މޮރޮކޯގެ ތާރީޚުގައި ފުރަތަމަ އަންހެން ބޭކަނބަލަކު ބޮޑުވަޒީރުކަމަށް

މޮރޮކޯގެ ރަސްގެފާނު މުހައްމަދު ހައެއް، އެ ގައުމުގެ ތާރީހުގައި ފުރަތަމަ ފަހަރަށް އަންހެނަކު ބޮޑުވަޒީރުކަމަށް އައްޔަންކުރައްވައިފިއެވެ.

އިއްޔެ އެ މަގާމަށް ހަމަޖެއްސެވީ ފާތިމާ އައްޒަހްރާ އަލްމަންސޫރީ އެވެ. އާ ސަރުކާރެއް އެކުލަވާލުމުގެ ޒިންމާވެސް އޭނާއާ ހަވާލުކުރައްވައިފިއެވެ. މި ފުރުޞަތަކީ ހަމައެކަނި އޭނާއަށް ލިބުނު ޝަރަފެއް ނޫން ކަމަށާއި، މޮރޮކޯގެ ހުރިހާ އަންހެނުންނަށް ލިބުނު ތާރީޚީ ފަހުރެއް ކަމަށް ފާތިމާ ވިދާޅުވިއެވެ.

50 އަހަރުގެ ފާތިމާއަކީ މަރާކެޝް ސިޓީގެ މޭޔަރާއި، މަގާމުން ވަކިވެވަޑައިގަންނަވާ އާބަން ޕްލޭނިންގ ވަޒީރެވެ.

މި މަހުގެ 23 ގައި ބޭއްވި އާއްމު އިންތިހާބުގައި އޭނާގެ ޕާޓީ، އޮތެންޓިސިޓީ އެންޑް މޮޑަނިޓީ ޕާޓީ (ޕީއޭއެމް) އިން ދަށުގޭގެ 395 ގޮނޑިއިން 97 ގޮނޑި ހޯދިއެވެ. އަޣުލަބިއްޔަތަށް 198 ގޮނޑި ބޭނުންވާތީ، ސަރުކާރު ހެދުމަށް އެހެން ޕާޓީތަކާ ގުޅިގެން ކޯލިޝަނެއް ހަދަން ޖެހޭނެއެވެ.

އާ ސަރުކާރުގެ މައިގަނޑު ބުރަދަނޑުތަކުގެ ތެރޭގައި، ސްޕެއިނާއި ޕޯޗުގަލާ ގުޅިގެން މޮރޮކޯއިން ބާއްވާ 2030 ވަނަ އަހަރުގެ ފީފާ ވޯލްޑް ކަޕާ ގުޅޭ ބޮޑެތި އިންވެސްޓްމަންޓްތައް ހިމެނެއެވެ.

ޓިއުނީޝިއާގެ ނަޖްލާ ބޫދަނާއި، އެ ގައުމުގެ މިހާރުގެ ބޮޑުވަޒީރު ސާރާ ޒައުފަރާނީއަށް ފަހު، އަރަބި ސަރުކާރެއްގެ ވެރިކަމަށް އައި ތިންވަނަ އަންހެނަކީ ފާތިމާއެވެ.