މާލެ ސިޓީގައި މިހާތަނަށް ޤާއިމްކުރެވޭ އެންމެ ބޮޑު ޕާކިން ޒޯން ކާނިވާ ސަރަހައްދުގައި ތަރައްޤީ ކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
ކާނިވާ ސަރަހައްދުގެ ފަސްގަނޑު އެއްވަރުކޮށް، އެ ސަރަހައްދުގައި ގާ އެތުރުމުގެ މަސައްކަތް ފެށީ މިދިޔަ މަހުގެ ފަހު ހަފްތާގެ ތެރޭގައެވެ. ކާނިވާ ސަރަހައްދުގެ ފަސްގަނޑު އެއްވަރުކޮށް ގާ އެތުރުމުގެ މަަސައްކަތް ކުރަނީ ޕާކިން ޒޯނެއް ވެސް ހިމެނޭ ގޮތަށެވެ. ކާނިވާ ސަރަހައްދުގައި ތަރައްޤީކުރާ ސަރަހައްދު ނިމޭއިރު މަގުމަތީގެ ނިޝާންތަކާއި ޓްރެފިކް ނިޝާންތައްވެސް ހުންނާނެ ކަމަށް ސިޓީ ކައުންސިލުން ވަނީ ބުނެފައެވެ.
ޕާކިން ޒޯން ޑިޒައިން ކޮށްފައިވާ ގޮތުން ޕާކިން ޒޯންގައި މަދުވެގެން 500 ސައިކަލާއި 55 ކާރަށް ޕާކް ކުރެވޭނެއެވެ. އޭރުން މާލޭގައި ހުރި އެންމެ ބޮޑު ޕާކިން އޭރިއާ އަށް ވާނީ ވެސް ކާނިވާ ސަރަހައްދު ޒޯންކަމަށް ސިޓީ ކައުންސިލުން ވަނީ ބުނެފައެވެ.
މާލެ ސިޓީ ކައުންސިލުން ބުނެފައިވަނީ އެ ކައުންސިލުން މަސައްކަތްކުރަނީ ކާނިވާ ސަރަހައްދުގައި ގާ އަތުރައި އެ ސަރަހައްދުގައި ހަދާ ޕާކިންޒޯނުގެ މަސައްކަތް ވީހާވެސް އަވަހަކަށް ނިންމައި ރައްޔިތުންނަށް ޚިދުމަތް ދިނުމަށް ކަމަށެވެ.
މާލެ އަށް ދިމާވެފައިވާ ޕާކިން މައްސަލަ ހައްލުކުރުމަށް ސިޓީ ކައުންސިލްގެ ސްޓްރެޓެޖިކް އެކްޝަން ޕްލޭންގައި ބޮޑު އިސްކަމެއް ދީފައިވެމާއެވެ.
ކޮމެންޓު ފޮނުވާ