ބަވަނަ ވެފައިވާ ދުނިޔޭގައި، ދޭދޭ ގައުމުތަކުގެ ގުޅުމަކީ، ނުވަތަ ޑިޕްލޮމަސީއަކީ އަބަދުވެސް އެގައުމުތަކުގެ ތަރައްގީއާއި، އަދި ހަމަޖެހުމާއި ސުލްހަ މަސަލަސްކަމުގެވެސް އެންމެ މުހިންމު އެއް ބަހާއެވެ. މިގޮތުން، ދުނިޔޭގެ އެކިކަންކޮޅުތަކަށް ބަލާއިރު، ދުނިޔޭގެ ކުރިއަރާފައިވާ ގައުމުތައް ކުރި އަރައިގެން ދިޔަތަން ފާއިތުވެދިޔަ ކައިރި މާޒީތަކުގައި ފެނިގެން ގޮސްފައިވަނީ، އެގައުމުތައް ޑިޕްލޮމަސީގެ މަގުން ހުޅުވާލާ، އަދި އެކުވެރި ދައުލަތްތަކާއެކީ ކުރި ވިޔަފާރިއާއި އަދި ސަލާމަތާއި ގުޅުންހުރި މުޢާމަލާތްތަކުގެ މައްޗަށްކަން ވަރަށްވެސް ރަގަޅަށް ފެންނާން އެބައޮތެވެ.
މިސާލެއްގެ ގޮތުން، މިއަދު ދުނިޔޭގަ އޮތް އެންމެ ނުފޫޒުގަދަ ގައުމު އެމެރިކާ ފުދެއެވެ. ފާއިތުވެދިޔަ ބައި ގަރުނެއްހާ ދުވަހުގެ ތެރޭގައި އެގައުމުން ބައިނަލް އަގުވާމީ މަސްރަހުގައި ނުފޫޒާއި ބާރު ދަމަހައްޓަމުން އައިސްފައިވަނީ ހަމައެކަނި އެގައުމުގެ އަސަކަރީ ބާރުގެ ބޭނުން ކޮށްގެނެއް ނޫނެވެ. އަދި އަމުދުން އެމެރިކާގެ އަސްކަރީ ބާރަކީ، ބައިނަލް އަގުވާމީ މަސްރަހުގައި އެގައުމުގެ ނުޒޫފު ދެމެހެއްޓުމަށް އޮތް ހަމަ އެކަނި ވަސީލަތް ނޫންކަންވެސް މާޒީގައި އެންމެ ރަގަޅަށް ތަޖުރިބާ ކޮށްފައިވާ ގައުމަކީވެސް އެމެރިކާއެވެ. މިގޮތުން، ފާއިތުވެދިޔަ އަހަރުތަކުގައި އެމެރިކާއިން ކޮށްފައިވާ ހުރިހާ ބޮޑެތި ހަގުރާމަތަކުގައިވެސް، ހަގުރާމައިގެ މައިދާނުގައި ސަފުތައް ރުކުރުވާލުމުގެ ކުރިން އެގައުމުންވަނީ، އެހެނިހެން ގައުމުތަކާއެކީ ކޯލިޝަންތައް ގާއިމްކޮށް، ހަގުރާމާގައި ރަސްމީގޮތުން ގިނަ ގައުމުތައް ބައިވެރި ކޮށްފައެވެ.
އެމެރިކާއިން އިރާގާ ދެކޮޅަށް ކުރި ދެހަގުރާމައާއި، އަދި ފަހުން އަފްއާނިސްތާނަށް އަރާ އެގައުމުގެ އަމިއްލަ މަސްލަހަތު ރައްކާތެރި ކުރުމުގައިވެސް، 20 އަހަރުގެ ދިގު ހަގުރާމައެއް ކޮށްފައިވަނީ، ނޭޓޯ ފަދަ ޖަމާއަތްތައް ރަސްމީކޮށް ހަގުރާމާގައި ބަރިވެރިކޮށް، ގިނަ ގައުމުތަކުގެ އެހިތެރިކަން ހޯދައިގެންނެވެ.
ހަމަ އެފަދައިން، ބައިނަލްއަގުވާމީ މަސްރަހުގައި ހިގަމުންދާ ހުރިހާ ހަމަ ނުޖެހުންތަކުގައިވެސް، ދޭދޭ ގައުމުތަކުން ބޮޑެތި މައްސަލަތަކުގައި ކާމިޔާބު ހޯދުމަށް މައްސައްކަތް ކުރަމުންދަނީ، މިއުސޫލުގެ މަތިން، ޑިޕްލޮމަސީ ކުރިޔަށް ނެރެގެންކަން ފާހަގަވާން އެބައޮތެވެ. އެމެރިކާއާއި ޗައިނާ އަދި ރަޝިއާގެ މެދުގައި ހިގަމުންދާ ދެބަސްވުންތަކުގައި ފެންނާން އޮތް ހަގީގަތަކީ، އެމެރިކާގެ ނުފޫޒު ކުޑަކުރުމަށް ބައިނަލް އަގުވާމީ ގިނަ މައްސަލަތަކުގައ ޗައިނާއާއި ރަޝިއާ އެއްގަލަކަށް އަރަމުންދާ މަންޒަރެވެ. އިރާނުގެ ނުފޫޒު މެދުއިރުމަތީގައި ކުޑަ ކުރުމަށްޓަކާ ފެންނާން އޮތީ، ސައުދީ އަރަބިއާއި އަދި ސައުދީ އަރަބިއާގެ އެކުވެރި ގައުމުތަކުން އެމެރިކާއާއި ބައިއަތު ހިފަމުންދާ މަންޒަރެވެ.
އެހެންކަމުން، ގައުމުތަކުގެ ނުފޫޒާއި ބާރުގެ ތިލަފަތަށް ބެލި ކަމުގައިވި ނަމަވެސް، އަދި ބޮޑެތި އިންވެސްޓަމްޓްތައް ގައުމަށް ގެނެސް، ތަރައްގީއާއި ތަމައްދުނުގެ ރޮގުން ހޯދަންޖެހޭ ކުރިއެރުމަށް ބެލިކަމުގައިވި ނަމަވެސް، ދޭދޭ ގައުމުތަކުގެ ގުޅުމަކީ، ނުވަތަ ޑިޕްލޮމަސީއަކީ، މިކަންކަމުގެ ނުހަނު މުހިންމު އަސާސެއްގެ ގޮތުގައި ފެންނާން އެބައޮތެވެ.
ހުރިހާ ގައުމެއްގެވެސް މިތުރެއްގެ ގޮތުގައި އޮތުން! ރާއްޖޭގެ ޒަމާންވީ ޚާރިޖީ ސިޔާސަތު!
ބައިނަލް އަގުވާމީ ޑިޕްލޮމަސީގައި ކޮންމެ ގައުމުކުންވެސް ސިޔާސަތު ބައްޓަން ކޮށްފައިވަނީ އެގައުމެއްގެ ހާލަތާއި ގުޅޭގޮތުންނެވެ. އަދި އެއްގައުމު އަނެއްގައުމަކަށް ފޯރުކޮށްދޭ އެހީތެރިކަންވެސް ބައްޓަން ކޮށްފައި އޮންނަނީ ސީދާ މިގުޅުމުގެ މައްޗަށެވެ.
މިގޮތުނ ބަލާއިރު، ޒަމާނުއްސުރެ ރާއްޖެއިން ދަމަހައްޓާފައިވާ ޚާރިޖީ ސިޔާސަތެއް ފެންނާން އެބައޮތެވެ. އެއީ ވަކި ފަރާތަކަށް ނުޖެހޭ ޚާރިޖީ ގުޅުމުގެ ސިޔާސަތެވެ. ރައީސް މައުމޫނުގެ ދައުރުގައި ބިންގާއެޅި، އޭރުގެ ޚާރިޖީ ވަޒީރު ފަތުހުﷲ ޖަމީލް ތަންފީޒު ކުރެއްވި މި ސިޔާސަތުގެ އެންމެ މުހިންމު އަސާސަކީ، ބައިނަލް އަގުވާމީ ބޮޑެތި މައްސަލަތަކުގައި ވަކިފަރާތަކަށް ނުޖެހުމުގެ ސިޔާސަތެވެ.
އެހެންނަމަވެސް، މިސިޔާސަތު ތަންފީޒު ކުރުމުގައި ދިވެހިރާއްޖެއިން އަބަދުވެސް ގެންގުޅެފައި އޮތް މައިގަޑު އެއް އަމާޒެއް އޮތެވެ. އެއީ ގައުމުގެ ސަލާމަތާއި ރައްކާތެރިކަން ގުރުބާން ނުކޮށް، މުސްލިމް އުއްމަތާއި ގުޅުންހުރި ކަންކަމުގައި ރަތްރޮގެއް ދަމާލާފައި އޮތުމެވެ. މިގޮތުން ފަލަސްތީނުގެ މައްސަލާގައި، ދިވެހިރާއްޖެއިން އަބަދުވެސް އޮތީ ފަލަސްތީނުގެ މިނިވަން ދައުލަތަކަށް ސާފު ބަހުން ތާއީދު ކޮށްފައެވެ. މިއަދާ ހަމައަށްވެސް މިސިޔާސަތަށް ބަދަލު އައިސްފައެއް ނުވެއެވެ.
އަދި ރައީސް މައުމޫނުގެ ދައުރުއްސުރެ، ތަންފީޒު ކޮށްފައިވާ ވަކިފަރާތަކަށް ނުޖެހޭ ޚާރިޖީ ސިޔާސަތުގެ ތެރެއިން، ގައުމުގެ މިނިވަންކަން ދަމަހައްޓާ، މިސާސަތު ކާމިޔާބު ކަމާއެކު ތަންފީޒު ކޮށްފައިވާ ކަމުގެ ހެކި އެންމެ ސާފުކޮށް ފެންނާން އޮތީ، ނޮވެމްބަރު 3 ގެ އުދުވާނީ ހަމަލާއިން ރާއްޖެ ސަލާމަތް ކުރުމަށް އިންޑިއާގެ އަސްކަރިއްޔާއިން ރާއްޖެއަށް އަރާ، ތަމަޅައިގެން ބަލިކޮށް، އަދި އެއަށްފަހު ސަލާމަތްތެރިކަން ޔަގީން ކުރުމަށް ދުވަސްތަކެއް ވަންދެން އިންޑިއާ ސިފައިން ރާއްޖޭގައި ތިބި ނަމަވެސް، އިންޑިއާ ސިފައިން ދާއިމީ ގޮތެއްގައި ރާއްޖޭގައި ތިބެފައި ނުވާ ނުވުމުންނެވެ.
އެހެންނަމަވެސް ދުނިޔޭގެ އެހެން ބައެއް ގައުމުތަކަށް ބަލާއިރު، މިހާލަތު ފެންނާން އޮތީ މިގޮތުގައި ނޫން ކަމުގައި ދަންނަވަން ޖެހެއެވެ. އެމެރިކާ ސިފައިންގެ އެހީތެރިކަމުގައި ސައްދާމް ހުސެއިންގެ ސަރުކާރު ވައްޓާލާ، އިރާގުގައި އާ ސަރުކާރެއް ގާއިމް ވެގެން ދިއުމަށްފަހު އެމެރިކާ ސިފައިން އެގައުމުން ފާބައިފައެއް ނުވެއެވެ.
އަފްއާނިސްތާނުގައި ކުރިން އޮތް ތާލިބާން ސަރުކާރު ބަދަލު ކުރުމަށްފަހު އެގައުމަށް އަރާތިބި ގައުމުން ބޭރުގެ ބާރުތައް 20 އަހަރު ވަންދެން އެގައުމުގައި ދެމި ތިބެފައި ވެއެވެ.
އެހެންކަމުން ފާހަގަވާން އޮތް އެންމެ މުހިންމު ކަމަކީ، ގައުމުގެ ސަލާމަތާއި ރައްކާތެރިކަން ކަށަވަރު ކުރުމުގައިވެސް ރާއްޖެއިން މާކުރިން، ނުހަނު ކާމިޔާބު ޚާރިޖީ ސިޔާތެއް ތަންފީޒު ކޮށްފައިވާ ކަމެވެ.
އިންޑިއާ ޗައިނާ، ފަހަކަށް އައިސް ރާއްޖޭގެ ދާޚިލީ ހަމަޖަހުމުގައި މުހިންމު ދައުރެއް!
ރައްޖޭގެ ފާއިތުވެދިޔަ ދެ ސަރުކާރުގައިވެސް، ޚާރިޖީ ސިޔާސަތު ތަންފީޒުކުރުމުގައި އެންމެ ބޮޑު ގޮންޖެހުމަކާ ކުރިމަތި ލާންޖެހިފައިވަނީ، އަވައްޓެރި އިންޑިއާއި، ސަރަހައްދީ އަދި ދުނިޔޭގެވެސް ބޮޑު ބާރެއްގެ ގޮތުގައި އޮތް ޗައިނާއާއި ދެމެދު ހަމަހަމަ ޚާރިޖީ ގުޅުމެއް ދެމެހެއްޓުމުގައެވެ. އަދި، ދެ ސަރުކާރުންވެސް މި ދެގައުމާއެކު ދަމަހައްޓާފައިވާ ގުޅުން ވެގެން ގޮސްފައިވަނީ، ރާއްޖޭގެ ދާޚިލީ ހަމަޖެހުމާއިވެސް އެހާމެ ބޮޑަށް ގުޅި ލާމެހިގެންދާ ޚާރިޖީ ގުޅުމަކަށްވެސް މެއެވެ.
މިގޮތުން ރައީސް ޔާމިންގެ ދައުރުގައި އެ ސަރުކާރުގެ އެންމެ ބޮޑު މިތުރަކަށް ވެގެން ދިޔައީ ޗައިނާއެވެ. އޭގެ ނަތިޖާއެއްގެ ގޮތުން، އިންޑިއާއި އެ ސަރުކާރާ އޮތް ގުޅުން އިންތިހާއަށް ގޯސްވެގެން ދިޔައެވެ. އެހެންނަމަވެސް، ޗައިނާއާއި ރައީސް ޔާމިންގެ ސަރުކާރުން ދެމެހެއްޓި ގުޅުމުގެ ތެރެއިން، އިގްތިސާދީގޮތުން ބޮޑެތި ބައެއް މަޝްރޫޢުތައް ރާއްޖޭގައި ހިންގާ، ތަރައްގީގެ މަގުން ބޮޑެތި ކުރިއެރުންތަކެއް ހޯދާފައިވާކަން ފާހަގަ ކޮށްލަން ޖެހެއެވެ.
އެހެންނަމަވެސް، ޗައިނާއާއިއެކު ގާއިމްކުރި ގުޅުމުގެ ތެރެއިން، އުމްރާނީގޮތުން ބޮޑެތި ޕްރޮޖެކްޓްތައް އެ ސަރުކާރުން ހިންގާފައިވި ނަމަވެސް، އިންޑިއާފަދަ، އަވައްޓެރި އަދި ބޮޑު ބާރަކާ އިންތިހާއަށް ގުޅުން ގޯސްކުރުމަށް ރައީސް ޔާމިންގެ ސަރުކާރުން ފުރުސަދު ދިން ދިނުމަކީ އެސަރުކާރުން އެޅި “ޅައެއްޗެއް”ގެ ގޮތުގައި މެނުވީ މިއަދު ފެންނާކަށް ނެތެވެ. ސަބަބަކީ، އޭރުގެ އިދިކޮޅު ފަރާތްތަކުން އިންޑިއާއެކީ ގާއިމް ކޮށްފައި އޮތް ގާތް ގުޅުމަށް މަގުފަހި ކޮށްދިން ހަގީގީ ސަބަބަކީ އެއީ ކަމުގައި ވެގެން ގޮސްފައި ވާތީއެވެ. ނަތީޖާއެއްގެ ގޮތުން ފާއިތުވެދިޔަ ރިޔާސީ އިންތިޚާބުގައިވެސް، އަދި މިހާރުވެސް މިސަރުކާރުގެ އެންމެ ބޮޑު މިތުރަކީ އިންޑިއާއެވެ. އެހެންކަމުން، މިއަދުގެ އިދިކޮޅު ފަރާތްތަކުގެ ހަތުރަކަށް އިންޑިއާ ބަދަލުވެގެން ދިޔަ ދިއުމަކީ، ރައީސް ޔާމިންގެ ސަރުކާރުން އެންމެ ކުރިއްސުރެ ތަންފީޒު ކުރަމުންއައި ޚާރިޖީ ސިޔާސަތުގެ ނަތީޖާ ކަމުގައި މިއަދު ގަބޫލުކުރަން ޖެހެއެވެ.
އެހެންކަމުން ގަބޫލުކުރަން ޖެހޭ އެންމެ މުހިންމު އެއް ހަގީގަތަކީ، ގައުމު އެތެރޭގެ ދާޚިލީ ކަންކަމުގައި ކިތަންމެ ބޮޑު ދެކޮޅުވެރިކަމެއް އޮތަސްވެސް، ރާއްޖެފަދަ، އިގުތިސާދީ ގޮތުންނާއި އަދި ވަސީލަތްތަކުގެ ގޮތުންވެސް ޟައީފު ގައުމަކަށް، ބޭރުގެ ދައުލަތަކާއި ހަތުރުވެރިކަން ގާއިމް ކުރުމަކީ، އޭގެ ފައިދާއަށްވުރެ ގެއްލުން ބޮޑުވެދާނޭ ކަމެއްކަމެވެ.
އަދި ނަތީޖާއެއްގެ ގޮތުން، އޭގެ އަސަރު ގައުމުގެ އެތެރޭގެ މަސްލަހަތަށްކޮށް، ސިޔާސީ ފަރާތްތަކުން އޭގެ ޖަޒުބާތުގައި ކޮމްޕްރޮމައިސް ވުންވެސް އޮންނާނީ ވަރަށްވެސް ގާތުގައިކަން މިއީ އިއްޔެއާއި މިއަދުވެސް ރާއްޖެއިން ފެންނާން އޮތް އެންމެ ބޮޑު އެއް ހަގީގަތެވެ.
އަދި ރާއްޖޭގެ މިއަދުގެ ސިޔާސީ މަސްރަހުން ފެންނާން ހުރި މަންޒަރުތަކަށް ބަލާއިރު، މިހަގީގަތް މިއަދު މިދަނީ މާ ސާފުކޮށް ތަމްސީލު ވަމުންކަމުގައިވެސް ގަބޫލުކުރަން ޖެހެއެވެ. އިދިކޮޅު ފަރާތްތަކުން ކުރިޔަށް ގެންދާ އިންޑިއާ އައުޓް ކެމްޕޭންގެ ނަތީޖާއަކަށް ވެގެން މިދަނީ، އިންޑިއާއަކީ އިދިކޮޅު ފަރާތްތަކުގެ ހަތުރަކަށްވެ، މިސަރުކާރާ އިންޑިއާއިއެކު އޮތް ގުޅުން ދުވަހެއް ދަވަހަކަށް ބަދަހި ވަމުން ދިއުމެވެ. އަދި ސާބިތުވަމުންދާ ހަގީގަތަކީ، ދޭދޭ ގައުމުތަކާއި ދަމަހައްޓާ ގުޅުމާއި، ޑިޕްލޮމަސީއަކީ ގައުމުގެ އެތެރޭގައި އޮތް ސިޔާސީ ކޯޅުމުގެ އަސްލަކަށް ވެގެން ދިއުމުގެ ނުރައްކާތެރި ކަމެވެ.
