އެއްފަސްކުރުމުގެ ހައްލަކަށް އަދިވެސް އޮތީ މާލެ އާއި މާލެ ސަރަހައްދު ކަމުގައި ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރާއްޖެ އެއްފަސް ކުރުމަށް އޮތް ސިޔާސަތާއި ގުޅޭގޮތުން ތަފްސީލީ ގޮތެއްގައި ޗެނަލް-13ގައި ވާހަކަ ދައްކަވަމުން ރައީސް ޔާމީން ވިދާޅުވީ މާލެ ރަހައްދަކީ މިހާރުވެސް ޖާގަ އޮތް ރާއްޖޭގެ ގިނަ އަދަދެއްގެ ބަޔަކު މިހާރުވެސް ދިރި އުޅެމުންދާ ސަރަހައްދު ކަމަށެވެ. މިސަރަހައްދުގައި އިންސާނީ ވަސީލަތާއި، އެނޫން ވަސީލަތްތައްވެސް ހުރުމުން މިސަރަހައްދު އަދިވެސް އެފަސްކުރުމަށް އެންމެ ރަނގަޅު ސަރަހައްދަކަށް ބެލުމަކީ އެންމެ ރަނގަޅު ގޮތްކަމަށެވެ.
ރައީސް ޔާމީން ވިދާޅުވީ، ރާއްޖޭގެ އެހެން ބައެއް ސަރަހައްދުތަކުގައި އެއްފަސްކުރި ނަމަވެސް ދިމާވެފައިވާ އެންމެ ބޮޑު މައްސަލައަކީ ވަސީލަތްތައް ނެތުންކަމަށެވެ. އާންމު މުޖުތަމައަކަށް ބޭނުންވާ ހުރިހާ ވަސީލަތެއް މާލެ ސަރަހައްދުގައި ހުރި ފެންވަރަށް ގެންދެވުމަކީ އަދި އަހަރުތަކެއް ހޭދަވާނެ ކަމެއްކަމަށެވެ. ވަކިވަކި ރަށްތަކުން މިސާލު ނަންގަވަމުން ރައީސް ޔާމީން ވިދާޅުވީ، އައްޑޫ ސިޓީއާއި، ކުޅުދުއްފުއްޓާއި، ތިނަދޫފަދަ ތަންތަނުގައިވެސް އެންމެ ބޭނުންވާ މިންވަރަށް ވަސީލަތް ނެތުމަކީ އެރަހައްދުތަކުގެ އެންމެ ބޮޑު ޝަކުވާކަމަށެވެ.
މިކޮޅުގަ އެއްފަސްކޮށްގެން މީހުންނަށް ނޫޅެވޭ ވަރަކަށް އަދި ފުރިގެންނެއް މާލެ ސަރަހައްދު ދާނެ ކަމަކަށް ގަބޫލެއް ނުކުރަން. އެއްފަސްކުރުމުގެ ހައްލަކަށް އަދިވެސް މި ބަލަނީ މާލެ އާއި މާލެ ސަރަހައްދު.
– ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ މާލެ ސަރަހައްދު އެފަސްކޮށް، އަދިވެސް މީހުންނަށް ދިރިއުޅެވޭނެ އެތަކެއް ޖާގަތަކެއް ތަނަވަސް ކޮށްދެވޭނެ ކަމަށެވެ. ނަމަވެސް އެކަން ކުރުމުގެ އިހުލާސްތެރި ނިޔަތެއް އޮންނަން ޖެހޭކަމަށެވެ. ކޮންމެ ވެރިއަކުވެސް ވެރިކަމަށް އަންނަނީ ފަސް އަހަރުގެ ދައުރަކަށް އެދައުރުގައި ކުރެވޭނެ ވަރުގެ ކަންތައްތަކެއް ހިފައިގެން ކަމަށްވާއިރު، 20، ނުވަތަ 30 އަހަރުން ނިންމޭ ކަންކަން ހިފައިގެން އެއްވެސް ސިޔާސީ ލީޑަރު ނާންނާނެކަމަށެވެ.
ސިޔާސީ މީހުންނަކީވެސް ސިޔާސީ ކަންކަމުގައި އެދުން ބޮޑު ބަޔަކަށްވާއިރު، ސިޔާސީ ގޮތުން ކުރެވޭ ކަންކަމަކީ އެކަމުން އޭމީހެއްގެ މުސްތަގުބަލާއިވެސް ބިނާވާ ކަންތައްތަކެއް ކަމަށް ޔާމީން ވިދާޅުވިއެވެ. އަދި އެމަނިކުފާނުގެ ފަސްއަހަރުގައި މަސައްކަތް ކުރައްވާފައިވަނީ ދިވެހި ރައްޔިތުންނަށް އެކަމުން މަންފާ ލިބޭނެ ގޮތަށް ކަމަށް ރައީސް ޔާމީން ވަނީ ވިދާޅުވެފައެވެ.
