މާލޭގައި މީހަކު ބަރަހަނާކޮށް ފޭރޭން އުޅުމުގެ މައްސަލާގައި ހައްޔަރުކުރި 3 މީހުން ފުލުހުންގެ ބަންދުން ދޫކޮށްލައިފިއެވެ.
ފުލުހުން ބުނީ، މާލޭގައި 27 އަހަރުގެ ދިވެހި ފިރިހެނަކު ބްލެކްމައިލްކޮށް ބިރުދައްކައި ބަރަހަނާކޮށް ވީޑިއޯކޮށް ފައިސާ ހޯދަން އުޅުނުކަމުގެ މައްސަލައެއް ރޭ 03:49 ހާއިރު ފުލުހުނަށް ރިޕޯޓްކޮށްފައިވާކަމަށެވެ.
މި މައްސަލައާއިގުޅިގެން 24 އަހަރުގެ މީހަކާއި 27 އަހަރުގެ މީހަކާއި 31 އަހަރުގެ މީހެއް ރޭ ހައްޔަރުކޮށްފައިވާކަމަށް ފުލުހުން ބުންޏެވެ. އަދި އެ އެންމެންނަކީވެސް ދިވެހި ފިރިހެނުންކަމަށްވެސް ފުލުހުން ބުންޏެވެ.
އެމީހުން ހައްޔަރުކޮށް ބަންދުގެ މުއްދަތު ޖެހިނަމަވެސް، ފުލުހުން ބުނީ މިހާރު އެމީހުން ބަންދުން ދޫކޮށްލާފައިވާކަމަށެވެ. އެމީހުން ދޫކޮށްލީ އެ މައްސަލަ ހުށައެޅި ފަރާތުން އެމައްސަލަ އިތުރަށް ކުރިއަށްގެންދަން ބޭނުން ނުވާތީކަމަށްވެސް ފުލުހުން ބުންޏެވެ. އެހެންކަމުން އެމީހުން ދޫކޮށްލާފައިވާކަމަށާއި، ނަމަވެސް އެ މައްސަލަ ފުލުހުން އިތުރަށް ތަހުގީގްކުރަމުން އަންނަކަމަށް ފުލުހުން ބުންޏެވެ.
