އިންޑިއާގެ މިނިވަންކަމުގެ ބާނީ، މަހާތަމާ ގާނދީއަކީ އޭނާގެ މުޅި ހަޔާތް، ހަމަނުޖެހުމާއި ތަޅާ ފޮޅުމަކީ އެއްވެސް ކަމެއްގައި ކާމިޔާބެއް ނެތްކަމެއްކަން ސާބިތު ކޮށްދެވި ބޭއްފުޅެއްކަމުގައި، އދ.ގެ އާންމު މަޖިލިހުގެ ރައީސް އަބުދުﷲ ޝާހިދު ވިދާޅު ވެއްޖެއެވެ.
އދ.ގެ އާންމު މަޖިލިހުގެ ރައީސް އަދި ރާއްޖޭގެ ފޮރިންގ މިނިސްޓަރ އަބުދުﷲ ޝާހިދު މިހެން ވިދާޅުވެފައިވަނީ، މިމަހުގެ 2 ވަނަ ދުވަހު ފާހަގަ ކުރެވުނު، ދުނިޔޭގައި ފާހަގަ ކުރެވުނު، ބައިނަލް އަގުވާމީ ހަމަ ނުޖެހުމަށް ހިތްވަރު ނުދޭ ދުވަހުގެ މުނާސަބަތުގައި ދެއްވި ޚާއްސަ މެސެޖެއްގައެވެ.
ކޮންމެ އަހަރެއްގެވެސް އޮކްޓޯބަރމަހުގެ 2 ވަނަ ދުވަހަކީ، އިންޑިއާގެ މިނިވަންކަމުގެ ބާނީ މަހާތަމާ ގާނދީގެ އުފަން ދުވަހާ ދިމާކޮށް، ބައިނަލް އަގުވާމީގޮތުން ފާހަގަކުރާ، "ހަމަނުޖެހުމަށް ހިތްވަރު ނުދޭ ދުވަހުގެ" ގޮތުގައި ފާހަގަ ކުރާ ދުވަހެވެ.
މިއަހަރު މިދުވަހުގެ މުނާސަބަތުގައި އަބުދުﷲ ޝާހިދު ވީޑިއޯ މެދުވެރިކޮށް ދެއްވި މެސެޖުގައި ވިދާޅުވެފައި ވަނީ "ގާނދީ ވަނީ، ބޭއިންސާފާއި ހަގުރާމަ ކުރަންޖެހުނު ހާލަތުގައިވެސް، އަދި ރުޅިވެރިކަމަކީ ހިތްވަރު ގަދަކަމާއި އިންސާފު ކަމުގައި އަހަރެމެންނަށް އިހުސާސްވާ ހާލަތްތަކުގައިވެސް، ސުލްހައާއި ހަމަޖެހުން އިޚްތިޔާރު ކުރައްވާފައި. ގާނދީ އެނާގެ މުޅި ހަޔާތް ބިނާކުރެއްވީ، ހަމަނުޖެހުމާއި ތަޅާ ފޮޅުމަކީ އެއްވެސް ހާލަތެއްގައި އެއްވެސް ބަޔަކަށް ފައިދާހުރި ހައްލެއް ނޫންކަން ސާބިތު ކޮށްދެމުން،" ކަމުގައެވެ.
"މިދުވަސް، (އޮކްޓޯބަރ 2 ވަނަ ދުވަސް) މަހާތަމާ ގާނދީގެ އުފަންދުވަހާ ދިމާވަނީ އިއްތިފާގުންނެއް ނޫން، މި ދުވަސް އަހަރެމެންނަށް ދަސްކޮށް ދެނީ، މިދުވަސް ނިސްބަތްވާ ޝަޚުސިއްޔަތު އަހަރެމެންނަށް ދަސްކޮށްދިން، ހަމަ ޖެހުމަށް ހިތްވަރުދޭން ފަސްޖެހެންވީ އެއްވެސް ސަބަބެއް ނެތްކަމުގެ ލެގަސީ،" ޝާހިދު ވިދަޅުވިއެވެ.
ކޮންމެ އަހަރަކުވެސް އޮކްޓޯބަރމަހުގެ 2ވަނަ ދުވަހު ބައިނަލްއަގުވާމީ ގޮތުން ފާހަގަ ކުރާ ދުނިޔޭގެ ހަނަނުޖެހުމަށް ހިތްވަރު ނުދިނުމުގެ ދުވަސް ފާހަގަ ކުރެވެމުންދަނީ މަހާތަމާ ގާނދީގެ އުފަންދުވަހާ ދިމާކޮށެވެ. މިދުވަސް މިގޮތަށް ފާހަގަ ކުރުމަށް ނިންމާފައިވަނީ 2007 ވަނަ އަހަރުގެ ޖޫންމަހުގެ 7 ވަނަ ދުވަހު، ޔޫއެންއިން ފާސްކޮށްފައިވާ އެ ޖަމިއްޔާގެ A/RES/61/271 ވަނަ ގަރާރުންނެވެ.
