ބޮލީވުޑްގެ ތަރި ވިކީ ކޯޝަލްގެ އާއި ބަތަލާ ކެޓްރީނާ ކައިފް ކައިވެނި އަންނަ ޑިސެމްބަރު މަހު އޮންނާނެ ކަމަށް މީޑިއާތަކުން މީގެ ދުވަސްކޮޅެއް ކުރިން ވަނީ ރިޕޯޓްކޮށްފައެވެ. އެއަށްފަހު އެވާހަކަ މެދު ނުކެނޑި އަންނަނީ މީޑިއާތަކުން ދައްކަމުންނެވެ.
އެގޮތުން އަންނަ ހަފްތާގެ ތެރޭގައި ވިކީ އާއި ކެޓްރީނާ ކައިވެނި އޮންނާނެކަމަށް ބައެއް މީޑިއާތަކުން ބުނެފައި ވާއިރު، މި ދެމީހުން ކައިވެނި ކުރުމަށް ހަމަޖެހިފައިވަނީ މުމްބާއިގެ ކޯޓެއްގައި ކަމަށްވެސް ބައެއް ރިޕޯޓުތައް ބުނެއެވެ. ކައިވެންޏަށްފަހު ޑިސެމްބަރު 7 އާއި 12 އާދެމެދު ކައިވެނި ހަފްލާ ކުރިއަށް ދާނީ ރާޖިސްތާނުގައި ކަމަށް ވެސް ޚަބަރުތައް ބުނެއެވެ.
ނަމަވެސް ޕިންކް ވިލާއިން އިއްޔެ ކަށަވަރުކޮށްދިން ގޮތުގައި މިދެމީހުންގެ ކައިވެނީގެ ރަސްމިއްޔާތު އޮންނާނީ ޑިސެމްބަރު މަހުގެ 9 ވަނަ ދުވަހު ރާޖިސްތާންގެ ސިކްސް ސެންސް ފޯޓް ބަރްވާރާ ރިސޯޓުގައެވެ. އަދި މި ކައިވެންޏަކީ ހިންދޫއިންގެ ސަގާފީ ކައިވެންޏަކަށް ވުމުން ކައިވެނީގެ އެކި ހަރަކާތްތައް ޑިސެމްބަރު 7 އިން ފެށިގެން އެ ރިސޯޓުގައި ކުރިއަށްދާނެ ކަމަށްވެސް ޕިންކް ވިލާއިން ވަނީ ރިޕޯޓްކޮށްފައެވެ.
YES! It's O-F-F-I-C-I-A-L ????????????????
More deets – https://t.co/NcMWOgMAR1#KatrinaKaif #VickyKaushal pic.twitter.com/yIT5IHCUkf— Pinkvilla (@pinkvilla) November 26, 2021
ކައިވެންޏަށް ހުސްވުމުގެ ގޮތުން ވިކީ އާއި ކެޓްރީނާ މިވަގުތު ތިބީ ފިލްމީ މަސައްކަތްތަކުން ވަގުތު ހުސްކޮށްގެން ކަމަށްވެސް މީޑިއާ ރިޕޯޓުތައް ބުނެއެވެ. ކައިވެންޏާ ގުޅޭގޮތުން މީޑިއާގައި މިހާ ހޫނުކޮށް މި ވާހަކަތައް ދެކެވުނު ނަމަވެސް ދެތަރިންގެ ފަރާތުން އަދި މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ކައިވެނީގެ ހަފްލާގައި ބައިވެރިވާ މީހުންނަށް ހަފްލާ ބާއްވާ ތަނަށް ފޯނު ނުވެއްދޭނެ ކަމަށާއި މި ކައިވެންޏަކީ ވަރަށް މަދު ބަޔަކާއިއެކު ކުޑަގޮތަކަށް ބާއްވާ ކައިވެންޏެއް ކަމަށް ގިނަ މީޑިއާތަކުން މީގެކުރިން ބުނެފައި ވީނަމަވެސް، ޕިންކް ވިލާއިން އިއްޔެ ރިޕޯޓުކޮށްފައި ވާގޮތުގައި ބޮލީވުޑްގެ މި ބޮޑު ކައިވެނީގައި 200 ވަރަކަށް ގެސްޓުންވެސް ބައިވެރިވާނެއެވެ. އަދި މިކަމުގެ އެންމެ ފަހުގެ ތައްޔާރީތަކާއި ގެސްޓުންގެ ބުކިންތައް ހެދުންވެސް މިހާރު ކުރިއަށްދާކަމަށް، މިކަންކަން ވަރަށް ގާތުންއެނގޭ މީހަކާ ހަވާލާދީ ޕިންކް ވިލާއިން ވަނީ ރިޕޯޓްކޮށްފައެވެ.
