ރާއްޖޭގައި ބާއްވާ އެންމެ ޝަރަފްވެރި ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ފައިނަލަށް އެފްއެސްއެމް އަދި އާރްއާރްސީ ދަތުރުކޮށްފިއެވެ.
މި މުބާރާތުގެ ފައިނަލަށް އެފްއެސްއެމް ދަތުރުކުރީ ސެމީ ފައިނަލުގެ ފުރަތަމަ މެޗުގައި ރޭ ޕްރިޒަން ކްލަބްގެ މައްޗަށް 1-2 ގެ ނަތީޖާއަކުން ކުރި ހޯދައިގެންނެވެ. އާރްއާރްސީ ފައިނަލަށް ދަތުރުކުރީ ސެމީގެ ދެވަނަ މެޗުގައި ފެނަކަ އާއި ވާދަކޮށް ޕެނަލްޓީ ޖަހައިގެން އެޓީމު ބަލިކުރުމަށްފަހުއެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމުވެސް ވަނީ 3-3 ގެ ނަތީޖާއަކުން އެއްވަރުވެފައެވެ. އެހެންކަމުން ޕެނަލްޓީގައި އާރްއާރްސީން ފެނަކަ ބަލިކުރީ 3-6 ގެ ނަތީޖާއަކުންނެވެ.
އެފްއެސްއެމް އާއި ޕްރިޒަން ކްލަބް ބައްދަލުކުރި ސެމީގެ ފުރަތަމަ މެޗު ފަށައިގެން ލަނޑު ޖަހާ ލީޑު ނެގީ އެފްއެސްއެމުންނެވެ. މި ލަނޑު ކާމިޔާބުކޮށްދިނީ، މުހައްމަދު ތޯހިރުއެވެ. ނަމަވެސް އޭގެ އިރުކޮޅެއް ފަހުން ޕްރިޒަން ކްލަބުން ވަނީ ލަނޑެއް ޖަހާ ނަތީޖާ ހަމަހަމަކޮށްފައެވެ. މި ލަނޑު ޕްރިޒަން އަށް ކާމިޔާބުކޮށްދިނީ، އާދަމް މަންސޫރެއެވެ. މެޗުގައި ދެވަނަ ފަހަރަށް އެފްއެސްއެމް އަށް ލީޑު ނަގައިދިން ލަނޑު ކާމިިޔާބުކޮށްދިނީ، ނާއިފް ޝަފީގްއެވެ.
ސެމީގެ ދެވަނަ މެޗުގައި ރޭ ބައްދަލުކުރީ ފެނަކަ އާއި ރޯޑް ރެކްރިއޭޝަން ކްލަބެއެވެ. މި މެޗު ފަށައިގެން ތިންވަނަ މިނެޓުގައި އާރްއާރްސީގެ އަބްދުﷲ މިދުހަތު ފަހުމީ ވަނީ ލަނޑު ޖަހާ އެޓީމަށް ލީޑު ނަގައިދީފައެވެ. އާރްއާރްސީން ލީޑު ފުޅާކުރީ ފެނަކައިގެ ރިހާމް އަބްދުލް ގަނީ އަތުން ބައިކޮޅަށް ވަން ލަނޑުންނެވެ. އާރްއާރްސީން ދެ ލަނޑު ޖެހިފަހުން ފެނަކައިގެން ޔަސްފާދު ހަބީބް ވަނީ ލަނޑެއް ޖަހާ ނަތީޖާގެ ފަރަގު ކުޑަކޮށްފައެވެ.
މެޗުގެ ދެވަނަ ހާފް ފަށައިގެން އާރްއާރްސީގެ މިދުހަތު ވަނީ އެޓީމުގެ ތިންވަނަ ލަނޑު ޖަހާ ލީޑު ފުޅާކޮށްފައެވެ. ނަމަވެސް މެޗު ނިމެން ކައިރިވެފައިވަނިކޮށް ފެނަކައިގެ ޔަސްފާދު ހަބީބް ވަނީ ފުލުފުލުގައި ދެ ލަނޑު ޖަހާ މެޗުގެ ނަތީޖާ ހަމަހަމަކޮށްފައެވެ.
އެހެންކަމުން ނަތީޖާ ނެރުމަށް ޖެހުނީ ޕެނަލްޓީ ޖަހާށެވެ. ޕެނަލްޓީގައި ފެނަކައިގެ މައްޗަށް އާރްއާރްސީން ކުރިހޯދާ ފައިނަލުގެ ފަހު ޖާގަ ވަނީ ކަށަވަރުކޮށްފައެވެ.
އާރްއާރްސީ އާއި އެފްއެސްއެމް ކުޅޭ ފައިނަލް އޮންނާނީ އާދިއްތަ ދުވަހުގެރޭގައެވެ.
