އަންނަ އަހަރަށް ލަފާކުރާ ދައުލަތުގެ ބަޖެޓުން ޒިންމާ އަދާކޮށް، ރައްޔިތުންނަށް ދޭންޖެހޭ ޚިދުަތް ފޯރުކޮށްނުދެވޭނެކަމަށް ކައުންސިލްތަކުގެ ބެލެނިވެރިފަރާތް ލޯކަލް ގަވަރުމަންޓް އޮތޯރިޓީ (އެލްޖީއޭ) އިން ބުނެފިއެވެ. މި ކަންބޮޑުވުން އެލްޖީއޭއިން ފާޅުކޮށްފައިވަނީ ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގައެވެ.
މިސަރުކާރުން ވަނީ ލާމަރުކަޒީ ޤާނޫނަށް ގިނަ އިޞްލާހުތަކެއްގެނެސް، ބޮޑެތި ބާރުތަކެއް ކައުންސިލްތަކަށް ދީފައެވެ. އެގޮތުން ކައުންސިލްތަކަށް ވަންނަ ފައިސާ ސީދާ އެ ކައުންސިލަށް ވަންނަ އާމްދަނިއެއެއްގެ ގޮތުގައި ކަނޑައަޅާފައިވެއެވެ. އަދި ދައުލަތުގެ ބަޖެޓުން ބްލޮކް ގްރާންޓުގެ ގޮތުގައިވެސް ފައިސާ ކަނޑއަޅާފައިވެއެވެ. އެގޮތުން ދައުލަތުގެ ބަޖެޓުން 5 ޕަސެންޓު ކައުންސިލްތަކަށް ލިބޭނެއެވެ. އެހެންކަމުން ކައުންސިލްތަކަށް 1.5 ބިލިއަން ރުފިޔާ ބަޖެޓުން ލިބޭނެއެވެ. އަދި ކައުންސިލްތަކުގެ އިހުތިސާސުގައި ނުހިމެނޭ ބިމާއި ފަޅާއި ފަރުގެ ސަރަހައްދުގެ ކުލީގެ ގޮތުގައި ލިބޭ އާމްދަނީގެ 40ޕަސެންޓު ކައުންސިލްތަކަށް ލިބޭނެއެވެ.
ބަޖެޓް ކޮމިޓީގައި ވާހަކަފުޅު ދައްކަވަމުން އެލްޖީއޭގެ އިސްވެރިން ވަނީ ގިނަ ކަންބޮޑުވުންތަކެއް ކޮމިޓީއާއި ހިއްސާކޮށްފައެވެ. އެގޮތުން އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް އަހުމަދު ވިދާޅުވީ ލާމަރުކަޒީ ގާނޫނަށް އެ އިޞްލާހުތައް ގެނައުމުގެކުރިން، އޭރުގެ ކައުންސިލަރުންގެ އަދަދާއި މުވައްޒަފުންގެ އޮނިގަނޑުގެ އިތުރުން ރައްޔިތުންނަށް ދޭ ހިދުމަތްތަކަށް ބަލައި، ހަރަދުގެ ގޮތުގައި އަންދާޒާ ކޮށްފައިވަނީ އަހަރެއްގެ މައްޗަށް ދައުލަތަށް ލިބޭ އާމްދަނީގެ 2.1 ޕަސަންޓްކަމަށެވެ. ނަމަވެސް ޤާނޫނަށް އިޞްލާހު ގެނައީ ކައުންސިލުތަކަށް ދޭ އަދަދު ފަސް ޕަސަންޓަށް ކަނޑައެޅީ، ރިކަރަންޓް ހަރަދު ކަނޑައި ބާކީ ބައި ކައުންސިލުތަކުން ޕްރޮގްރާމްތައް ހިންގުމަށް ވިސްނައިގެން ކަމަށާއި، ނަމަވެސް ލާމަރުކަޒީ ގާނޫނު އިސްލާހު ކުރިއިރު، ރަށްރަށުގައި ހުރި މިސްކިތްތަކާއި ކުޅިވަރު ދަނޑު ފަދަ ތަންތަން ކައުންސިލުތަކުގެ ދަށަށް ބަދަލުކުރެވިފައިވަނީ އެތަންތަނަށް ހިނގާ ހަރަދު ވެސް ކައުންސިލުތަކުގެ ބަޖެޓުން ހަމަޖައްސަންޖެހޭ ގޮތަށްކަމަށް އޭނާ ވިދާޅުވިއެވެ.
އެލްޖީއޭއިން ވަނީ އަންހެނުންގެ ތަރައްޤީއަށްމަސައްކަތްކުރާ ކޮމިޓީގެމެންބަރުންގެ މުސާރަ ދެގުނަކުރުމަށް ރައީސުލްޖުމްހޫރިއްޔާ ނިންމެވި ނިންމެވުމުގެ ސަބަބުންވެސް ބަޖެޓަށް ބުރަ ބޮޑުވެފައިވާކަން ފާހަގަކޮސްފައެވެ. އެލްޖީއޭއިން ވަނީ ބްލޮކް ގްރާންޓުގެ ހުރިހާ ފައިސާއެއް ރިކަރަންޓު ޚަރަދަށް ހޭދަކުރަންޖެހޭނެކަމަށް ލަފާކޮށްފައެވެ. އެހެންކަމުން އެ ޚަރަތުތަކަށް ފައިސާ ނެގުމަށްފަހު އެހެން ޕްރޮގްރާމްތައް ހިންގުމަށް ފައިސާ ނުހުންނާނެކަން އެލްޖީއޭއިން ވަނީ ފާހަގަކޮށްފައެވެ.
ބަޖެޓު ދިރާސާކުރާ ކޮމިޓީއިން 2022 ވަނަ އަހަރުގެ ދައުލަތުގެ ބަޖެޓާ ގުޅޭގޮތުން ލޯކަލް ގަވަރމަންޓް އޮތޯރިޓީގެ ބޭފުޅުންނާ ބައްދަލުކުރުން pic.twitter.com/k4Cbp3BbA3
— People's Majlis (@mvpeoplesmajlis) November 15, 2021
މީގެ އިތުރުންވެސް މިއަދުގެ ކޮމިޓީ ބައްދަލުވުމުގައި އެލްޖީއޭގެ ސީއީއޯ އަފްޝަން ލަޠީފްވެސް ވަނީ ބައެއް ކައުންސިލްތަކުގެ ހާލަތު ވަރަށް ދަށްކަން ފާހަގަކުރައްވާފައެވެ. އެގޮތުން އެތަންތަނުގެ ނިކަމެތި ހާލަތުގެ ސަބަބުން ޚިދުމަތް ފޯރުކޮށްދިނުމަށް ހުރި ދަތިތައް ސީއީއޯ ހިއްސާކުރެއްވިއެވެ.
އަފްޝަން ވިދާޅުވީ ހާލަތު ރަނގަޅުކުރުމަށް މައުލޫމާތު އެއްކޮށް 23 ކައުންސިލެއް ފާހަގަކޮށް ބަޖެޓުގައި ފައިސާ ހިމަނަން ހުށައެޅުއްވިކަމަށެވެ. ނަމަވެސް ބަޖެޓު އާއިރު އޭގައި އޮތީ ފައިސާ ހިމަނާފައި ހަމައެކަނި 4 ވަރަކަށް ރަށުގެ ކައުންސިލް ކަމަށްވެސް އަފްޝަން ވިދާޅުވިއެވެ.
އަންނަ އަހަރަށް ލަފާކޮށް ދައުލަތުން ހުށައެޅީ 36.9 ބިލިއަން ރުފިޔާގެ ބަޖެޓެކެވެ. މި ބަޖެޓަށް ސަރުކާރުގެ ބައެއް މެންބަރުން ތާޢީދުކުރިނަމަވެސް މި ބަޖެޓުގެ ސަބަބުން ދައުލަތުގެ ދަރަނި އިތުރަށް ބޮޑުވެގެންދާނެކަމުގެ ކަންބޮޑުވުން މެންބަރުން ދަނީ ފާޅުކުރަމުންނެވެ.
