ޕީޖީ ލީޑަރުންގެ ތެރެއިން ބަޖެޓަށް ބަހުސް ނުކުރަނީ ޤާސިމް

އަންނަ އަހަރަށް ދައުލަތުން ލަފާކުރާ ބަޖެޓު ބަހުސްގައި، މަޖިލީހުގައި ހިމެނޭ ސިޔާސީ ޕާޓީތަކުގެ ލީޑަރުންގެ ތެރެއިން ބަހުސްގައި ބައިވެރިނުވާ ހަމައެކަނި ލީޑަރަކީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްއެވެ.

ބަޖެޓުގެ ބަހުސް މަރުހަލާ މިއަދު ވަނީ ނިންމާލާފައެވެ. ބަހުސްގައި ބައިވެރި ނުވަނީ 17 މެމްބަރުންނެވެ. ޕީޖީ ލީޑަރުންގެ ތެރެއިން ޤާސިމް ފިޔަވައި ހުރިހާ ލީޑަރުން ވަނީ ބަހުސް ކުރައްވާފައެވެ. ޤާސިމް މިފަހުން އަނެއްކާވެސް ޖަލްސާތަކަށް ވަޑައިނުގަންނަވާތާ ވަނީ ދުވަސްތަކެއްވެފައެވެ.

އަންނަ 2022 އަހަރަށް ލަފާކޮށް ހުށައެޅި 36.9 ބިލިއަން ރުފިޔާގެ ބަޖެޓަށް ވާހަކަފުޅު ދެއްކެވުމަށް އެދިވަޑައިގެންނެވި ހުރިހާ މެންބަރުންނަށް ފުރުޞަތުދީ ބަހުސް މަރުހަލާ ނިންމާލާފައިވަނީ ރޭގެ ވަގުތެއްގައެވެ. ޖުމްލަ 87 މެންބަރުން ތިއްބަވާ މަޖިލީހުގައި ބަޖެޓަށް ވާހަކަފުޅު ދެއްކެވީ 70 މެންބަރުންނެވެ. އެހެންކަމުން ބަޖެޓަށް ވާހަކަފުޅު ނުދައްކަވާނީ 17 މެންބަރުންނެވެ. ބަޖެޓް ބަހުސްއަށް ޖުމްލަ 16 ގަޑިއިރާއި 12 މިނެޓް ހޭދަކޮށްފައިވެއެވެ. މިފަހަރު ބަޖެޓް ބަހުސް ފަށާފައިވަނީ މިދިޔަ ހޯމަ ދުވަހުއެވެ. އެގޮތުން އެންމެ ފުރަތަމަ ބަޖެޓަށް ވާހަކަފުޅު ދެއްކެވީ ކުރެންދޫ ދާއިރާގެ މެންބަރު އަބްދުލްޣަނީ އަބްދުލްޙަކީމް އެވެ. އަދި އެންމެ ފަހުން ވާހަކަފުޅު ދައްކަވާފައިވަނީ ކުޑަހުވަދޫ ދާއިރާގެ މެންބަރު އަޙްމަދު ޢާމިރުއެވެ.

މިބަޖެޓަށް ވާހަކަފުޅު ދެއްކެވި ގިނަ މެންބަރުން ވަނީ އަންނަ އަހަރުގެ ބަޖެޓަކީވެސް ކޯވިޑާއި އާއި ގުޅިގެން ކުރިމަތިވި އިޤްތިޞާދީ ހީނަރުކަމުން އަރައިގަތުމަށާއި، ރާއްޖޭގައި ޒަމާނުއްސުރެ ހައްލުނުވެ ހުރި ރައްޔިތުންނާއި ގުޅުހުން ހުރި އެކި އެކި ކަންކަމަށް ދާއިމީ ހަލެއްގެނެސްދިނުމަށް ހުށައަޅާފައިވާ ބޭނުންތެރި ގިނަ ކަންތައްތަކެއް ހުރިހާ ދާއިރާއަކުން ހިމަނާފައިވާ ބަޖެޓެއްކަން ފާހަގަކުރައްވާފައެވެ.

ބަޖެޓަށް މަޖިލީހުގައި ހިމެނޭ ހުރިހާ ސިޔާސީ ޕާޓީތަކުންވެސް ބަހުސްކޮށްފައިވާއިރު، އިދިކޮޅު މެންބަރުން ބުނަމުންދަނީ މިހާރުގެ ހާލަތައް މިއީ ދަރަނިބޮޑު ބަޖެޓެއްކަމަށާއި، ބަޖެޓް ކުޑަކުރަންޖެހޭކަމަށެވެ. އަދި ބައެއް ދާއިރާތަކަށް ބަޖެޓްގައި ހިމަނާފައިވާ އަދަދުތައް މަދުކަމުގެ ކަންބޮޑުވުން މެންބަރުން ވަނީ ފާޅުކުރައްވާފައެވެ.

ބަޖެޓް ކޮމިޓީގެ ދިރާސާއަށްފަހު އަންނަ ހަފްތާގައި ބަޖެތް ދިރާސާކުރި ގޮތުގެ ރިޕޯޓު މަޖިލީހުގެ ތަޅުމަށް އަންނާނެކަމަށް ލަފާކުރެވޭކަމަށް މަޖިލީހުގެ ނާއިބުރައީސް ވަނީ ވިދާޅުވެފައެވެ. އެއާއެކު އެރިޕޯޓަށް ބަހުސްކުރުމަށް ކޮންމެ މެންބަރަކަށްވެސް 7 މިނެޓުގެ ވަގުތުދިނުމަށްވަނީ ހަމަޖެހިފައެވެ.