ދަރަނިން އަރައި ގަންނަން ބޭނުންނަމަ ފެއްދުންތެރި އިޤްތިސާދެއް، ބިނާކުރަންޖެހޭ ކަމުގައި މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅު ވެއްޖެއެވެ.
ރާއްޖޭގެ އިޤްތިޞާދީ ހާލަތު އޮތް ގޮތުން ކަންބޮޑުވުން ފާޅު ކުރައްވައި ސައުދު ކުރެއްވި ޓްވީޓުގައި ވިދާޅުވީ ރާއްޖެއަށް ދިމާވެފައިވާ ދަރަނީގެ ހާލަތުން އަރައި ގަތުމަށްޓަކައި، ޤައުމުގެ އިޤްތިޞާދީ ފުދުންތެރިކަން އިތުރުކުރަންޖެހޭކަމަށެވެ. އިޤްތިޞާދީ ގޮތުން ކުރިއަރާނީ ދައުލަތުގެ ތެރޭގައި އޮތް ކޮރަޕްޝަންގެ ކަންކަން ހުއްޓުވައި، ދައުލަތުގެ ޕްރޮކިއުމަންޓް ނިޒާމު ހަރުދަނާ ކުރެވިގެންކަމަށް ސައުދު ވިދާޅުވިއެވެ.
ރާއްޖެއަށް ދިމާވެފައިވާ އޮތް ދަރަނީން އަރައިގަންނަން ބޭނުންނަމަ ޤައުމުގެ އުފެއްދުންތެރިކަން އިރުކޮށް، ޤައުމުގެ އިޤްތިޞާދު އުފެއްދުންތެރި އިޤްތިސާދަކަށް، ބިނާކުރަންޖެހޭ. އަދި ކޮރަޕްޝަން ހުއްޓުވައި އުމުރާނީ ގޮތުން ހިންގޭ ޕްރޮޖެކްޓް ތަކާއި، ދައުލަތުގެ ޕްރޮކިއުމަންޓް ނިޒާމުގައި ހުރި ބާގަނޑު ބައްދަންޖެހޭ.
– ސައުދު ވިދާޅުވިއެވެ.
އަންނަ އަހަރަށް ލަފާކޮށް ހުށަހެޅި ބަޖެޓުގައި މިހާރު ހިމަނާފައި ޑެފިސިޓް [ދަރަނި] ލަފާކުރާ ވަރަށްވުރެ މަތިވެގެން ދިއުމުގެ ފުރުސަތު އެބައޮތް ކަމަށް ވިދާޅުވެ، އޮޑިޓާ ޖެނެރަލް ހުސެއިން ނިޔާޒީވެސް ވަނީ ކަންބޮޑުވުން ފާޅު ކުރައްވާފައެވެ.
ބަޖެޓު ދިރާސާ ކުރާ ކޮމެޓީގައި އޮޑިޓަ ޖެނެރަލް އޮފީހުގެ ޕްރޮޕެޝަނަލް އޮޕީނިއަން ދެއްވަމުން އޮޑިޓަ ޖެނެރަލް އަންނަ އަހަރަށް 36.9 ބިލިއަން ރުފިޔާގެ ބަޖެޓެއް ހުށަހަޅާފައިވާ އިރު 9.7 ބިިލިއަން ރުފިޔާ ޑެފިސިޓްވާނެ ކަަމަށް އަންދާޒާ ކުރެވޭނެ ކަމަށެވެ. އަދި ވިދާޅުވީ އަންނަ އަހަރުގެ ބަޖެޓުގައި ޑެފިސިޓް ބޮޑު ކަމަށާއި އަދި ބައެއް ކަންކަން ރަނގަޅަށް ތަންފީޒުނުވެ ހިނގައްޖެނަމަ ބަޖެޓު އިތުރަށް ޑެފިސިޓުވުމުގެ ފުރުސަތު އެބައޮތް ކަމަށެވެ.
އަންނަ އަހަރުގެ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅައިދެއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ 2022 ވަނަ އަހަރު ދައުލަތުގެ އާމްދަނީ އާއި ހަރަދު އަންދާޒާކުރާ މިންވަރަށް ބަލައި، ދައުލަތުގެ ބަޖެޓުގެ ޑެފިސިޓް ނުވަތަ ދަރަނި ހުންނާނެ ކަމަށް ލަފާކުރެވެނީ 9.7 ބިލިއަން ރުފިޔާގައި ކަމަށެވެ. ނަމަވެސް ބަޖެޓު މިހާރު އޮތް ގޮތުން ދަރަނި 12 ބިލިޔަނަށް އަރާނެކަމަށް އިޤްތިޞާދީ ބޭފުޅުން ދަނީ ވިދާޅުވަމުންނެވެ.
