ސިޔާސީ ބޭފުޅުންގެ ނުފޫޒުން ޖުޑިޝަލް ސާވިސް ކޮމިޝަން (ޖޭއެސްސީ) މިނިވަން ވާންޖެހޭ ކަމުގައި ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެއެވެ.
ދިޔާނާ މިފަދައިން ވިދާޅުވީ އެޗްއާރުސީއެމްއިން ބަލަމުންދިޔަ މައްސަލައެއްގައި ބައެއް ފަރާތްތަކަށް ދައުވާ ކުރުމަށް ޕީޖީއަށް ފޮނުވުމާއި ގުޅިގެން އެކަމާއި ހިތްހަމަ ނުޖެހި ޖުޑިޝަލް ސާވިސް ކޮމިޝަންގައި އިންނަވާ ރައްޔިތުންގެ މަޖިލީޙުގެ ރައީސް މުހައްމަދު ނަޝީދު ހިތްހަމަ ނުޖެހުން ފާޅު ކުރުމާއި ގުޅިގެންނެވެ. ދިޔާނާ ވިދާޅުވީ ރާއްޖޭގެ ޝަރުއީ ކޯޓުތަކަށް ސީދާ ގޮތުންނާއި ނުސިދާ ގޮތުން ނުފޫޒު ފޯރުވުމަށް، ޖުޑިޝަލް ސާވިސް ކޮމިޝަންގައި ތިއްބަވައިގެން ކުރައްވާ މަސައްކަތްތަކަކީ ބަލައި ގަނެވޭނެ މަސައްކަތްތަކެއް ނޫންކަމަށެވެ.
ސިޔާސީ ބޭފުޅުންގެ ނުފޫޒުން ޖޭއެސްސީ މިނިވަން ވާންޖެހޭ. ކޯޓުތަކަށް ނުސީދާ ގޮތުގައި ނުފޫޒު ފޯރުވަން ސިޔާސީ ބޭފުޅުން ޖޭއެސްސީގައި ތިއްވުން ގޯސް.
– ދިޔާނާ ވިދާޅުވިއެވެ.
ޖުޑިޝަލް ސާވިސް ކޮމިޝަން (ޖޭއެސްސީ) މިހާރު އެތުރިފައި އޮތް ގޮތަށް ހެޔޮ ބަދަލުތަކެއް ގެނައުމަކީ ރައީސް އިބްރާހީމް މުހައްމަދު ޞާލިހްގެ ރިޔާސީ ވައުދުފުޅެކެވެ. ނަމަވެސް ވެރިކަމުގެ ތިން އަހަރު ނިމުމަށް މަދު ދުވަސްކޮޅަކަށް ވެފައިވާއިރުވެސް ޖޭއެސްސީއަށް އެއްވެސް ބަދަލެއް ގެނެސްފައި ނުވެއެވެ. ނަމަވެސް މަޖިލިސް ރައީސް އިސްވެ ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަށް ބަދަލު ކުރުމަށް ކުރައްވާ މަަސައްކަތުގައި މިދިޔަ ހަފްތާގައި މަޖިލީހުގައި ވާހަކަ ދައްކަވަމުން މަޖިލިސް ރައީސް ވިދާޅުވީ އެމަނިކުފާނު ސިޔާސީ ޕާޓީތަކާއި މަޝްވަރާ ކުރައްވާފައިވަނީ ޖޭއެސްސީ އެކުލަވާލާފައިވާ ގޮތް ބަދަލުކުރާނަމަ ގާނޫނުއަސާސީ އިސްލާހު ކުރުމަށް ކަމުގައެވެ.
ޖޭއެސްސީ އެކުލަވާލާފައިވާ ގޮތް ބަދަލުކުރާނަމަ ގާނޫނުއަސާސީ އިސްލާހުކުރަންޖެހޭނެއެވެ. ގާނޫނުއަސާސީއަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރު ބައިކުޅަ ތިންބައިގެ އަޣުލަބިއްޔަތުން ފާސްކުރާ ގާނޫނަކުންނެވެ.
