ބޮލީވުޑްގެ ކާމިޔާބު އެކްޓަރ ރާޖްކުމާރް ރާއޯ އޭނާގެ ދުވަސްވީ ލޯބިވެރިޔާ ޕަޓްރަލޭކާއާ ކައިވެނިކޮށްފިއެވެ.
މިދެމީހުން ލޯބީގެ ގޮތުން ގުޅިގެން އުޅެމުން އަންނަކަން ހާމަކޮށްފައިވަނީ 2010 ވަނަ އަހަރުއެވެ.
ރާޖަކީ މިވަގުތު ބޮލީވުޑްގެ އެންމެ ޑިމާންޑް ބޮޑު އެއް ތަރިއެވެ. އެގޮތުން މިއަހަރު މިހާތަނަށްވެސް އޭނާގެ ތިން ފިލްމެއް ވަނީ ބެލުންތެރިންނާ ހަމަޔަށް އައިސްފައެވެ. އެއީ "ދަ ވައިޓް ޓައިގާ"، "ރޫހީ" އަދި "ހަމް ދޯ ހަމާރޭ ދޯ" އެވެ. ހަމައެހެންމެ އަންނަ އަހަރުވެސް ފިލްމީ މަސައްކަތުގައި އޭނާ ވަރަށް ބިޒީ ވެެގެން ދާނެއެވެ.
ޕަޓްރަލޭކާ އަކީ ވެސް މަދުމަދުން ފިލްމް ތަކުން ފެންނަ ތަރިއެކެވެ. މިހާތަނަށް މި ދާއިރާގައި އޭނާއަށް މާބޮޑު ކާމިޔާބެއް ހާސިލް ކުރެވިފައިއެއް ނުވެއެވެ.
ޗަންދީގަރްގައި އިއްޔެ ކައިވެނީގެ ރަސްމިއްޔާތު ބާއްވާފައި ވަނީ ދެމީހުންގެ އާއިލާ އާއި ވަރަށް ގާތް މަދު ރައްޓެހިން ކޮޅަކާއެކުއެވެ.
View this post on Instagram
ޕަޕަރާޒީންގެ ލެންސްތަކާއި ވަރަށް ބޮނދައިގެން މި ކައިވެނީގެ ކަންކަން ކޮށްފައިވާއިރު މި ދެތަރިންގެ ސޯޝަލް މީޑިއާ އެކައުންޓުގައި އިއްޔެ ވަނީ ކައިވެނީގެ ރަސްމިއްޔާތުގެ ފޮޓޯތައް ހިއްސާކޮށްފައެވެ. އަދި ފިލްމު އިންޑަސްޓްރީގެ ގިނަ ފަންނާނުން އަންނަނީ މިދެތަރިންނަށް މަރުހަބާ ކިޔަމުންނެވެ.
