އުތުރު ތިލަފަޅުގެ އެއްބަސްވުން ދިވެހި ރައްޔިތުންނަށް ހާމަކޮށް، އެގްރީމަންޓު ބާތިލު ކުރުމަށް މޯލްޑިވްސް ނޭޝަނަލް ޕާޓީ އެމްއެންޕީގެ އަންހެނުންގެ ގޮފީގެ ރައީސާ އަދި ކުރީގެ ފޮރިން މިނިސްޓަރ ދުންޔާ މައުމޫން ގޮވާލައްވައިފިއެވެ.

މިސަރުކާރުން އިންޑިއާއާއި ގާތްގުޅުމެއް ބާއްވައި، ހަދަމުންދާ އެއްބަސްވުންތަކާއި، އިންޑިއާގެ ގިނަ އަދަދެއްގެ އަސްކަރީ ސިފައިން ރާއްޖޭގައި ތިބި ތިބުމާއުމާއިމެދު ކަންބޮޑުވުން ފާޅު ކުރައްވައި ދުންޔާ ޓުވިޓާގައި ހިއްސާ ކުރެއްވި ވީޑިއޯގައި ވިދާޅުވީ އެއްވެސް ޤައުމެއްގެ ސިފައިން ދިވެހި ފަސްގަނޑުގައި ތިބުމަކީ އެމްއެންޕީން ތާއީދު ކުރާނެ ކަމެއް ނޫންކަމަށެވެ. އެމްއެންޕީގެ ޚާރިޖީ ސިޔާސަތަކީ ހަމަހަމަ ކަމާއިއެކު ހުރިހާ ޤައުމަކާއިއެކު ގުޅުން ގާއިމް ކުރުންކަމަށާއި، އެސިޔާސަތުން ބޭރުން ކަންކަން ހިނގާނަމަ ނުރަނގަޅު ނަތީޖާތަކެއް ފެނިގެން ދާނެކަމަށެވެ.

ވަކި ޤައުމަކަށް މުޅިން ބަރޯސާ ވުމަކީ ރަނގަޅު ކަމެއްނޫން! އެމްއެންޕީގެ ޚާރިޖީ ސިޔާސަތަކީ ވަރަށް ބެލެންސް ސިޔާސަތެއް! މި ސަރުކާރަށް ޔޫޓީއެފް އެގްރީމަންޓް ހާމަ ކުރުމަށް އަދި ހުއްޓުވުމަަށް އަޅުގަނޑު ގޮވާލަން.

– ދުންޔާ ވިދާޅުވިއެވެ.

ދުންޔާ ވިދާޅުވީ ދިވެހި ރައްޔިތުންގެ ހިތުގައި މިއަދު އިންޑިއާއާއި، ސަރުކާރާއި ދެމެދު ވެފައިވާ އެއްބަސްވުންތަކުގެ ހަގީގަތް ހާމަކުރުމަށް ކެނޑިނޭޅި ގޮވަމުންދާއިރުވެސް ސަރުކާރުން އެކަމަށް އިޖާބަ ނުދިނުމަކީ ހިތާމަ ހުރިކަމެއްކަމަށެވެ. ސަރުކާރުން ބޭނުން ވެގެން އެހެން ޤައުމުތަކާއިއެކު ހެދޭ އެއްބަސްވުންކާއި، ހަވާލު ކުރެވޭ މަޝްރޫޢުތަކަކީ އެކަމުގެ ހަގީގަތް ދިވެހި ރައްޔިތުންނަށް އެގެންޖެހޭ ކަމެއްކަމަށާއި، ޚާއްސަކޮށް، ސަލާމަތާއި ގުޅުންހުރި ކަންކަމުގެ ހަގީގަތް ދިވެހި ރައްޔިތުންނަށް ސާފުވާންޖެހޭކަމަށެވެ.

އެއްވެސް ޤައުމެއްގެ އަސްކަރިއްޔާ ދިވެހި ފަސްގަނޑުގައި ތިބުމަކީ އަޅުގަނޑުމެން ގަބޫލުކުރާނެ ކަމެއްނޫން. މިޒަމާނުގައި ޤައުމެއްގެ ދަށުވާނީ ހަމައެކަނި އަސްކަރިއްޔާ ތިބެގެންނޫން. ހަމައެކަނި އެއްޤައުމަކަށް ހުރިހާ ކަމަކަށް ބަރޯސާވެ، ލޯނު ނެގުން ތަރައްޤީގެ މަޝްރޫޢު ހިންގުން، ހަމައެކަނި އެޤައުމަކަށް އަޅުގަނޑުމެން ބަރޯސާވަންޏާ، އެއީ މައްސަލައެއް. ޔޫޓީއެފް އެގްރީމަންޓުގެ އެއްވެސް މަޝްވަރާއެއްގައި އަޅުގަނޑުގެ ޚާރިޖީ ވަޒީރުކަމުގައި ބައިވެރިވެފައި ނުވާނެ. މިކަމުގައި އަޅުގަނޑަށް އެބަފެނޭ އެކި ސަރުކާރުތަކުން، އެއްސަރުކާރު އަނެއްސަރުކާރުގެ ބޮލުގައި މިމައްސަލަ އަޅުވަން އުޅޭތަން. އަޅުގަނޑު ދަންނަވާލަން ބޭނުންވަނީ މިސަރުކާރަށް މީގެ ތަފްސީލް ހާމަކުރައްވާށޭ. ދިވެހި ރައްޔިތުން އެދޭކަމެއް ނޫންކަމަށް ވަންޏާ، މިހާރުން މިހާރަށްވެސް މިކަން ހުއްޓުވޭނެ. މިސަރުކާރުން ބޭނުން ނުވާ އެއްވެސް އެގްރީމަންޓެއް އެއްވެސް މަޝްރޫއެއް އެހެން ޤައުމަކަށް ހިންގާކަށް ނުއެއްޖެހޭ.

– ދުންޔާ ވިދާޅުވިއެވެ.

Vaki gaumakah mulhin barosa vumakee rangalhu kameh noon! MNP ge khaarijee siyaasathu akee varah balanced siyaasatheh! Mi sarukaarah UTF agreement haama kurumah adhi huttuvumah alhugandu govaalan! @MNP_Secretariat @nazim7878 pic.twitter.com/MhTsLId7ja

— Dunya Maumoon (@dunyamaumoon) December 21, 2021

ރައްޔިތުންގެ މަޖިލީހުގެ 241 ކޮމެޓީގައި ވާހަކަ ދައްކަވަމުން މިނިސްޓަރ މާރިޔާ ވިދާޅުވީ ސަރުކާރު ބަދަލުވީ ނަމަވެސް، ރާއްޖޭގެ އަސްކަރިއްޔާއާއި އިންޑިއާގެ އަސްކަރިއްޔާއާ ދެމެދު އާކަމެއް ނުކުރެވޭ ކަމަށެވެ. މިހާރުވެސް މަސައްކަތް ކުރިއަށްދަނީ 2016ވަނަ އަހަރު އެކުލަވާލި އެކްޝަން ޕްލޭނާ އެއްގޮތަށް ހެދިފައިވާ އެއްބަސްވުންތަކެއްގެ ދަށުންކަމަށެވެ.

މިނިސްޓަރ ވިދާޅުވީ ދައުލަތެއްގެ ގޮތުގައި ދިފާއީ ގުޅުން ތަރުތީބުކުރެވުނީ 2016ވަނަ އަހަރު އެކްޝަން ޕްލޭންގައި ސޮއިކުރުމުން ކަމަށެވެ. އަދި މިއީ ކުރެވުނު ވަރަށް މުހިންމު ކަމެއްކަމަށާ، މިއާއެކު ހަރުދަނާ ގޮތެއްގައި ޤައުމުތަކާއެކު މިފަދަ އެއްބަސްވުންތައް ހެދުމަށް ފަސޭހަ ވެގެން ދިޔަކަމަށްވެސް މިނިސްޓަރ މާރިޔާ ވިދާޅުވިއެވެ. އިންޑިއާގެ އެހީތެރިކަމާއިއެކު ރާއްޖޭގައި ބަނދަރުތަކެއް ހަދައި، އެތަންތަނުގެ މަރާމާތާއި އެނޫން ކަންކަން ބެލެހެއްޓުމަށް ކުރީގެ ޑިފެންސް މިނިސްޓަރުންގެ ގޮތުގައި މަސައްކަތް ކުރެއްވި މިހާރުގެ ދަނގެތި ދާއިރާގެ މެމްބަރު މުހައްމަދު ނާޒިމާއި، މަޑުއްވަރީ ދާއިރާގެ މެމްބަރު އާދަމް ޝަރީފްވެސް މަޝްވަރާ ކުރައްވާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރާއްޖޭގެ މިނިވަންކަމާއި ސިޔާދަތު ހިފެހެއްޓުމަކީ ސަރުކާރުން ކަށަވަރު ކުރާނެ ކަމެއްކަމަށެވެ. އަދި އެފަދަ ކުޑަ ޖާގައެއްވެސް ލިބޭނެ ކަމެއް މިސަރުކާރުން ނުކުރައްވާނެކަމަށެވެ. ނަމަވެސް އިދިކޮޅު ޕްރޮގްރެސިވް ކޯލިޝަނުން ދަނީ މިއެއްބަސްވުންތަކަކީ ޤައުމީ ސަލާމަތަށް އޮތް ބޮޑު ނުރައްކަލެއްކަމަށް ބުނެ މުޅި ރާއްޖޭގައި "އިންޑިއާ އައުޓް" ގެ ބޮޑު ކެމްޕެއިނެއް ހިންގަމުންނެވެ. ސަރުކާރުން ވަނީ މިކަން ހުއްޓުވާނެކަމުގެ އިންޒާރުވެސް މިހާރު ދީފައެވެ.