ރައްޔިތުންގެ މަޖިލީހުގެ ޖަލްސާތަކުގައި ވާހަކަ ދައްކަވައިރު އެއްމެމްބަރަކު އަނެއް މެމްބަރަކަށް "އިއްޒަތްތެރި މެމްބަރުން" ނުކިޔައި ވާހަކަ ދައްކަވާތީ ދިއްގަރު ދާއިރާގެ މެމްބަރު އިކްރާމް ހަސަން ކަންބޮޑުވުން ފާޅު ކުރައްވައިފިއެވެ.

މެމްބަރު އިކްރާމް ވަނީ މީގެ ކުރިންވެސް އެކި ހާލަތްތަކުގައި މެމްބަރުންނަށް ލިބޭ އިއްޒަތާއިމެދު ކަންބޮޑުވުން ފާޅު ކުރައްވައި އެކި ވާހަތައް ދައްކަވާފައެވެ. މިއަދުގެ ޖަލްސާގައި ހިޔާ ފްލެޓްގެ އަގު ކަނޑައެޅުމާއި ގުޅޭ ގޮތުން މާވަށު ދާއިރާގެ މެމްބަރު މުހައްމަދު ސައީދު ވާހަކަ ދައްކަވަމުން ގެންދެވިއިރު، އިއްޒަތްތެރި މެމްމަބަރުން ނުކިޔައި ވާހަކަ ދެއްކެވެމުން، އިކްރާމް ވަނީ ނިޒަމީ ނުކުތާ ނަންގަވައި މެމްބަރުންނާއި މުޚާތަބު ކުރާއިރު އިއްޒަތްތެރި މެމްބަރުން ކިޔުމަށް ދަންނަވާފައެވެ. އަދި އިއްޒަތްތެރި މެމްބަރުން ނުކިޔާނަމަ ނުހަނު ކަންބޮޑުވާކަމަށްވެސް އިކްރާމް ވިދާޅުވިއެވެ.

އާދެ ހަމަ ތަކުރާރުކޮށް އިނގޭތޯ އިއްޒަތް ނުކިޔާތީވެ އިނގޭތޯ. އަޅުގަނޑު ހަމަ ކަންބޮޑުވޭ މަޖިލީހުގައި އިއްޒަތްތެރި މެމްބަރުން ކިޔަން ޖެހޭނެ އިނގޭތޯ.

– އިކްރާމް ވިދާޅުވިއެވެ.

އިކްރާމްގެ ކުރިން މިމްއަސާގައި ސައީދު ވާހަކަ ދައްކަވަމުން ދިޔައިރު އިއްޒަތްތެރި މެމްބަރުން ނުކިޔާތީ މާފަންނު މެދު ދާއިރާގެ މެމްބަރު އިބްރާހިމް ރަޝީދުވެސް ވަނީ ކަންބޮޑުވުން ފާޅުކޮށް ނިޒާމީ ނުކުތާ ނަގައި އެކަން ރިޔާސަތުގެ ސަމާލުކަމަސް ގެނެސްފައެވެ.

މަޖިލިސްގެ ރިޔާސަތުގައި އެވަގުތު އިންނެވި ވިލިފުށި ދާއިރާގެ މެމްބަރު ހަސަން އަފީފް ވިދާޅުވީ މަޖިލީހުގެ ގަވާއިދުގައި މެމްބަރުން ވާހަކަ ދައްކަވާއިރު، އެއްމެމްބަރަކު އަނެއް މެމްބަރަކަށް މުޚާތަބު ކުރައްވާއިރު އިއްޒަތްތެރި މެމްބަރު ކިޔަން ޖެހޭނެ ކަމަށެވެ. އަދި މެމްބަރުން ވާހަކަ ދައްކަވާއިރު އެކަމަށް ސަމާލުކަން ދެއްވައިގެން ވާހަކަފުޅު ކުރިއަށް ގެންދިއުމަށް އަފީފް ވަނީ އެދި ވަޑައިގެންފައެވެ.