ހިޔާ ފްލެޓްގެ ކުލި ނެގުން އިތުރު 3 މަސް ދުވަހަށް ފަސްކޮށްދެއްވުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ނިންމެވި ނިންމެވުމަކީ އެމަނިކުފާނުގެ އޯގަތެރިކަން ހާމަވެގެން ދިޔަ ކަމެއް ކަމުގައި ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
މިދިޔަ ސަރުކާރުގައި އަޅަން ފެށި ހިޔާ ފްލެޓްތަކުގެ މަސައްކަތް ނިންމާ، އެތަނުގައި މީހުން ދިރިއުޅެން ފަށާފައިވަނީ މިދިޔަ އޮގަސްޓްމަހުން ފެށިގެންނެވެ. މިހާތަނަށް 5000އަށްވުރެ ގިނަ އާއިލާވަނީ ހިޔާ ފްލެޓަށް ބަދަލުވެފައެވެ. ހިޔާ ފްލެޓްގެ ކުލި ނެގުން އިތުރު 3 މަސް ދުވަހަށް ފަސްކޮށްދެއްވުމަށް ރައީސުލްޖުމްހޫރިއްޔާ ނިންމެވިކަން އިއުލާން ކުރެއްވީ ރޭ ބޭއްވި ޖަލްސާގައެވެ.
ރައީސްގެ މިނިންމުން ނިންމެވީ އަދިވެސް ގިނަ ބަޔަކު ހިޔާ ފްލެޓްގެ ކުލި ދެއްކުމުގެ މުއްދަތު އިތުރު ކުރުމަށް އެދެމުން ދަނިކޮށެވެ. ރައީސްގެ މިނިންމުމާއި ގުޅިގެން އަހުމަދު ވިދާޅުވީ މިއީ ރައްޔިތުންގެ އަޑުއަހާ ރައްޔިތުންގެ ޝުއޫރުތަކަށް އިހުތިރާމްކުރާކަން ހާމަވެގެން ދިޔަ ނިންމުމެއް ކަމަށެވެ.
ހިޔާ ފްލެޓްތަކުގެ ކުލި ނަގަންފެށުން އިތުރު 3 މަސް ދުވަހަށް ފަސްކޮށްދެއްވަން ނިންމެވުމަކީ ރައްޔިތުންގެ އިޚުސާސްތަކަށް އިޚުތިރާމު ކުރައްވައި ނިންމެވި، އޯގާތެރި އެހާމެ ރަނގަޅު ނިންމެވުމެއް.
– އަހުމަދު އަބްދުﷲ ވިދާޅުވިއެވެ.
ހިޔާ ފްލެޓްތައް ހަވާލުކޮށްފައިވަނީ ފްލެޓްގެ ފިނިޝިންގް މަސައްކަތްތައް ނުނިންމައެވެ. މީގެތެރޭގައި ގޭގޭގައި މުށިޖެހުމާއި، ދޮރުތައް ހަރުކުރުމާއި، ކަރަންޓު ސާމާނު ހަރުކުރުންފަދަ މަސަކަތްތައް ހިމެނެއެވެ. ފިނިޝިންގް މަސައްކަތްތައް ނިންމުމަށް ފުރަތަމަ ދިނީ 3 މަސްދުވަހުގެ މުއްދަތެކެވެ. މި 3 މަސް ދުވަހުގެ މުއްދަތުގައި ކުލި ނުނެގުމަށް ސަރުކާރުން އޭރު ނިންމިއެވެ. ކަނޑައެޅި ތާރީޚަށްވުރެ ފްލެޓްތައް ހަވާލުކުރުން ލަސްވުމާއި، އަދި ފިނިޝިންގ މަސައްކަތްތަކަށް އިތުރު މުއްދަތު ބޭނުންވާތީ، މި މުއްދަތު ރައީސުލްޖުމްހޫރިއްޔާ ޑިސެމްބަރު މަހުގެ ނިޔަލަށް އިތުރުކޮށްދެއްވިއެވެ.
މިހާތަނަށްވެސް ހިޔާގެ ގިނަ ފްލެޓްތަކެއްގެ ފިނިޝިންގ މަސައްކަތް ނިމިފައި ނުވާތީ، މި މުއްދަތު އިތުރު 3 މަސް ދުވަހަށް އިތުރުކޮށްދެއްވުމަށް ސަރުކާރުން ނިންމަވާފައިވާކަން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް މިހާރު މިވަނީ އިޢުލާންކޮށްފައެވެ. ރައީސުލްޖުމްހޫރިއްޔާ ވިދާޅުވީ ސަރުކާރުން އަބަދުވެސް މަސައްކަތް ކުރައްވަނީ ރައްޔިތުންގެ އަޑު އަހާ ރައްޔިތުން އެދޭގޮތަށް ކަންކަން ފުރިހަމަކޮށްދެއްވުމަށްކަމަށެވެ. މި ނިންމުމަކީ މި ސިޔާސަތުގެ ދަށުން ހިޔާގެ ރަށްވެހިންގެ އަޑު އަހާ، ހިޔާ ފްލެޓަށް ބަދަލުވާ މީހުންނަށް ދަތިތައް ޙައްލުކޮށްދެއްވުމަށް ނިންމި ނިންމުމެއްކަމަށެވެ.
ހިޔާ ހައުސިންގ ޔުނިޓްތައް ފުރަތަމަ ތަރައްޤީކުރީ 7000 ހައުސިންގ ޔުނިޓާއެކުއެވެ. ނަމަވެސް މިއަދަދު ފަހުންވަނީ، ފްލެޓްގެ ގްރައުންޑް ފްލޯގެ ފްލެޓްތައް އުނިކޮށް 6720 ހައުސިންގ ޔުނިޓަށް ބަދަލުކޮށްފައެވެ. މިގޮތަށް ނިންމާފައިވަނީ ފްލެޓްތަކުގެ ތިރީގައި އާއްމު ޚިދުމަތްތައް ޤާއިމުކުރުމަށް ސްލޮޓްތައް ދޫކުރުމަށެވެ.
