އެންޓި-ކޮރަޕްޝަން ކޮމިޝަން، އޭސީސީގެ މެމްބަރުން ވަކިކުރުމަށް މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ.
އޭސީސީގެ މެންބަރުން ވަކިކުރުމަށް ގޮތެއް ނިންމުމަށް ބޭއްވި ކޮމިޓީގެ ބައްދަލުވުމުގައި ކޮމިޓިގެ ގިނަ މެންބަރުން ވަނީ އޭސީސީއަށް ޖަވާބު ދާރީވުމަށް ދިން ފަސް ދުވަހުގެ މުހުލަތު ހަމަވިފަހުން ކޮމިޓީއަށް ޖަވާބުދާރީވެފައިވާކަމަށެވެ. އަދި އޭސީސީގެ މެންބަރުން ކޮމިޓީއަށް ފޮނުއްވާފައިވާ ޖަވާބުގައި ފާހަގަކޮށްފައިވާ ގިނަ ކަންކަމަކީ މީގެ ކުރިންވެސް ކޮމިޓީއާއި ހިއްސާކޮށްފައިވުމުން، އެ މައްސަލަތަކަށް ގިނަ ހައްލުތަކެއް ހޯދައިދީފައިވާކަންކަމަށް މެންބަރުން ފާހަގަކުރެއްވިއެވެ. މިގޮތުން އޭސީސީއަށް އޮތް މުވައްޒަފުންގެ ދަތިތަކާއި، ބަޖެޓްގެ ދަތިކަމާއި، ޕީޖީއާމއދު އޮތް ނުތަނަވަސްކަމުގެ ވާހަކަތައް މެންބަރުން ފާހަގަކުރެއްވިއެވެ.
ކޮމިޓީގެ މެންބަރުންވިދާޅުވީ އޭސީސީއަށް އައު މެންބަރުން ލެއްވިތާ 2 އަހަރާއި ބައި ފާއިތުވެގެން ދިޔައިރު ޖަވާބުދާރީވުމަށް އެކަށީގެންވާ ވަގުތު ދެވިފައިވާކަމަސެވެ. މިގޮތުން 9 ފަހަރެއްގެ މަތިން އޭސީސީގެ މެންބަރުން ކޮމިޓީއަށް ހާޒިރުކުރުމުން، އެ ކޮމިޝަންގެ މައްސަލަތައް ނިންމަން ކަނޑައަޅާފައިވާ މުއްދަތުތަކާއި މައްސަލަތައް ކޮމިޓީއާއި ހިއްސާކުރިނަމަވެސް ކޮމިޓީން އެ މައްސަލަތައް ނިންމަންދިން މުއްދަތުގައިވެސް އެކަށީގެންވާ ކުރިއެރުންތަކެއް ކޮމިޝަނަށް ހޯދިފައިނުވާކަމަށް ކޮމިޓީގެ ގިނަ މެންބަރުން ފާހަގަކުރެއްވިއެވެ.
އޭސީސީގެ މެންބަރުން ވަކިކުރުމަށް ކޮމިޓީގެ ބައްދަލުވުމުގައި އިނގުރައިދޫ ދާއިރާގެ މެންބަރު ޙަސަން އަޙްމަދު ހުށައެޅުއްވި ހުށައެޅުމަށް ތާޢީދުކުރެއްވީ ބިލަތްދޫ ދާއިރާގެ މެންބަރު އަޙްމަދު ހަލީމްއެވެ. އަދި އެގޮތަށް ފާސްވީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި 8 މެންބަރުންގެ ތެރެއިން 5 މެންބަރުންގެ އަޣްލަބިއްޔަތުންނެވެ.
އޭސީސީގައިމިހާރުޔ ތިއްބެވި ތިން މެންބަރުން ވަކިކުރުމަށް ކޮމިޓީން ފާސްކޮށްފައިވާއިރު، އެ ތިން މެންބަރުންނަކީ ކޮމިޝަނުގެ ރައީސް މަރިޔަމް ޝިއުނާއާއި، ނާއިބު ރައީސް ފާޠިމަތު އަނޫލާގެ އިތުރުން މެންބަރު ޢާއިޝަތު ޢަބްދުﷲ އެވެ. އޭސީސީގެ މެންބަރުން ވަކިކުރުމުގެ މަސައްކަތް މަޖިލީހުން ފަށާފައިވަނިކޮށް އެކޮމިޝަންގައި ހިމެނިވަޑައިގަންނަވާ 2 މެންބަރަކު ވަނީ އިސްތިއުފާ ދެއްވާފައެވެ. އެއީ އިބްރާހީމް ޝަކީލް އާއި އަލީ އަޝްރަފް އެވެ.
