ކޮމަންޑޫގައި މިއަދު ހެނދުނު އެމްޑީޕީން ކުރަމުންދިޔަ ކެމްޕެއިންގައި އެރަށުގައި ކޯވިޑަށް ޕޮޒިޓިވްވެފައިވާ މީހުން ތިބި ގެޔަކަށް ވަދެ، އެތައް އިރެއް ކުރުމަށްފަހު ނިކުމެ ރަށުގެ އެހެން ގޭތަކަށް ވަންނަމުންދާތީ އެރަށުގެ ގިނަ ބަޔަކު ކަންބޮޑުވުން ފާޅުކޮށްފިއެވެ.

މިއަދު ހެދުނު އެޑިއުކޭޝަން މިނިސްޓަރ އައިޝަތު އަލީއާއި، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒޭނާ އާދަމްއާއި، އާސަންދަ ކުންފުނީގެ އިސް ބޭފުޅަކު ވަނީ ކޮމަންޑޫގައި މޮނިޓަރިންއަށް ލާފައިހުރި ގެއަށް ވަދެ ގިނަ އިރުތަކެއް ކުރުމަށްފަހު ނިކުމެ އެހެން ގޭގެއަށް ވަދެ ކެމްޕެއިން ކޮށްފައެވެ.

މިކަމާއިގުޅިގެން އެރަށުގެ އާންމު ގިނަ ބަޔަކު ކަންބޮޑުވުން ފާޅު ކުރަމުންދާއިރު މިއީ އެޗްޕީއޭއިން ނެރެފައިވާ ގައިޑްލައިނާއިވެސް މުޅިން ޚިލާފް ކަމެއްކަމަށް ކޮމަންޑޫއިން ވާހަކަ ދެއްކި މީހަކު ވަނީ ބުނެފައެވެ. މިކަމާއި ގުޅިގެން ކޮމަންޑޫގެ ކަމާއި ގުޅުންހުރި އިދާރާތަކުގެ ސަމާލުމަށް މިކަން ގެނެސްފައިވާކަމަށްވެސް "ޚަބަރު އޮންލައިން" އަށް މައުލޫމާތު ދިން ކޮމަންޑޫ މީހަކު ބުނެފައިވެއެވެ.

އަދި މިއީ މުޖުތަމުގައި ބަލި ފެތުރި ކޮމިއުނިޓީ ސްޕްރެޑަކަށް ދިއުމުގެ ފުރުސަތު އޮތްކަމަކަށް ވުމުން، މިފަދަ ކަންކަން ކުރުމުން ނުރައްކަލަށް ވެއްޓިގެން ދަނީ މުޅި ކޮމަންޑޫކަމަށް އޭނާ ބުނެފައިވެއެވެ.

ރާއްޖޭގައި ކޯވިޑްގެ ހާލަތު ވަރަށް ބޮޑަށް ގޯސްފައިވެފައިވާއިރު، ކޯވިޑަށް ޕޮޒިޓިވްވާ މީހުން އެކަހެރިވާންޖެހޭކަމަށް އެޗްޕީއޭއިން ވަނީ ކަނޑައަޅާފައެވެ. އަދި ގައިޑްލައިނާއި ޚިލާފްވާ ފަރާތްތަކާއިމެދު ޤާނޫނީ ގޮތުން އަޅަންޖެހޭ ފިޔަވަޅު އަޅާނެކަމަށްވެސް އެޗްޕީއޭއިން ވަނީ ބުނެފައެވެ. ރާއްޖެއިން އިއްޔެވެސް 800 އަށްވުރެ ގިނަ މީހުން ކޯވިޑަށް ޕޮޒިޓިވް ވެފައިވެއެވެ.

ކޮމަންޑޫ ދާއިރާގައި ކެމްޕެއިން ފޯރި ގަދަވެފައިވާއިރު، ސަރުކާރުން ދަނީ ކުއްލިއަކަށް އެދާއިރާގައި ގިނަ މަސައްކަތްތަކެއް ކުރުމަށް ރާވަމުންނެވެ. އެގޮތުން މިއަދުވެސް ބައެއް މަޝްރޫޢުތައް ފެށުމަށް ވަނީ ހަމަޖެހިފައެވެ. ކޮމަންޑޫ ދާއިރާގައި އިދިކޮޅު ޕީޕީއެމްގެ ރައީސް އަބްދުފ ޔާމީންވެސް ވަޑައިގެން ކެމްޕެއިން ކުރައްވަމުންދާއިރު، މިމަހުގެ 21 ވަނަ ދުވަހު ސަރުކާރު ކޯލިޝަނުން އަނެއްކާވެސް ބޮޑު ޖަލްސާއެއް ކޮމަންޑޫގައި ބޭއްވުމަށް ތައްޔާރުވަމުންދާކަމުގެ މައުލޫމާތު ވަނީ ލިބިފައެވެ.