ރަޝިއާއި އަތާ އަތް ގުޅާލާ، ނޭޓޯ އިތުރަށް ފުޅާ ނުކުރުމަށް ޗައިނާގެ ރައީސް ޝީ ޖިންގ ޕިންގ ގޮވާލައްވައިފިއެވެ.
ރަޝިއާގެ ރައީސް ލާޑިމިރ ޕުޓިންގ މިހާރު ޗައިނާއަށް ކުރައްވަމުން ގެންދަވާ ދަތުރުފުޅުގައި، ހުކުރުދުވަހު ދެ ލީޑަރުން ބައްދަލު ކުރެއްވުމަށްފަހު، ނެރުއްވި ގުޅިފައިވާ ބަޔާނުގައި، ރަޝިއާއާއި ޗައިނާގެ ރައީސްވަނީ "ފިނި ހަނގުރާމައިގެ ވިސްނުމާއި ފިކުރު" ނުގެންގުޅުމަށް ނޭޓޯއަށް ގޮވާލައްވާފައެވެ.
މިއީ، މިހާރު ވިންޓަރ އޮލިމްޕިކް ބާއްވަމުން ގެންދަވާ ޗައިނާގެ ރައީސް ޝީ، ފާއިތުވި ދެ އަހަރުތެރޭ ދުނިޔޭގެ ގައުމެއްގެ ލީޑަރަކާއެކީ އެއްތަނެއްގައި ތިއްބަވައިގެން ބޭއްވި ފުރަތަމަ ބައްދަލު ވުމެވެ. އަދި މި ބައްދަލުވުން ރަޝިއާއާއި ޗައިނާގެ ވެރިންގެ މެދުގައި ބާއްވާފައި މިވަނީ، ޔޫކްރެއިން މައްސަލަ އިތުރަށް ހޫނެވެ، މަސްރަހު ފިނިކުރުމަށް ހުޅަނގުގެ ލީޑަރުން އިސްވެ އިތުރު ޑިޕްލޮމެޓިކް މަސައްކަތްތަކެއް ފަށާފައި ވަނިކޮށެވެ.
މިގޮތުން، އަންހަފްތާގައި، ފްރާންސްގެ ރައީސް އެމަނޫލް މެކްރޮންއާއި ޖަރުމަނުގެ ޗާންސެލަރ އޮޅާފް ޝޯލްޒް މޮސްކޯއަށާއި ކިވްއަށް ވަޑައިގަތުމަށް ހަމަޖެހިފައިވާ ކަމުގައި މިދެގައުމުން ވަނީ ބުނެފައެވެ.
ޔޫކުރެއިންގެ ބޯޑަރު ކަރިއަށް ރަޝިއާގެ އެތައް ހާސް ސިފައިންނެއް ޖަމާކުރަމުން ދިއުމާ ގުޅިގެން، ރަޝިއާއިން ޔޫކުރެއިންއަށް އެރުމަށް ރާވަމުންދާ ކަމުގެ ކަންބޮޑުވުން ހުޅަގުގެ ގައުމުތަކުގެ މެދުގައި އުފެދިގެން ގޮސްފައި ވާއިރު، އެމެރިކާއިންވަނީ، ރަޝިއާއިން ޔޫކްރެއިންއަށް އަރައިފިނަމަ، ހީވެސް ނުކުރާވަރުގެ ވަރުގަދަ ދަތިކުރުމުގެ ފިޔަވަޅު އެގައުމާ ދެކޮޅަށް އަޅާނެކަމުގެ އިންޒާރު ދީފައެވެ.
އެހެންނަމަވެސް ރަޝިއާއިން ވަނީ މި ތުހުމަތުތައް ދޮގުކޮށްފައެވެ. ރަޝިއާއިން ބުނެފައިވަނީ އެމެރިކާއާއި ނޭޓޯއިން ދަނީ ސަރަހައްދީ ސަލާމަތަށް ނުރައްކާ ކުރަމުން ކަމުގައެވެ.
