ހެޔޮ ބަސް ބުނުމަކީ މުޖުތަމަޢުއަށް އެކަމުގެ ސަބަބުން ހެޔޮ އަސަރުކުރާނެކަމެއްކަމަށާއި، ހެޔޮސަބސް ބުނުމަކީ ޞަދަޤާތެއްކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"ހެޔޮބަސް ބުނުން" މި މަޢުޟޫގެ މައްޗަށް މިއަދު ރާއްޖޭގެ މިސްކިތްތަކުގައި ދެއްވި ހުކުރު ޚުޠުބާގައި ވިދާޅުވީ، ހެޔޮ ބަހަކީ ރަނގަޅު ގަހަކުން ނުކުންނަ ފައިދާހުރި
މޭވާއެއްކަމަށެވެ. އެއީ ހިނިތުންވުން ގެނެސްދޭ ކަމެއްކަމަށާއި، ހެޔޮ ބަސް ބުނެ އުޅުމަކީ ވާހަކަ ދައްކާ މީހާގެ ޝަޚްޞިއްޔަތު އަންގައިދޭ ކަމެއްކަމަށް ވިދާޅުވިއެވެ. އެއީ އޭނާގެ ފޭރާންކަމަށާއި، އެއީ މީސްތަކުންގެ ހިތްތައް ހުޅުވައިދޭ ތަޅުދަނޑިކަމަށް ޚުޠުބާގައި ސިފަކުރެއްވިއެވެ. އެއީ މާތް ﷲ ގެ ޙަޟްރަތަށް އޭނާގެ މެސެޖްތައް
ގެންގޮސްދޭ ސަފީރުކަމަށާއި، ހެޔޮ ބަހެއް މެނުވީ މާތް ﷲ ގެ ޙަޟްރަތަކަށް ނުފޯރާނެކަމަށްވެސް ޚުޠުބާގައި ވިދާޅުވިއެވެ.
ހެޔޮ ބަހެއް ބުނުމަކީ ބޮޑު ހޭދައެއް ކުރަން ޖެހޭ ކަމެއް ނޫންކަމަށާއި، އޭގައި ހިމެނޭނީ އެ ބަސް ބުނާ މީހާ އަށާއި އަޑު އަހާ މީހާ އަށް މަންފާ އާއިލާބަ ކަމަށް ޚުޠުބާގައި ބަޔާންކުރެއްވިއެވެ. އެ ބަހުގައި ފުރައްސާރަ ކުރުމެއް، ނެތިމޮށުމެއް، ހުތުރު އެއްޗެހި ކިޔުމެއް ނުހިމެނޭނެ ކަމަށާއި، ހެޔޮ ބަހަކީ މާތް ﷲ ހަނދުމަކުރުމާއި ތަޙްލީލާއި ތަޙްމީދާއި ތަސްބީޙަ ފައިދާކުރަނިވި ޢިލްމެއް ފެތުރުމާއި ހެޔޮކަންތަކަށް އަމުރުކުރުމާއި މުންކަރާތްތައް ނަހީކުރުންކަމަށްވެސް ބަޔާންކުރެއްވިއެވެ.
އެއީ މީސްތަކުންނަށް ނަސޭހަތް ދިނުމާއި ސީދާ މަގަށް މަގުދެއްކުމެވެ. ހެޔޮ ބަހަކީ ހެޔޮ ގަހެއް ފަދަ އެއްޗެކެވެ. އެ ގަހުގެ ހިޔާ ބޮޑެވެ. އެ ގަހުގެ
މަންޒަރު ރީއްޗެވެ. އެ ގަހުގެ ވަސް މީރެވެ. އެ ގަހުގެ މޭވާ ފޮންޏެވެ. އެ ގަހުގެ ފައިދާ ގިނަގުނަ އެވެ. އެ ގަހުގެ މޫތައް ވަރުގަދަ އެވެ. އެއީ އަބަދުވެސް މަތިވަރު ރަނގަޅު ގަހެކެވެ. އެއީ އަބަދު ވެސް މޭވާ އަޅައި ފުރިފައިވާ ގަހެކެވެ. އެ ގަހުގެ މޭވާ ދުވަހަކު ވެސް މި ފަދަ ގަސް ހެދުމަށް ރަނގަޅު ބިމަކަށް ބޭނުން ވެއެވެ. މިރަނގަޅު ބިމަކީ މާތް ﷲ އަށް އަޅުކަން ކުރާ ޞާލިޙު މުއުމިނާގެ ނަފްސެވެ. އެ ފަދަ ނަފްސެއްގެ ވެރިއަކަށް ވެވޭނީ، މާތް ﷲގެ ޚަލްޤުތަކުންނާ އެކު ރިވެތި ގޮތުގައި މުޢާމަލާތް ކުރާ މީހަކަށެވެ. އަޅުގަނޑުމެންގެ ދަރިން މި ފަދަ ނަފްސުތަކެއްގެ ވެރި ބަޔަކަށް ހެދޭނީ، ޢާއިލީ ރަނގަޅު ތަރްބިޔަތާއި، ރީތި ނަމޫނާ އާއި، މަދްރަސީ ރަނގަޅު ތަރްބިޔަތާއި ޞާލިޙު ރަނގަޅު ވެށްޓެއް، އެ ކުދިންނަށް ހޯދައިދީގެންނެވެ. މި ތިން މާޙައުލަކީ ގަހެއް ރުކެއް ނުހެދޭ، ދިރުމެއް ނެތް، މަރުވެފައިވާ ބިމެއް ފަދަ މާޙައުލަކަށް ވެއްޖެ ނަމަ އަޅުގަނޑުމެންގެ ދަރިންގެ ހިތްތަކުގައި ހެޔޮ ބަސް ބުނުމުގެ އާދަ އަށައެއް ނުގަންނާނެ އެވެ. އެ ފަދަ އުފެދި ބޮޑުވާ ބައެއްގެ ސަބަބުން މުޖްތަމަޢު އެއްބައިވަންތައެއް ނުކުރެވޭނެ އެވެ.
– ހުކުރު ޚުޠުބާ
ހުކުރު ޚުޠުބާގައިވަނީ، ނުބައި ބަސްތަކުގައި ހަރުދަނާކަމެއް ނުހުންނަން ބަޔާންކުރައްވާ، އޭގެ ސަބަބުން މީސްތަކުންގެ މެދުގައި ފިތުނަފަސާދަ އުފެދޭނެ އެވެ. އެފަދަ ބަސްތަކުގެ ސަބަބުން މީހުންނަށް މަގު އޮޅޭނެކަމަށް ވިދާޅުވެފައެވެ. އެކަކު އަނެކަކާ ޖެހި، މޫނުކެނޑޭނެ އެވެ. މީހުން މަގުފުރެދި، ޙައްޤުގެ މަގަށް ހުރަސް އެޅޭނެ ކަމަށް ޚުޠުބާގައި ވިދާޅުވިއެވެ. މި މުޖުތަމަޢުން މިފަދަ ނޭދެވޭ ޢަމަލުތައް ފެންނަކަމީ ހިތާމަހުރި ކަމެއްކަމަށާއި، ހަޤީޤަތާއި ޚިލާފު ދޮގު ވާހަކަތައް މީސްތަކުންގެ
މެދުގައި ފަތުރައި ފިތުނަފަސާދަ އުފައްދަން މަސައްކަތް ކުރުމަކީ މާތް ﷲ ނަހީކުރައްވާފައިވާ ކަމެއްކަމަށްވެސް ޚުޠުބާގައި ވިދާޅުވިއެވެ.
އިންސާނާގެ ނަފްސުގެ މައްޗަށް ވެރިވެގަނެ، އޭނާ ހެއްލެނިކުރުމަށް ޝައިޠާނާ އަބަދުވެސް މަސައްކަތް ކުރާނެތެވެ. އޭނާ އަށް ހަޑިހުތުރު ޢަމަލުތައް ޒީނަތްތެރިކޮށްދީ، ވަސްވާސް ދޭނެތެވެ. މިކަމުގެ ސަބަބުން އޭނާ ހަޑިހުތުރު ބަސް ބުނެ އެވެ. ދޮގު ވާހަކަ ދައްކަ އެވެ. ނެތި މޮށެ އެވެ. ޣީބަ ބުނެ އެވެ. ދޭތެރެޖައްސަ އެވެ. އިންސާނުންނަށް އިސްލާމީ ތަރްބިޔަތު މުހިއްމު ވަނީ މިހެންވެއެވެ. އިސްލާމީ އަދަބުތަކާއި އަޚްލާޤަށް އިންސާނާ ބޭނުންވަނީ މިހެންވެއެވެ. އޭނާ ބުނާ ބަސްތަކާ މެދު އޭނާ ޒިންމާ ވާންޖެހޭނެކަން ދަސްކޮށްދީ އޭނާގެ ދުލުން ހެޔޮބަސް ބުނުން އާދަކޮށްދިނުމަށްޓަކައެވެ.
– ހުކުރު ޚުޠުބާ
ޙުޠުބާގައިވަނީ ހެޔޮބަސް ބުނުން ވާޖިބުވާ މީހުންގެ ތެރޭގައި މައިންބަފައިން ހިމެނޭކަމަށް ވިދާޅުވެފައެވެ. އެމީހުންނާއި މުޚާޠަބުކުރާއިރު ބަސްމަގު ރިވެތިވާން ޖެހޭނެކަމަށްވެސް ޚުޠުބާގައި ވިދާޅުވިއެވެ. އަދި ދެމަފިރިންވެސް އެކަކު އަނެކަކަށް މުއާމަލާތްކުރަންވާނީ ރިވެތި ބަހުންކަމަށްވެސް ޚުޠުބާގައި ބަޔާންކުރެއްވިއެވެ. ރިވެތިބަހުން މުޢާމަލާތްނުކޮށް ދެމަފިރުން ހުތުރުބަހުން މުއާމަލާތްކުރާނަމަ މާތްﷲ ކައިވެނީގައި ލެއްވި މަޤްޞަދު ގެއްލި ދެމަފިރިން ހަތުރުންނަށްވެ ވަރިފަށަށް އަރާނެކަމަށްވެސް ޚުޠުބާގައި ވިދާޅުވިއެވެ.
ޚުޠުބާގައިވަނީ، ދެމަފިރިންގެ މެދުގައްޔާއި، އަޚުންނާއި އުޚްތުންގެ މެދުގައްޔާއި، ގާތްތިމާގެ މީހުންގެ މެދުގައްޔާއި، އަވަށްޓެރިންގެ މެދުގައްޔާއި، ބާޒާރުމަ
ބާޒާރުމަތީގައި ގަނެވިއްކުމުގެ މުޢާމަލާތް ތަކުގައްޔާއި، މުވައްޒަފުންގެ މެދުގައްޔާއި، ޚިދުމަތް ހޯދުމަށް އޮފީސްތަކަށް ދާ މީހުންނާއި ޚިދްމަތްދޭ ފަރާތްތަކާ ދެމެދު، މުޢާމަލާތް ކުރެވެން ޖެހޭނީ ރިވެތި ބަހުންކަމަށް ވިދާޅުވެފައެވެ. އަދި ޑުރައިވަރުންނާއި ފަސިންޖަރުންނާ ދެމެދު، ދަރިވަރުންނާއި މުދައްރިސުންނާ ދެމެދު ވެސް، އަދި ހުރިހާ ފަންތިއަކާއި ގިންތިއެއްގެ މީހުންނާ ވެސް މުޢާމަލާތު ކުރަން ޖެހޭނީ ރިވެތި ބަހުންކަމަށް ވިދާޅުވެ ހެޔޮ ބަސް ބުނުންމަތީ ދެމިހުރުމަށް ނަސޭހަތްތެރިވެވަޑައިގެންފައެވެ.
