ބޮޑު މޮޅަކާއެކު ސިޓީ އާއި ލިވަޕޫލް ލީގު ކަޕްގެ ހަތަރު ވަނަ ބުރަށް

އިނގިރޭސި ލީގު ކަޕުގައި ރޭ ކުޅުނު މެޗުތައް ކާމިޔާބުކޮށް މެންޗެސްޓަރ ސިޓީ އާއި ލިވަޕޫލް ހަތަރު ވަނަ ބުރުން ޖާގަ ހޯދައިފިއެވެ.

ހަތަރު ވަނަ ބުރުން ޖާގައެއް ސިޓީ ހޯދީ ތިންވަނަ ޑިވިޝަނުގައި ވާދަކުރަމުން އަންނަ ވައިކަމް ވޮންޑަރާސްގެ މައްޗަށް 1-6 ގެ ނަތީޖާއަކުން ކުރި ހޯދައިގެންނެވެ. އަދި ލިވަޕޫލް ހަތަރު ވަނަ ބުރަށް ދަތުރުކުރީ ނޯވިޗް ސިޓީ އަތުން 3-0 ގެ ނަތީޖާއަކުން މޮޅުވެގެންނެވެ.

ސިޓީ އާއި ވައިކަމް ވޮންޑަރާސް ވާދަކުރި މެޗުގައި ފުރަތަމަ ލަނޑު ޖަހާ ލީޑު ނެގީ ވޮންޑަރާސް އިންނެވެ. މެޗުގެ 22 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ، ބްރެންޑަން ހަންލަންއެވެ. ނަމަވެސް ފުރަތަމަ ހާފްގައި ފަހަތުން އަރައި ތިން ލަނޑު ސިޓީން ވަނީ މެޗުގެ ކޮންޓްރޯލް އަތުލާފައެވެ. އެގޮތުން މެޗުގެ ނަތީޖާ ސިޓީއަށް ހަމަހަމަކޮށްދިން ލަނޑު މެޗުގެ 29 ވަނަ މިނެޓުގައި ކާމިޔާބުކޮށްދިނީ ކެވިން ޑެބްރޫނޭއެވެ. އަދި ސިޓީގެ ދެ ވަނަ ލަނޑު މެޗުގެ 43 ވަނަ މިނެޓުގައި ރިޔާޒް މަހްރޭޒް ކާމިޔާބުކޮށްދިންއިރު، ފުރަތަމަ ހާފްގެ އިތުރު ވަގުތުގެ ތެރޭގައި ފޮޑެން ވަނީ ސިޓީގެ ތިންވަނަ ލަނޑު އެޓީމަށް ކާމިޔާބުކޮށްދީފައެވެ.

މެޗުގެ ދެ ވަނަ ހާފްގައި ސިޓީގެ އަނެއް ތިން ލަނޑު ކާމިޔާބުކޮށްދިނީ މަހްރޭޒް، ފެރާން ޓޮރޭޒް އަދި ކޯލް ޕާމާއެވެ.

ލީގު ކަޕުގައި ރޭ ލިވަޕޫލާއި ނޯވިޗް ސިޓީ ބައްދަލުކުރި މެޗު ފަށައިގެން ހަތަރު ވަނަ މިނެޓުގައި ލިވަޕޫލުން ވަނީ ލަނޑު ޖަހާ ލީޑު ނަގާފައެވެ. މި ލަނޑު ލިވަޕޫލަށް ކާމިޔާބުކޮށްދިނީ، މިނަމީނޯއެވެ. މި މެޗުގައި ލިވަޕޫލުން ކާމިޔާބުކުރި ދެވަނަ ލަނޑާއި ތިންވަނަ ލަނޑު އެޓީމުން ޖެހީ ދެވަނަ ހާފުގައެވެ. އެގޮތުން ދެވަނަ ހާފުގެ 50 ވަނަ މިނެޓުގައި އެ ޓީމުގެ ދެވަނަ ލަނޑު ކާމިޔާބުކޮށްދިނީ ޑިވޮކް އޮރީގީ އެވެ. އަދި ތިންވަނަ ލަނޑު ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން މިނަމީނޯއެވެ.

މި ނަތީޖާތަކާއެކު ލީގު ކަޕުގެ ހަތަރުވަނަ ބުރަށް ލިވަޕޫލާއި ސިޓީ ދަތުރުކުރިއިރު، ހަތަރުވަނަ ބުރުގެ މެޗުތައް ކުޅުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ 25 ވަނަ ދުވަހެވެ.