ދާދިފަހުން ރާއްޖޭގައި ޗުއްޓީ ހޭދަކުރި ކަރީނާ ކަޕޫރާއި ސައިފް އަލީ ޚާން އަދި އެ ދެމީހުން ދެ ދަރިން ކަމުގައިވާ ތައިމޫރާއި ޖެހް އާނެއްކާވެސް ޗުއްޓީއަކަށް ގޮސްފިއެވެ.
ލޮކްޑައުންގެ ސަބަބުން ގިނަ ދުވަސްތަކަކު ގައުމުން ބޭރަށް ނުގޮސްތިބި މި ކުޑަކުޑަ އާއިލާއިން އެންމެ ފުރަތަމަވެސް ޗުއްޓީ ހެދުމަށް އައިސްފައިވަނީ ރާއްޖެއަށެވެ. މިއީ ކަރީނާ އާއި ސައިފްގެ ހަގު ދަރިފުޅު ޖެހްގެ ފުރަތަމަ ވެކޭޝަނެވެ. އެދަތުރުގައި އެމީހުން ރާއްޖެ އައިސްފައި ވަނީ ސައިފް ގެ 51، ވަނަ އުފަން ދުވަސް ފާހަގަ ކުރުމަށެވެ.
އަނެއްކާވެސް މި އާއިލާއިން ޗުއްޓީ އަކަށް ގޮސްފައިވާއިރު އެމީހުން މި ފަހަރު ޗުއްޓީ ހޭދަކުރަމުންދަނީ ކޮންތާކުކަމެއް ހާމަކޮށްފައެއް ނުވެއެވެ. ނަމަވެސް ސާފު ހުދު ދޮންވެލި ބީޗެއްގައި ނަގައިފައިވާ ފޮޓޯއެއް ކަރީނާ ވަނީ އޭނާގެ އިންސްޓަގްރާމް ސްޓޯރީގައި ހިއްސާކޮށްފައެވެ. ބެލެވޭގޮތުގައި މިއީ ރާއްޖޭގެ ޗުއްޓީގެ ތެރެއިން ނަގާފައިވާ ފޮޓޯއެކެވެ.
ބުދަ ދުވަހު ވަނީ އެމީހުން އެއާޕޯޓަށް ވަންނަނިކޮށް ނަގާފައިވާ ފޮޓޯތަކެއް ވައިރަލް ވެފައެވެ. ގޭޓުން ވަނުމުގެ ކުރިން އެ އާއިލާއިން ފޮޓޯނެގުމަށް މަޑުކޮށްލަނިކޮށް މި ފޮޓޯތަކާއި ވީޑިއޯތަކުން ފެނެއެވެ.
އެމީހުން ރާއްޖޭގެ ޗުއްޓީ ނިންމާލުމަށް ފަހު އެނބުރި ގައުމަށް ގޮސް ވަނީ ނުނިމި ހުރި މަސައްކަތްތައް ނިންމާފައެވެ. އެގޮތުން ކަރީނާ ވަނީ އޭނާގެ ކުރިއަށް އޮތް ފިލްމް "ލާލް ސިންގް ޗައްޑާ"ގެ ނުނިމި ހުރި މަސައްކަތް ރާއްޖެއިން އެނބުރިގޮސް ނިންމާފައެވެ.
ދާދި ކައިރީގައި ނެގި މި ޗުއްޓީ އަކީ ބެލެވޭ ގޮތުގައި ކަރީނާ ގެ އުފަން ދުވަސް ފާހަގަކުރުމަށް ހޭދަކުރަމުން ދާ ޗުއްޓީއެކެވެ. މި މަހުގެ 21 ގައި ކަރީނާ އަށް 41 އަަހަރު ފުރޭނެއެވެ.
