ގާތް ގަޑަކަށް 6 ގަޑިއިރަށް، މަޝްހޫރު ސޯޝަލް މީޑިއާ ޕްލޓްފޯމް، ފޭސްބުކްގެ ޚިދުމަތް މެދުކެނޑިގެން ކުރިމަތިވީ ދަތިތަކަށް، ފޭސްބުކްގެ ބާނީ، މާރކް ޒުކަރބާގް މާފަށް އެދިއްޖެއެވެ.
ރޭގެ ވަގުތެއްގައި، ފޭސްބުކްއަށް ދިމާވި ކުއްލި ޓެކްނިކަލް މައްސަލައެއްގެ ސަބަބުން އެ ޕްލްޓެފޯމުގެ ޚިދުމަތް މެދިކެނޑި، ދުނިޔޭގެ އެކި ކަންކޮޅުތަކުގައި ތިބި ފޭސްބުކް ބޭނުންކުރާ 3.5 ބިލިއަން މީހުންނަށް އޭގެ ދަތިކަން ވަނީ ފޯރާފައެވެ.
ފޭސްބުކްގެ ބާނީ، އަދި ބިލިއަނަރ މާރކް ޒުކަރަބާގް ވިދާޅުވެފައިވަނީ، ރޭގެ ޖީއެމްޓީ ގަޑިން ހަވީރު 4:00 ގައި ފޭސްބުކްގެ ޚިދުމަތް ކެނޑި އަދި އެއަށްފަހު، ފޭސްބުކް މެސެންޖަރ، ވަޓްސްއެޕް އަދި އިންސްޓަގްރާމްގެ ޚިދުމަތްވެސް މެދުކެނޑިގެން ދިޔައީ ކުރިމަތިވި އިންޓަރނެޓާ ގުޅުންހުރި ޓެކްނިކަލް މައްސަލައެއްގެ ސަބަބުން ކަމުގައެވެ.
ފޭސްބުކްގެ ޚިދުމަތް މެދުކެނޑިގެން ދިއުމާއެކު، ޚިދުމަތް އަލުން އޮންލައިން ކުރުމަށްޓަކާ ކުރެވިގެންދިޔަ މަސައްކަތަކުގެ ނަތީޖާއެއްގެ ގޮތުން، އަލުން ފޭސްބުކް އޮންލައި ވެފައިވަނީ ޖީއެމްޓީ ގަޑިން ރޭގަޑު 11:00 ގައެވެ.
ފޭސްބުކްގެ ޚިދުމަތް ކުއްލިއަކަށް މެދުކެޑިގެން ދިއުމާއެކު، ރައްޓެހިންނާއި އަދި ގާތްތިމާގެ އާއިލީ ފަރާތްތަކާ ގުޅުން ދެމެހެއްޓުގައި މި ޕްލެޓްފޯމަށް ބަރޯސާވާ އެތައްހާސް ބަޔަކުވަނީ އެތައް ގަޑިއިރަކަމަށް މި ޚިދުމަމަތުން މަޙްރޫމް ވެފައެވެ.
ހަމައެއާއެކު، ދުނިޔޭގެ އެކި ކަންކޮޅުތަކުގައި، ވިޔަފާރިކުރުމުގައި ކަސްޓަމަރުންނާއި ގުޅުން ދަމަހައްޓާ ވިޔަފާރީގެ މުއާމަލާތު ކުރުމުގައި ސޯޝަލް މީޑިއާގެ ޕްލެޓްފޯމުތައް ބޭނުން ކުރަމުންދާ ވިޔަފާރިތަކަށްވެސް މި ވަގުތުގެ ތެރޭގައި ބޮޑެތި ގެއްލުންތަކާ ކުރިމަތި ލާންޖެހިފައި ވެއެވެ.
އަދި މީގެއިތުރުން، ބިޒްނަސް ވެބްސައިޓެއް ކަމުގައިވާ، ފޯޗުން ޓްރެކިންގ ސޮފްޓްވެއަރއިން ރިޕޯޓު ކޮށްފައިވާ ގޮތުގައި، ފޭސްބުކްގެ ޚިދުމަތް މެދުކެނޑިފައި ވަނިކޮށް، ކުއްލިއަކަށް ފޭސްބުކްގެ ޙިއްސާގެ އަގު ވެއްޓިގެން ދިއުމާގުޅިގެން ޒުކުބާގެ އަމިއްލަ މިލްކިއްޔާތުންވެސް ވަނީ 4.4 ބިލިއަން އެމެރިކާ ޑޮލަރު ގެއްލުން ވެފައެވެ.
މެދުކެނޑޭ މިބާވަތުގެ ޚިދުމަތްތަކުގެ ރެކޯޑް ބަހައްޓާ "ޑައުންޑިޓެކްޓަރ" އިން ހާމަކޮށްފައިވާ ގޮތުގައި، ފޭސްބުކްގެ ޚިދުމަތް މެދުކެޑިގެންދިޔަޔަ މަދު ގަޑިއިރެއްގެ ތެރޭގައި، ދުނިޔޭގެ އެކި ކަންކޮޅުތަކުން 10.6 މިލިއަން މައްސަލަ ވަނީ ރިޕޯޓު ކޮށްފައެވެ. މިއީ މިފަރާތައް މުޅި ތާރީޚުގައި މައްސަލަތައް ރިޕޯޓު ކޮށްފައިވާ އެންމެ މަތީ އަދަދެވެ.
ފޭސްބުކްއިން ފަހުން ބުނެފައިވަނީ، މި މައްސަލަ ކުރިމަތިވެ، އެ ޕްލެޓްފޯމް އޮފްލައިން ވެގެން ދިޔައީ، ކޮންފިގަރޭޝަންއަށް ނުރަގަޅު ބަދަލެއް އައުމުގެ ސަބަބުން ކަމުގައެވެ. އަދި މީގެ އަސަރު ކޮށްފައިވަނީ ވެބްސައިޓްތަކާއި އެޕްލިކޭޝަންތަކަށް އެކަނި ނޫންކަމަށާއި، މި ޓެކްނިކަލް މައްސަލާއިގެ އަަސަރު އެކުންފުނީގައި ބޭނުންކުރާ އެހެނިހެން ޓޫލްތަކަށްވެސް ކޮށްފައިވާ ކަމުގައެވެ. މި ޓޫލްތަކުގެ ތެރޭގައި ކުންފުނިން ބޭނުންކުރާ އީމެއިލްތަކާއި އަދި މުވައްޒަފުން ބޭނުންކުރާ މަސައްކަތު ފާސްތައްވެސް ހިމެނޭކަމަށްވެސް ކުންފުނިން ހާމަ ކޮށްފައި ވެއެވެ.
