މޯލްޑިވްސް ނެޝަނަލް ޕާޓީ (އެމްއެންޕީ)ގެ ޓިކެޓްގައި ކޮމަންޑޫ ދާއިރާގެ ބައި-އިލެކްޝަންއަށް ކުރިމަތިލާފައިވާ ކެންޑިޑޭޓް އަބުދުލް ޙަންނާނު އިދުރީސްގެ ވައުދުތައް އިފްތިތާޙް ކޮށްފިއެވެ.

ޖަލްސާގައި ވާހަކަ ދައްކަވަމުން ކޮމަންޑޫ ދާއިރާގެ ކެންޑިޑޭޓް ޢަބްދުލް ޙަންނާން އިދުރީސް ވިދާޅުވީ ރައްޔިތުން ދެރަވާފަދަ އެއްވެސް ޤާނޫނެއް ހެދުމަށް ފުރުސަތު ނުދޭނެ ކަމަށެވެ. ދެޕާޓީގެ ވެރިކަންވެސް ރައްޔިތުންނަށް ފެނިގެންގޮސްފައިވާ ކަމަށާއި ދާއިރާއަށް ލިބުނު އެއްވެސް ކުރިއެރުމެއް ނެތްކަމަށެވެ. ރައްޔިތުންގެ ހައްގުގައި ވަކާލާތުކޮށް ސަރުކާރު ޖަވާބުދާރީ ކުރާނެ ކަމުގައި ޙަންނާން ވަނީ ވިދާޅުވިއެވެ.

ދާއިރާގެ ރައްޔިތުންނަށް ޙަންނާންގެ އެންމެ ބޮޑު އެއް ވައުދަކީ ކޮމަންޑޫ ދާއިރާއަށް އެއާޕޯޓެއް އެޅުމަށް ގަދައަޅައި މަސައްކަތް ކޮށްދިނުމެވެ. މީގެ އިތުރުން ރަށްފަތީގައި ރިސޯޓެއް ތަރައްޤީކުރުމަށް ސަރުކާރާއި' ޓޫރިޒަމް މިނިސްޓްރީއަށް ބާރުއެޅުން ހިމެނެއެވެ. މީގެ އިތުރުން ރަމަޟާން މަހު ދާއިރާގެ ތިން ރަށުން އުމްރާއަށް ތިން މީހުން ފޮނުވުމާއި ދާއިރާގެ ޒުވާނުންނަށް ހާއްސަކޮށްގެން މަރްޙޫމް ޙުސައިންގެ ހަނދާނުގައި ފުޓްސަލް މުބާރާތެއް ބޭއްވުން ހިމެނެއެވެ.

ކޮމަންޑޫ ވަޢުދުތައް:

– އެއަރޕޯޓް އެޅުމަށް ސަރުކާރަށް ޕްރެޝަރކުރާނަން
– މަސްވެރިންނަށް ފަސޭހައިން އައިސް ލިބޭނެ އިންތިޒާމް ހަމަޖެއްސުމަށް އައިސްޕްލާންޓް ބަހައްޓައިދޭނަން
– ސްލިޕްވޭ އިންސްޓޯލް ކޮށްދޭނަން
– މަސްވެރިން ބާނާ މަސް ކަނޑާނެ ތަނެއް ހަދައިދޭނަން
– ފަސްގަނޑު އޮތް ސަރަހައްދު ހުސްވުމުން އެތަނުގައި ހަޓް ޖަހާ ތަރައްޤީކުރުމަށް އެހީވެދޭނަން
– ހުރިހާ އުމުރު ފުރާއަކަށް އަމާޒުކޮށް ޖިމްއެއް ހަދައިދޭނަން
– ލޭންޑް ޔޫސް ޕްލޭން އަވަސްކުރުމަށް ޤާނޫނަށް ބަދަލުގެނައުމަށް ހުށަހަޅާނަން
– ރަށްފަތި ރިސޯޓެއްގެ ގޮތުގައި ތަރައްޤީކުރުމަށް މެދުކެނޑުމެއްނެތި މަސައްކަތްކުރާނަން
– ސިއްޙީ ދާއިރާ ތަރައްޤީކުރަން މަސައްކަތްކުރާނަން
– ޚާއްޞަ އެހީއަށް ބޭނުންވާ މީހުންގެ އެލަވަންސް ބޮޑުކުރުމަށް މަސައްކަތްކުރާނަން
– ޒުވާން ޖީލު މަސްތުވާތަކެތިން ސަލާމަތްކުރުމަށް ޕްރޮގްރާމްތައް ހިންގާނަން\
– ތަޢުލީމީ މަރުކަޒުގެ ޚިދުމަތްތައް ވަރުގަދަކޮށް، ތަޢުލީމު އުނގެނުމަށް ކައިރި ރަށްރަށުން އަންނަ ކިޔަވާކުދިން ބައިތިއްބާނެ ތަންތަން ތަރައްޤީކުރުމަށް އެހީތެރިވާނަން

ފޯކައިދޫ ވަޢުދުތައް:

– ހެލްތް ސެންޓަރ ތަރައްޤީކުރުމަށް ބޭނުންވާ ސާމާނު ހޯދުމަށް އެހީތެރިވެދޭނަން
– ހެލްތް ސެންޓަރުގައި މާބަނޑު މީހުންނަށް ވިހާނެ އިންތިޒާމް ހަމަޖައްސައިދޭނަން
– ޒުވާނުންނަށް ރަނގަޅު ފެންވަރެއްގެ ވޮލީ ކޯޓެއް އަޅައިދޭނަން
– ކޮލެޖެއްގެ ކެމްޕަހެއް ފޯކައިދޫގައި ޤާއިމްކުރުމަށް މަސައްކަތްކުރާނަން
– ފައިސާގެ މުޢާމަލާތްތައް ފަސޭހަކޮށްދިނުމަށް އޭޓީއެމް ބަހައްޓަން މަސައްކަތްކުރާނަން
– ފުދުންތެރި ރައްޔިތަކު ބިނާކުރުމަށް ފަހާ ކޯސް، މޭކަޕް ކޯސް އަދި ކައްކާ ކޯސް ހިންގައިދޭނަން
– ޒަމާނީ ތަޢުލީމާއި ޓެކްނޮލޮޖީއަށް ކިޔަވާކުދިން އަހުލުވެރިކުރުމަށް ކޮމްޕިއުޓަރ ލެބެއް ތަރައްޤީކޮށްދޭނަން
– އިސްލާމީ ވަހުދަތު ވަރުގަދަކުރުމަށް ދީނީ ހޭލުންތެރިކަމުގެ ޕްރޮގްރާމްތައް ހިންގާނަން
– ކުޅިވަރުގައި ޒުވާނުންނަށް އިތުރު ފުރުސަތު ހޯދައިދިނުމަށް އެދާއިރާ ތަރައްޤީކުރުމަށް އެހީތެރިވެދޭނަން

މަރޮށި ވަޢުދުތައް:

– އިސްލާމީ ވަހުދަތު ވަރުގަދަކުރުމަށް ދީނީ ހޭލުންތެރިކުރުމުގެ ޕްރޮގްރާމް ހިންގާނަން
– ކުޑަކުދިންގެ ޕާކް އިތުރަށް ތަރައްޤީކުރާނަން
– ސިއްޙީ މަރުކަޒު ތަރައްޤީކުރާނަން
– މޫދަށް އެރޭނެ ސަރަހައްދެއް ތަރައްޤީކުރާނަން
– ބާބަކިއު ހަދާނެ ސަރަހައްދެއް ތަރައްޤީކުރާނަން
– ކޮމްޕިއުޓަރ ކްލާސްތައް ހިންގައިދޭނަން
– އިންޑޯޖިމްއަށް ބޭނުންވާ ސާމާނު ހޯދައިދޭނަން
– ތުނޑީގައި ނޭޗަރ ޕާކެއް ތަރައްޤީކުރަން މަސައްކަތްކުރާނަން
– އަންހެން ކަނބަލުން ފުދުންތެރި ބަޔަކަށް ހެދުމަށް ތަފާތު ފަންނުގެ ކޯސްތައް ހިންގާނަން
– ސްކޫލްގައި ހިންގާ ކަންކަމުގައި މާލީ އެހީތެރިކަން ފޯރުކޮށްދޭނަން

ކޮމަންޑޫ ދާއިރާގެ ބައި އިލެކްޝަނުގައި ދާއިރާއަށް އަދި ދާއިރާގެ ރަށްތަކަށް އަޅުގަނޑުވާ ވަޢުދުތައް މިރޭ ވާނީ އިފްތިތާޙްކޮށްދީފައި. އިރާދަކުރެއްވިއްޔާ އަޅުގަނޑުމެން މިގޮނޑި ކާމިޔާބުކުރާނީ ބޮޑު ތަފާތަކުން. #AaFikurakaaEku #VoteHannan #Hannan3 #Vote3 3⃣✅ pic.twitter.com/WQm1hLoU6i

— Hannan for Komandoo Dhaairaa (@HannanMNP) January 17, 2022

ދާއިރާގައި ފުދުންތެރި ރައްޔިތުންތަކެއް ބިނާކުރުމުގެ ގޮތުން "ފުދުންތެރި ފަންޑް"ގެ ނަމުގައި 2 މިލިއަން ރުފިޔާގެ ފަންޑެއް ހަދައި، އެފަންޑުން އިންޓްރެސްޓް ފްރީ ލޯނުތައް ކުދި އަދި މެދު ފަންތީގެ ވިޔަފާރިތަކައް ދިނުން ހިމެނެއެވެ. ކޮމަންޑޫ، މަރޮށި އަދި ފޯކައިދޫގައި ހުއްޓިފައި ހުރި ތަރައްޤީގެ މަޝްރޫތައް ކުރިއަށް ގެންދިއުމުގައި ސަރުކާރާއި ގުޅިގެން މަސައްކަތް ކުރުމަކީވެސް ޙަންނާންގެ ވައުދެކެވެ.

ފޯކައިދޫ ހެލްތު ސެންޓަރ ތަރައްޤީކުރުމަށް ބޭނުންވާ ސާމާނު ހޯދުމަށް އެހީވުމާއި، ރަނގަޅު ފެންވަރުގެ ވޮލީ ކޯޓެއް އެޅުމުގެ އިތުރުން ފޯކައިދޫގައި ފައިސާގެ މުއާމަލާތު ފަސޭހަ ކުރުމަށް އޭޓީއެމްއެއް ބެހެއްޓުމުގެ މަސައްކަތްކުރުން ހިމެނެއެވެ. މަރޮށީގެ ސިއްޙީ މަރުކަޒު ތަރައްޤީ ކުރުމާއި ރަށުގެ އިންޑޯ ޖިމަށް ބޭނުންވާ ސާމާނު ހޯދައިދިނުމުގެ އިތުރުން މަރޮށީ ސްކޫލް ހިންގުމަށް މާލީ އެހީތެރިކަން ފޯރުކޮށްދިނުން ހިމެނެއެވެ.

ކޮމަންޑޫގައި މަސްވެރިންނަށް ދިމާވެފައިވާ އައިސް ލިބުމުގެ މައްސަލައަށް ދާއިމީ ހައްލެއް ހޯދުމާއި، ސްލިޕްވޭ ގާއިމުކުރުމުުގެ އިތުރުން ސްކޫލްގެ ގޯތި ތެރޭގައި ދަރިވަރުން ކުޅޭނެ ދަނޑެއް އަޅައިދިނުމަކީ ޙަންނާންގެ ވައުދެކެވެ. ކޮމަންޑޫގެ ތަޢުލީމީ މަރުކަޒުގެ ޚިދުމަތް ވަރުގަދަކޮށް ހިންގުމަށް ކުރަން ޖެހޭ މަސައްކަތް ކުރުމަށްވެސް ޙަންނާން ތައްޔާރެވެ.