ރާއްޖޭގައި ބާއްވާ އެންމެ ޝަރަފްވެރި ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕް ފުޓްބޯޅަ މުބާރާތުގެ ގުރު ނަގައިފިއެވެ.
މި މުބާރާތުގެ ގުރު ނެގުމުގެ ރަސްމީޔާތު ރޭ ކުރިޔަށް ގެންގޮސްފައިވަނީ ޕީއެސްއެމްގެ ދަށުން ހިންގާ ޓީވީއެމްގައެވެ. ކްލަބް މޯލްޑިވްސް ކަޕްގެ އިތުރުން މި މުބާރާތުގެ އަންހެން ޑިވިޝަން ކަމަށްވާ "ވުމެންސް ފުޓްސަލް ފިއެސްޓާ" ގެ ގުރުވެސް ރޭ ވަނީ ނަގާފައެވެ.
މިފަހަރުގެ ކްލަބް މޯލްޑިވްސް ކަޕްގައި 32 ޓީމެއް ވާދަކުރެއެެވެ. މި ޓީމުތައް ވަނީ 6 ގްރޫޕަކަށް ބަހާލާފައެވެ.
މުބާރާތުގެ ގްރޫޕް އޭ ގައި ހިމެނޭ ޓީމްތަކަކީ، އެންމެ ފަހުގެ ޗެމްޕިއަން އުރީދޫ، ކަސްޓަމްސް ރެކްރިއޭޝަން ކްލަބްގެ އިތުރުން މީޑިއާނެޓް އަދި އެމްއޭސީއެލްއެވެ. ގްރޫޕް ބީ ގައި ހިމެނޭ ޓީމް ތަކަކީ، ޕޮލިސް ކްލަބާއި އެލައިޑާއި ޓްރޭޑް ކްލަބް އަދި ހުޅުމާލެ ހޮސްޕިޓަލެވެ. ގްރޫޕް ސީ ގައި ހިމެނެނީ، ކްލަބް ވެމްކޯ، ސްޓެލްކޯ، ޔޫތު މިނިސްްޓްރީ އަދި މާލޭ ސިޓީ ކައުންސިލެއެވެ. ގްރޫޕް ޑީ ގައި ޔުނައިޓެޑް ބީއެމްއެލް، ފެން ކްލަބް، އާރްޑީސީ އަދި ކްލަބް އެޗްޑީސީ ހިމެނޭއިރު، ގްރޫޕް އީ ގައި ހިމެނުނު ޓީމް ތަކަކީ، އިމިގްރޭޝަން، ދިރާގު، އެފްއެސްއެމް، ޓީމް އެމްއެންޕީއެޗްއައި އެވެ. ގްރޫޕް އެފްގައި ޕްރިޒަން ކްލަބް، އޭވިއޭޝަން ސެކިއުރިޓީ އަދި ޓީމު ފެނަކައިގެ އިތުރުން އާރްއޯއެލް ހިމެނުނުއިރު، ގްރޫޕް ޖީ ގައި ލައްވާލި ޓީމް ތަކަކީ އެމްޕީއެލް، ޑީއެސްސީ، ސިވިލް ކޯޓު، ކްލަބް 220 އެވެ. ގްރޫޕް އެޗްގައި ހިމެނުނީ އެސްޓީއޯ، އެމްޓީސީސީ، އެމްއެމްއޭ ސޯޝަލް ކްލަބް، މޯލްޑިވް ގޭސްއެވެ.
ކްލަބް މޯލްޑިވްސް ކަޕާއެކު ކުރިޔަށްދާ ވުމެންސް ފުޓްސަލް ފިއެސްޓާގައި މިފަހަރު 8 ޓީމު ވާދަކުރެއެވެ. މި 8 ޓީމު ވަނީ 2 ގްރޫޕަކަށް ބަހާލާފައެވެ. އެގޮތުން ގްރޫޕް އޭގައި ހިމެނޭ ޓީމް ތަކަކީ، އެންމެ ފަހުގެ ރަނަރަޕް ޕޮލިސް ކްލަބާއެކު ދެން ހިމެނެނީ ދިވެހި ސިފައިންގެ ކްލަބާއި ސިޓީ ކައުންސިލްގެ އިތުރުން ޓްރޭޑް ކްލަބެވެ. އެންމެ ފަހުގެ ޗެމްޕިއަން އެމްޕީއެލް އާއެކު ގުރޫޕް ބީ ގައި ހިމެނެނީ ޓީމް ފެނަކަ އާއި ކްލަބް މިނިސްޓްރީ އޮފް ޔޫތު އެންޑް ސްޕޯޓްސް އާއި ކްލަބް ވެމްކޯ އެވެ.
ކޮންމެ އަހަރަކުވެސް ފޯރިއާއެކު ބާއްވަމުން އަންނަ ކްލަބް މޯލްޑިވްސް ކަޕް ފުޓްބޯޅަ މުބާރާތް މިއަހަރު މި ބާއްވަނީ އެއް އަހަރު ދުވަހުގެ މެދުކެނޑުމަކަށްފަހުއެވެ. މިދިޔަ އަހަރު މި މުބާރާތް ކުރިޔަށް ނުގެންދެވުނީ ކޯވިޑް-19 ގެ ސަބަބުންނެވެ.
މި މަހުގެ 20 ވަނަ ދުވަހު ކުލަބު މޯލްޑިވްސް ކަޕް ފަށާއިރު، މި އަހަރުގެ މުބާރާތް އެންމެ ފުރަތަމަ ތާވަލުކުރީ މެއި މަހަށެވެ. އެކަމަކު ކޯވިޑް-19 ގެ ސަބަބުން މުބާރާތް ފަސްކުރަން ޖެހުނީއެވެ.
