުޓިން ފެށިފެށުން ކުށްވެރި ކުރައްވާފައެވެ.
ރަޝިއާއިން ޔޫކުރެއިންއަށް އުދުވާނީ ހަމަލާ ދޭންފެށުމާއި ގުޅިގެން ޓީވީ މެދުވެރިކޮށް ވާހަކަ ދައްކަވަން ފެއްޓުމުގެ ކުރިން ފްރާންސްގެ ރައީސް އެމަނުލް މެކްރޮން ވަނީ ޔޫކުރެއިންގެ ރައްޔިތުންނަށް ސެލިއުޓު ކުރައްވާފައެވެ. "އެމީހުންގެ މިނިވަންކަމަކީ އަހަރެމެންގެވެސް މިނިވަންކަން،" މެކްރޮން ވިދާޅުވެފައި ވެއެވެ. އޭނާ ވިދާޅުވި ގޮތުން ޔޫރަޕްގެ އިއްތިހާދުން ރަޝިއާގެ އަސްކަރިއްޔާއަށާއި، އިގްތިސާދަށާއި އަދި ރަޝިއާގެ ހަކަތަ ސިނާއަތަށް އަމާޒުކޮށް އިގްތިސާދީގޮތުން ދަތިކުރުމުގެ ފިވަޅުތައް އަޅާނެއެވެ.
