ސަރުކާރު އޮފީސް އަދި ކުންފުނިތަކަށް ހުޅުވާލައިގެން ބާއްވާ ކްލަބް މޯލްޑިވްސް ކަޕްގެ ކުއާޓާ ފައިނަލުގެ މެޗުތައް މިރޭ ފަށާނެއެވެ.
އެންމެ ފުރަތަމަ ކުއާޓާ ފައިނަލުގެ މެޗުތައް ރޭ ފަށަން ޝެޑިއުލްކޮށްފައި އޮތްނަމަވެސް މޫސުން ގޯސްވުމުގެ ސަބަބުން ރޭ ކުޅެން އޮތް މެޗުތައް ވަނީ މިރެއަށް ފަސްކޮށްފައެވެ.
32 ޓީމު ވާދަކުރާ މި މުބާރާތުގެ ކުއާޓާ ފައިނަލަށް ދަތުރުކުރި ޓީމުތަކަކީ، ޓީމް ފެނަކަ، ކްލަބް އެޗް.ޑީ.ސީ، އާރް.އާރް.ސީ، ޕްރިޒަން ކްލަބް، ޓީމް އެފް.އެސް.އެމް، އެސްޓީއޯ އަދި އެމް.އޭ.ސީ.އެލްގެ އިތުރުން އެމް.ޕީ.އެލްއެވެ.
މުބާރާތުގެ ކުއާޓާ ފައިނަލުގެ ފުރަތަމަ މެޗުގައި މިރޭ ޕްރިޒަން ކްލަބް ނުކުންނާނީ، އެމް.އޭ.ސީ.އެލްއެވެ. ދެވަނަ މެޗުގައި ކްލަބް އެޗް.ޑީ.ސީ ވާދަކުރާނީ ޓީމް އެފް.އެސް.އެމް އާއެވެ.
ކުއާޓާ ފައިނަލުގެ ތިންވަނަ މެޗުގައި މާދަމާ ރޭ ނުކުންނާނީ އެމްޕީއެލް އާއި އާރްއާރްސީއެވެ. ފަހު މެޗުގައި އެސްޓީއޯ ނުކުންނާނީ ޓީމު ފެނަކަ އާއި ދެކޮޅަށެވެ.
މީގެ އިތުރުން ކްލަބް މޯލްޑިވްސްގެ އަންހެން މުބާރާތް 18/30 ވިމެން ފުޓްސަލް ފިއެސްޓާގެ ސެމީ ފައިނަލްގައި އަންގާރަ ދުވަހުގެރޭ ދިވެހި ސިފައިންގެ ކްލަބް ކުޅޭނީ ވެމްކޯއާއެވެ. އެންމެ ފަހުގެ ޗެމްޕިއަން އެމްޕީއެލް ބައްދަލުކުރާނީ ޕޮލިސް ކްލަބާއެވެ.
