މާލޭގައި ތަރައްގީކޮށްފައިވާ 211 ޕާކިން ސްލޮޓަށް 2429 ފޯމު ހުށަހަޅާފައިވާކަމަށް މާލެ ސިޓީ ކައުންސިލުން ބުނެފިއެވެ.
މާލެ ސިޓީ ކައުންސިލުން ވަނީ ޕޯޓަލް މެދުވެރިކޮށް ޕާކިން ސްލޮޓްތަކަށް ކުރިމަތި ލުމަށް މިއަދު 14:00ގައި ހުޅުވާލާފައެވެ. މިއަދު އިރުއޮއްސި 6 ޖެހުމާއި ހަމައަށް 2429 ފޯމު ހުށަހަޅާފައިވާކަމަށް މާލެ ސިޓީ ކައުންސިލުން ވަނީބުނެފައެވެ. އަދި ހުށަހެޅިފައިވާ ފޯމުތަކުގެ ސައްޚަކަން ކަށަވަރުކުރުމާއި، އިދާރީގޮތުން ބަލަންޖެހޭ ކަންކަން ބެލުމަށްފަހު އިތުރު މަޢުލޫމާތު މާލެ ސިޓީ ކައުންސިލުން ހިއްސާކުރާނެ ކަމަށް މާލެ ސިޓީ ކައުންސިލުން ބުނެފައިވެއެވެ.
ޕާކިން ޕޯޓަލް 18:00 ގައި ބަންދު ކުރެވުނުއިރު 2429 ފޯމު ހުށަހަޅާފައިވޭ. ހުށަހެޅިފައިވާ ފޯމުތަކުގެ ސައްޚަކަން ކަށަވަރުކުރުމާއި، އިދާރީގޮތުން ބަލަންޖެހޭ ކަންކަން ބެލުމަށްފަހު އިތުރު މަޢުލޫމާތު މާލެ ސިޓީ ކައުންސިލުން ހިއްސާކުރާނެ ވާހަކަ ދަންނަވަމެވެ.
— Male' City Council (@MaleCitymv) February 17, 2022
މާލެ ސިޓީ ކައުންސިލުން ގާއިމްކޮށްފައިވާ ޕާކިންގ ސްލޮޓްތަކަށް ކުރިމަތި ލުމަށް އިއްޔެވެސް ހުޅުވާލިއެވެ. ނަމަވެސް ޕޯޓަލް ޑައުންވުމާއި ގުޅިގެން މައްސަލަ ހައްލުކޮށް މިއަދު އަލުން ޕޯޓަލް ހުޅުވާލާނެކަމަށް މާލެ ސިޓީ ކައުންސިލުން ވަނީ ބުނެފައެވެ.
ޕާކިން ސްލޮޓްތަކުގައި ޕްރައިވެޓް ކާރެއް ޕާކް ކުރުމަށް މަހަކު 1،000 ރުފިޔާ ކައުންސިލަށް ދައްކަންޖެހެއެވެ. އެކަމަކު ކޯވިޑް ހާލަތު އުވާލުމުން އެ އަދަދު 1،500 ރުފިޔާ އަށް ބޮޑުކުރުމަށް މާލެ ސިޓީ ކައުންސިލުން ވަނީ ނިންމާފައެވެ. ޓެކްސީއެއް ބާއްވާނަމަ މަހަކު 750 ރުފިޔާ ދައްކަންޖެހެއެވެ.
މި ޖާގަތަކުގެ ތެރެއިން އެންމެ ގިނަ ޖާގައަށް ހުޅުވާލާފައިވަނީ ހެންވޭރު ސަލްމާން މިސްކިތު ސަރަޙައްދުގައި ތަރައްޤީކޮށްފައިވާ ޕާކިންގ ޒޯންތަކުންނެވެ. އެގޮތުން އެ ސަރަޙައްދުން 58 ޖާގަ ކުއްޔަށް ދޫކުރުމަށް ވަނީ ނިންމާފައެވެ. ދެން އެންމެ ގިނަ ޖާގަ ކުއްޔަށް ދޫކުރުމަށް ހުޅުވާލާފައިވަނީ މއ. ވައިދެރިހިނގުން (އަމީނީމަގާއި ކުރެދިގޯޅިއާއި ދެމެދު) އިންނެވެ. އެ ސަރަޙައްދުން 44 ޖާގަ ކުއްޔަށް ދޫކުރުމަށް ހަމަޖެހިފައިވެއެވެ.
ވެހިކަލް ޕާކްކުރަން ކުއްޔަށް ދޫކުރުމަށް ހުޅުވާލާފައިވާ އިތުރު ޖާގަތަކުގެ ތެރޭގައި މއ. ރާދަފަތިހިނގުން (އަމީނީމަގާއި ފަޅުމަތީމަގާއިދެމެދު) އިން 21 ޖާގަ، މއ. ކުރެދިގޯޅިން 10 ޖާގަ، މއ. ހުދުފަޅުހިނގުމުން 8 ޖާގަ، މ. ހިލާލީމަގު އަމީނީމަގުން ފެށިގެން ދެކުނު އިރުމަތީފަޅިން 20 ޖާގަ، މ. ހިލާލީމަގު، އަމީނީމަގު އިރުމަތީ ފަޅި (ސްޓޭޑިއަމް ފަޅީގައި) 10 ޖާގަ، ޞަލާޙުއްދީން ޕާކިންގ ޒޯނުން 10 ޖާގަ އަދި ހ. އަލިމަސް ކާނިވާ ސަރަހައްދުން 6 ޖާގަ ހިމެނެއެވެ.
މީގެ އިތުރުން ހަމައެކަނި ޕްރައިވެޓް ކާރުތައް ޕާކުކުރުމަށް 24 ޖާގައެއް ކުއްޔަށް ދިނުމަށްވެސް މާލޭ ސިޓީ ކައުންސިލުން ނިންމާފައިވެއެވެ. މި 24 ޖާގަ ދިނުމަށް ހަމަޖެހިފައިވަނީ އާޓިފިޝަލް ބީޗް ޕާކިންގ ހިމެނޭ ސަރަޙައްދުން ޗައިނާ އެމްބަސީ ކުރިމަތިންނެވެ.
