މީގެ 10 އަހަރު ކުރިން، ސީރިއާގެ އަހުލީ ހަގުރާމަ ފެށިގެން އައި ދުވަސްވަރު އެގައުމުގެ ވެރިރަށް ދަމަސްކަސްގެ ޖަލުގައި އިންސާނިއްޔަތާއި ޚިލާފު އަމަލްތައް ހިންގި ކަމުގެ ކުށުގައި، ސީރިއާގެ އަސްކަރިއްޔާގެ ކުރީގެ ކާނަލެއްގެ މައްޗަށް ޖާމަނީގެ ކޯޓަކުން އުމުރު ދުވަހުގެ ޖަލު ހުކުމެއް އިއްވައިފިއެވެ.
ޖާމަނީގެ ކޯބްލެންޒްގެ ކޯޓަކުން މިއަދު އިއްވި މި ހުކުމް ގިނަބަޔަކު ސިފަ ކުރަމުންދަނީ، ސީރިއާގެ ރައީސް ބައްޝާރުލް އަސަދުގެ ވެރިކަމުގައި އެގައުމުގައި ހިގަމުންދާ އަހުލީ ހަގުރާމާގައި އިންސާފު ގެއްލިފައިވާ ސީރިއަގެ އެތައް ރައްޔިތުންނަކަށް އިންސާފު ހޯދާ ދިނުމަށްޓަކާ އެޅިގެންދިޔަ ފުރަތަމަ ފިޔަވަޅުގެ ގޮތުގައެވެ.
"މި ގައިދީ އުމުރަށް ޖަލަށް ލާން ހުކުމް ކޮށްފައިވަނީ، ގަތުލު ޢާންމު ހިންގުމާއި، އިހާނާތްތެރި އަނިޔާތައް ދިނުމާއި، ފަރުދުންގެ މިނިވަންކަން ނިގުޅައިގަތުމާއި، އަދި ޖިންސީ އަނިޔާތައް ކުރުމުގެ ކުށް އޭނާގެ މައްޗަށް ސާބިތު ވުމާއި ގުޅިގެން،" ސީރިއާގެ އަސްކަރިއްޔާގެ ކުރީގެ ކާނަލް އަންވަރު ރަސްލާންގެ މައްޗަށް އިއްވި އުމުރު ދުވަހުގެ ޖަލު ހުކުމަށްފަހު ޖާމަނީގެ ކޯބްލެންޒްގެ ކޯޓުން ނެރުނު ނޫސް ބަޔާނުގައި ބުނެފައި ވެއެވެ.
މިއީ ސީރިއާގެ ސަރުކާރުން ހިންގާފައިވާ އިންސާނިއްތާއި ޚިލާފު ބޮޑެތި ޖަރީމާތަކުގެ މައްޗަށް ހިންގުނު ފުރަތަމަ ޝަރީޢަތްކަމަށް ވެގެން ދިޔައިރު، މިހާރު އުމުރުން 58 އަހަރުގެ ރަސްލާން ވެގެން ގޮސްފައިވަނީ، ބައްޝާރުން އަސަދުގެ ވެރިކަމުގައި ހިންގާފައިވައިވާ ކުށްތަކާއި ގުޅިގެން މިހާތަނަށް ހުކުމް ކުރެވުނު އެގައުމުގެ އެންމެ އިސް އޮފިޝަލް ކަމުގައެވެ.
ރަސްލާންގެ ޝަރީޢަތުގައި ޕްރޮސެކިއުޓަރުން ވަކާލާތު ކޮށްފައިވަނީ، ސީރިއާގެ ވެރިރަށުގައި ހުންނަ އަލް ޚަތީބު ޖަލުގައި، 2011 ވަނަ އަަހަރުގެ އެޕްރިލްމަހާއި 2012ވަނަ އަހަރުގެ ސެޕްޓެމްބަރުމަހާއި ދެމެދު، 4،000 މީހުންނަށް ލާއިންސާނީ އަނިޔާތައް ދީފައިވަނީ ރަސްލާންގެ ބެލުމުގެދަށުން ކަމުގައި ސާބިތު ކޮށްދިނުމަށެވެ. އަދި އޭގެ ނަތީޖާއެއްގެ ގޮތުން 58 ގައިދީއަކު މަރުވެފައިވާ ކަމަށްވެސް ރަސްލާންއައި ދެކޮޅަށް ވަކާލާތު ކުރަމުން ޕްރޮސެކިއުޓަރުން ޝަރީޢަތުގައި ބުނެފައި ވެއެވެ.
ރަސްލާން ވަނީ ސީރިއާގެ ރައީސް ބައްޝާރުލް އަސަދުގެ ވެރިކަމުގައި، މިހާރުވެސް އެގައުމުގައި ކުރިޔަށްދާ އަހުލީ ހަގުރާމަ ފެށިގެން އައި ދުވަސްވަރު، އޭރު ހިގި މުޒާހިރާތައް ވަރަށް އަނިޔާވެރިކޮށް އެގައުމުގެ ސިފައިން ރޫޅާލިއިރު، އަސްކަރިއްޔާގެ ކާނަލެއްގެ ގޮތުގައި މަސައްކަތް ކޮށްފައެވެ.
އޭނާވަނީ ސީރިއާގެ ސީކްރެޓް ސާވިސްގައި 18 އަހަރު މަސައްކަތް ކޮށްފައެވެ. އަދި އެ މުއްދަތުގައި އޭނާވަނީ، އެކި ރޭންކުތަކުން ކުރި އަރަމުން އައިސް، އެގައުމުގެ ޑޮމެސްޓިކް އިންޓެލިޖެންސް އިންވެސްޓިގޭޝަން ސާވިސްގެ އެންމެ އިސްވެރިޔާގެ މަގާމް އޭނާ އަދާ ކޮށްފައި ވާކަމުގައި، އޭނާގެ ޝަރީއަތް ފެށުމުގެ ގޮތުން އޭނާގެ މައްސަލަ ތަހުގީގްކުރި ޖާމަނީގެ އިންވެސްޓިގޭޓަރު ކޯޓުގައި ވިދާޅުވެފައި ވެއެވެ.
ޕްރޮސެކިއުޓަރުން ބުނެފައިވާ ގޮތުގައި އޭނާގެ ބެލުމުދަށުން، ރޭޕް ކުރުމާއި، ޖިންސީ އަނިޔާ ދިނުމާއި، ކަރަންޓު ޝޮކް ޖެއްސުމާއި، ތަޅާ އަނިޔާ ކުރުމާއި، އަދި ގައިދީން ނިދިން މަހުރޫމު ކުރުވުންފަދަ ޖަރީމާތައް ހިންގާފައިވާ ކަމުގައެވެ.
ރަސްލާންވަނީ، އޭނާގެ ވަޒީފާ ދޫކޮށް 2012ވަނަ އަހަރު ސީރިއާވެދް ދޫކޮށް، 2014ވަނަ އަހަރު ޖަމަނީގެ ހިމާޔަތަށް އެދިފައެވެ. އަދި އޭނާ ހައްޔަރު ކޮށްފައިވަނީ 2019ވަނަ އަހަރުއެވެ.
ފާއިތުވެދިޔަ ހަފްތާގައި ކޯލްންޒުގެ ކޯޓުގައި، ރަސްލާންގެ ގާނޫނީ ވަކީލުންވަނީ، އެމީހުންގެ މުވައްކިލު އޭނާ އަމިއްލައަށް އެއްވެސް މީހަކަށް އަނިޔާ ކޮށްފައި ނުވާކަމަށް ބުނެ އޭނާ ދޫކޮށްލުމަށް އެދިފައެވެ.
ޕްރޮސެކިއުޓަރުން ރަސްލާންގެ ޝަރީއަތް ޖާމަނީގައި ކުރިޔަށް ގެންދިއުމުގެ ފުރުސަތު ހޯދާފައިވަނީ، ޖާމަނީގެ ޔުނިވާރސަލް ޖުރިސްޑިކްޝަން ގާނޫނުތައް މެދުވެރި ކޮށްގެންނެވެ. މިގާނޫނުތައް ބުނާ ގޮތުން، ދުނިޔޭގެ ކޮންމެތަނެއްގައި ހިނގިނަމަވެސް، އިންސާނިއްޔަތާއި ޚިލާފު ޖަރީމާތައް ކުރިޔަށް ގެންދިއުމުގެ ފުރުސަތު ޖަރުމަނުގެ ކޯޓުތަކަށް ލިބިގެން ވެއެވެ.
