ފިލްމީ މަސައްކަތްތަކުން ނެގި ބްރޭކަށް ފަހު މި މަހުގެ 15 ގައި އެނބުރި މަސައްކަތަށް ނުކުތުމަށް ބޮލީވުޑްގެ ސުޕަރ ސްޓާ ޝާހްރުކް ޚާން ނިންމައިފިއެވެ.
ޝާހްރުކްގެ ދޮށީދަރިފުޅު އާރިޔާން ޚާން ޑްރަގް މައްސަލައެއްގެ ތުހުމަތުގައި ހައްޔަރު ކުރުމާ ގުޅިގެން އޭނާ ޝޫޓިންތަކުން އެއްފަރާތް ވުމުވުގެ ސަބަބުން ފިލްމްތަކުގެ މަސައްކަތްތައް ވަނީ ވަގުތީގޮތުން ހުއްޓިފައެވެ.
ބޮލީވުޑް ހަންގާމާއިން ބުނި ގޮތުގައި އޭނާގެ އުންމީދީ ފިލްމު "ޕަތަން"ގެ ޝޫޓިން އަލުން ފެށުމަށް އަންނަނީ ތައްޔާރު ވަމުންނެވެ. އާނަންދު އެލް ރާއީގެ މި ފިލްމަކީ 2 އަހަރު ދުވަހުގެ މެދުކެނޑުމަކަށްފަހު ޝާހްރުކް ފެންނާނެ ފުރަތަމަ ފިލްމުވެސް މެއެވެ. ސަބަބަކީ 2018ގެ ފްލޮޕް ފިލްމު "ޒީރޯ"އަށް ފަހު އޭނާ މިހާތަނަށް އަދި ފިލްމަކުން ފެނިފައި ނުވުމެވެ.
"ޕަތަން" އަކީ ބޮޑު ކާސްޓެއް ހިމެނޭ ފިލްމެކެވެ. އާރިޔާން ޚާންގެ މައްސަލާގައި ފިލްމުގެ ޝޫޓިން މެދު ކެނޑުމުގެ ސަބަބުން ފިލްމުގައި ދެން މަސައްކަތް ކުރާ އެހެން ތަރިންނަށްވެސް ވަނީ މި ކަމުގެ ނޭދެވޭ އަސަރު ކޮށްފައެވެ.
މުމްބާއީގައި މި ފިލްމުގެ ޝޫޓިން އަލުން ފަށާއިރު ޝޫޓިން 10-15 ވަރަކަށް ދުވަހަށް ކުރިއަށް ދާނެކަމަށް ބެލެވެއެވެ. އަދި ސެޓުގެ ސެކިއުރިޓީ ވަރަށް ވަރުގަދަ ކުރާނެ ކަމަށް ފިލްމުގެ ޕްރޮޑަކްޝަން ޓީމުން ވަނީ ބުނެފައެވެ.
"ޕަތަން"ގެ މަންޒަރުތައް ޔޫރަޕުގެ ބައެއް ގައުމުތަކުގައިވެސް ނެގުމަށް ވަނީ ހަމަޖެހިފައެވެ. އެހެން ކަމުން މުމްބާއީގެ ޝެޑިއުލް ނިމުނުހާ އަވަހަކަށް މި ޓީމުން ގައުމުން ބޭރުގެ ޝޫޓިންގ ތަކަށް ނައްޓާލާނެ ކަމަށް ބެލެވެއެވެ.
އާރިޔާން ހައްޔަރު ކުރުމުން ޝާހްރުކްގެ ފަރާތުން ޕްރޮޑިއުސަރުންނާއި ޑައިރެކްޓަރުންނަށް ވަނީ ހާއްސަ ރިކުއެސްޓެއް ކޮށްފައެވެ. އެއީ ގައުުމުން ބޭރުގެ ޝޫޓިންގ ޝެޑިއުލްތައް ދިގު ދެމިގެން ނުދާނެ ގޮތަށް ހަމަޖައްސައި ދިނުމެެވެ.
