އައްޑޫ ސިޓީގެ ގަމުގައި ހިންގަމުން ގެންދިޔަ އޭޝިއަން އެކަޑަމީ އޮފް އެއިރޮނޯޓިކްސް (އޭއޭއޭ)ގެ މަސައްކަތްތައް ރެގިއުލޭޓް ކުރުމުގައި މޯލްޑިވްސް ސިވިލް އޭވިއޭޝަން އޮތޯރިޓީން ވެފައިވާ ބޮޑެތި އިހުމާލުތަކެއް އޮޑިޓް އޮފީހުން ފެންމަތިކޮށްފިއެވެ.
އޮޑިޓުގައި ބަލާފައިވަނީ 2018 އިން 2020 އަށް ސިވިލް އޭވިއޭޝަނުން ކޮށްފައިވާ މަސައްކަތުގެ ޕާފޯމެންސަށެވެ. ނަމަވެސް ބައެއް ކަންކަމުގެ ޒާތުން 2018 ވަނަ އަހަރުގެ ކުރިން ހިނގާފައިވާ ކަންކަމަށާއި އަދި 2020 ވަނަ އަހަރުގެ ފަހުން ހިނގާފައިވާ ބައެއް ކަންކަމަށް ވެސް އޮޑިޓްގައި ބަލާފައިވެއެެވެ. އޮޑިޓްގައި ފާހަގަކުރެވުނު މައިގަނޑު 10 ކަމެއް ރިޕޯޓްގައި ފާހަގަކޮށްފައިވެއެވެ.
މި ރިޕޯޓްގައި ބުނެފައިވަނީ ސިވިލް އޭވިއޭޝަން އޮތޯރިޓީން 2020 ވަނަ އަހަރު ފްލައިން ސްކޫލްގައި ބޭނުންކުރި ތިން މަތިންދާ ބޯޓެއްގެ އެއާވާދިނަސް ރިވިއުގައި ފާހަގަކުރެވުނު ކަންކަން އިސްލާހު ކުރުމަށް ދީފައިވާ މުއްދަތުގައި އެ ކަންކަން އޭއޭއޭ އިން އިސްލާހުކޮށްފައި ނުވާ ކަމަށެވެ. އެކަމަކު އިސްލާހު ކުރަން ދިން މުއްދަތު ހަމަވެ، ފިޔަވަޅު އެޅުމަށް ސިވިލް އޭވިއޭޝަނަށް އިތުރު 43 ދުވަސް އަދި 44 ދުވަސް ނެގި ކަމަށް ފާހަގަކޮށްފައިވެއެވެ.
އޮޑިޓް ރިޕޯޓުގައިވާގޮތުން މޯލްޑިވްސް ސިވިލް އޭވިއޭޝަން އޮތޯރިޓީގައި އޭޝިއަން އެކަޑަމީ އޮފް އެރޮނޮޓިކްސްގެ ހިންގުމުގެ ގާބިލުކަން ބަލާނެ އިންތިޒާމުތައް ހަމަޖެހިފައި ވީނަމަވެސް، މި އިންތިޒާމުތަކުގެ ތެރެއިން އަޅާފައިވާ ފިޔަވަޅުތަކުގެ ނަތީޖާ ހާސިލުވަމުން ނުދާކަން ފާހަގަކުރެވިފައިވެއެވެ. އެގޮތުން، ފްލައިން ސްކޫލް ހިންގުމުގައި މިހާރު ދިމާވެފައިވާ މައްސަލަތައް ހައްލުކުރެވިފައި ނުވާކަމާއި، މިހެންދިމާވާ ސަބަބުތަކުގެ ތެރޭގައި ހިންގުމުގެ ގާބިލުކަން ބެލުމުގައި އޮތޯރިޓީން ހަދާފައިވާ އޮޑިޓްތަކުގައި ފާހަގަވި މައްސަލަތައް އިސްލާހުކުރުވުމަށް އެކަށީގެންވާ ފިޔަވަޅު އަޅާފައި ނުވުމާއި އޮޑިޓްކުރުމުގައި ގެންގުޅެފައިވާ އުސޫލުތައް ހަރުދަނާ ނުވުން ހިމެނޭ ކަމަށް އޮޑިޓް އޮފީހުން ބުނެފައިވެއެވެ.
އަދި މިހާރުގެ އޭވިއޭޝަން ދާއިރާގެ ހާލަތަށް އެކަށީގެންވާ ގޮތަށް އޭވިއޭޝަން ގާނޫނުތަކާއި ގަވާއިދުތަކަށް ގެންނަންޖެހޭ ބަދަލުތައް ގެނެސްފައި ނުވުމުންނާއި، ރާއްޖޭގައި ފްލައިން ސްކޫލެއް ހިންގާ އިތުރު ފަރާތެއް ނެތްއިރު، ފްލައިން ސްކޫލުގެ ފްލައިޓްތައް ގްރައުންޑްކޮށް، އޮޕަރޭޝަންތައް ސަސްޕެންޑްކޮށްފިނަމަ، ދަރިވަރުންނަށް ލިބިދާނެ ގެއްލުން ފެންނާތީ ފްލައިން ސްކޫލަށް ފިޔަވަޅު އެޅުމަށް އޮތޯރިޓީއަށް ދަތިވެފައި ވުމުގެ ސަބަބުންވެސް މި މައްސަލަތަކަށް ހައްލު ލިބިފައި ނުވާކަން އޮޑިޓް ރިޕޯޓުގައި ފާހަގަކުރެވިފައިވެއެވެ.
ދަރިވަރުންގެ ހައްގުތަކާއި، ފޯރުކޮށްދޭންޖެހޭ ރައްކާތެރިކަން ފޯރުކޮށްދިނުމުގެ މަސައްކަތް ހަރުދަނާ އުސޫލަކުން ބެލިފައިނުވަނީ ދަރިވަރުންގެ ހައްގުތައް ކަށަވަރުކޮށް، އެ ދަރިވަރުންނަށް ރައްކާތެރިކަން ފޯރުކޮށްދީ، އެކަން މޮނިޓަރ ކުރުމުގެ ޒިންމާ ސީދާ ވަކި އިދާރާއަކާއި ސާފުކޮށް ގާނޫނުން ނުވަތަ ގަވާއިދަކުންވެސް މަތިކޮށްފައި ނުވާތީކަމުގައި ދެކޭ ކަމަށް އޮޑިޓް އޮފީހުން ބުނެފައިވެއެވެ.
އެހެންކަމުން އޮޑިޓުން ފާހަގަކުރެވުނު ކަންކަން އިސްލާހުކުރަން އަމަލުކުރެވިދާނެ ގޮތުގެ 17 ލަފާއެއް ދީފައިވާއިރު، މީގެތެރޭގައި މައިގަނޑުގޮތެއްގައި ހިމެނެނީ އެއަރވޯދިނެސް ރިވިއުގައި ފާހަގަކޮށްފައިވާ ކަންކަން އިސްލާހުކުރާނެގޮތުގެ ޕްލޭން ހުށަނާޅާނަމަ އެކަމަށް އުސޫލެއް ކަނޑައަޅައި އުސޫލާ އެއްގޮތަށް އެފަރާތްތަކާއިމެދު ފިޔަވަޅު އެޅުމަށެވެ. އޭވިއޭޝަން ގަވައިދުތަކާ ތަކުރާރުކޮށް ޚިލާފުވާ ފަރާތްތަކުގެ ކަންކަން އިތުރަށް ބަލައި، އެމީހުންނާމެދު އަލމަލުކުރާނެ ވަކި ސްޓްރެޓެޖީއެއް އެކުލަވާލުން ހިމެނެއެވެ.
ކޮމެންޓު ފޮނުވާ