ފަލަސްތީން އޮތޯރިޓީ (PA)ގެ ރައީސް މަހުމޫދު އައްބާސް އިސްރާއީލުގެ ޑިފެންސް މިނިސްޓަރ ބެނީ ގާންޒްއާއި ބައްދަލު ކުރައްވާ މަޝްވަރާ ކުރައްވައިފިއެވެ. އިސްރާއީލަށް ވަޑައިގެން އެގައުމުގެ އިސް އޮފިޝަލުންނާ މިބީދައިން އައްބާސް ބައްދަލު ކުރުމަކީ މަދުން ނޫނީ ނުކުރައްވާ ކަމެކެވެ.
އިސްރާއީލުގެ ޑިފެންސް މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، "ދެބޭފުޅުން ސަލާމަތީ އަދި މަދަނީ ކަންކަަމާ ގުޅޭގޮތުން" މަޝްވަރާ ކުރައްވާފައިވާ ކަމުގައެވެ.
އައްބާސްއާއި ގާންޒް ބައްދަލު ކުރައްވާފައިވަނީ މެދުތެރޭ އިސްރާއީލުގެ ރޮޝް ހާޔިންގައި ހުންނަ ގާންޒްގެ ގޭގައެވެ.
"އިގްތިސާދީ އަދި މަދަނީ ކަންކަމުގައި އިތުބާރު އުފެއްދުމާއި ގުޅޭ ކަންކަމަށް އެއްބާރު ދިނުމަށް ބޭނުންވާކަމަށް ގާންޒްވަނީ އައްބާސްއަށް ދަންނަވާފަ،" އިސްރާއިލުގެ ޑިފެންސް މިނިސްޓްރީން ނެރުނު ބަޔާނުގައި ބުނެފައި ވެއެވެ.
މިއަހަރު އޮގަސްޓުމަހު ގާންޒްވަނީ، ހިފާފައިވާ ހުޅަގު އައްސޭރީގެ ރާމައްލާ ސިޓީގައި ހުންނަ ފަލަސްތީން އޮތޯރިޓީގެ ހެޑްކުއާޓަރަށް ވަޑައިގެން އައްބާސްއާއި ބައްދަލު ކުރައްވާފައެވެ. އަދި އެއީ ފަހަކަށް އައިސް ދެގައުމުގެ ދެމެދުގައި ބޭއްވިގެން މަތީ ފެންވަރުގެ މިފަދަ ފުރަތަމަ ބައްދަލުވުމެވެ.
އެހެންނަމަވެސް އެ މަޝްވަރާތަަކަށްފަހު އިސްރާއީލުގެ ބޮޑުވަޒީރު ނަފްތާލީ ބެނެޓް ވިދާޅުވެފައިވަނީ، ފަލަސްތީނާއެކީ ކުރިޔަށްދާ ސުލްހައިގެ އެއްވެސް މަޝްވަރާއެއް ނެތްކަމުގައެވެ. އަދި އެފަަދަ މަޝްވަރާއެއް ކުރިޔަށް އޮތް ތަނުގައި ނުވެސް އޮންނާނެ ކަމުގައެވެ.
ފަލަސްތީނުގެ ސިވިލް އެފެއަރޒް މިނިސްޓަރ ހުސެއިން އަލް ޝެއިޚް ޓުވީޓު ކުރައްވާފައިވާ ގޮތުގައި އަންގާރަ ދުވަހުގެ މި ބައްދަލުވުމުންވަނީ، "ބައިނަލް އަގުވާމީ ގާނޫނުތަކާއި އެއްގޮތްވާ ގޮތުގެމަތިން ސިޔާސީ ހައްލު ހޯދުމަށް، ރަގަޅު ސިޔާސީ މަސްރަހެއް އުފެއްދުމުގެ މުހިންމުކަމާއި ގުޅޭގޮތުން މަޝްވަރާ ކުރެވިފަ،" ކަމުގައެވެ.
President #Abbas met with Minister #Gantz, where they discussed the importance of creating a political horizon that leads to a political solution in accordance with international legitimacy resolutions https://t.co/bcY2bSPj6i
— حسين الشيخ Hussein Al Sheikh (@HusseinSheikhpl) December 29, 2021
އަލް ޝެއިޚް ވިދާޅުވެފައިވާ ގޮތުގައި ދެބޭފުޅުންވަނީ، އާންމު ރައްޔިތުންގެ އަމަލްތަކުގެ ސަބަބުން ދެފަރާތުގެ ދެމެދުގައި އުފެދިފައިވާ އުދާސްތަކަށް ހަމަޖެހުން ގެނައުމާ ގުޅޭގޮތުންނާއި، ސަލާމަތީ ގިނަ ކަންކަމާއި، އިގްތިސާދީ އަދި އިންސާނީ އެހީތެރިކަމާ ގުޅުންހުރި ގިނަ ކަންކަމާއި ގުޅޭގޮތުން މިބައްދަލުވުމުގަ މަޝްވަރާ ކޮށްފައެވެ.
އެމެރިކާއިން އިސްނަގައިން އެންމެ ފަހުން ފަލަސްތީނާއި އިސްރާއީލާ ދެމެދު ބޭއްވުނު ސުލްހައިގެ ވާހަކަތައް ނާކާމިޔާބުވެގެން ނިމުމަކަށް އައިސްފައިވަނީ 2014ވަނަ އަހަރުއެވެ.
ކޮމެންޓު ފޮނުވާ