ވިއްކާލުމަށް ސިވިލް ކޯޓުން ޢަމުރުކޮށްފައިވާ ކާށިދޫ ދާއިރާގެ މެންބަރު ޢަބްދުﷲ ޖާބިރުގެ ގެކޮޅު، އަތަމާ ޕްލާޒާގެ މައްސަލާގައި ޖާބިރު، އެ އިމާރާތުގެ ވެރިފަރާތް ކަމުގައި އިސްމާއިލް އަބުދުއްލަތީފްގެ މައްޗަށް މަކަރާ ހީލަތުގެ މައްސަލަ ހުށަހަޅުއްވާފވާކަމަށް، ޖާބިރުގެ އަނބިކަބަލުން، އަދި ގާނޫނީ ވަކީލު ދިޔާނާ ސައީދު ވިދާޅު ވެއްޖެއެވެ.
އަތަމާ ޕްލާޒާގެ ރަޖިސްޓްރީ އޮންނަ، އިސްމާއި އަބުދުއްލަތީފް، ހައްޖަށް މިހުން ގެންދަން އެތައް ބައެއްގެ އަތުން ފައިސާ ނެގުމަށް ފަހު ހައްޖަށް ގެންގޮސްނުދިން މައްސަލާގައި، މަކަރާއި ހީލަތުގެ ކުށުގައި 2019 ވަނަ އަހަރު އަށް އަހަރުގެ ޖަލު ހުކުމެއް އައި، މަލީޝާ ހައްޖު ގްރޫޕުގެ ވެރިޔާ އިސްމާއީލް އަބްދުއްލަތީފްގެ ނަމުގަ އެވެ. ކޯޓުން މީގެ ކުރިން ވަނީ އޭނާގެ މައްޗަށް ސާބިތުވި ދަރަންޏެއް އަދާ ނުކޮށްގެން އެ ގެ ވިއްކާލަން އަމުރު ކޮށްފައެވެ. އެހެންނަމަވެސް، ނަމަވެސް، ޖާބިރު ވިދާޅުވެފައިވަނީ، އެއީ މީގެ ކުރިން އޭނާ ފައިސާ ދައްކަވާ، ބައްލަވާގެންފައިވާ ގެއެއް ކަމުގައެވެ. އަދި ޖާބިރުގެ އަނބިކަބަލުން، ދިޔާނާ ސައީދުވަނީ، އެގެ ބައްލަވައި ގަތުމަށް، ޖާބިރުއާއި އިސްމާއިލް އަބުދުއްލަތީފާ ދެމެދު ކުރެވިފައިވާ މުއާމަތްތަކުގެ ލިޔެކިޔުންތައް އާންމުވެސް ކުރައްވާފައެވެ.
މި ލިޔެކިޔުންތަކުން އެގެން އޮންނަ ގޮތުގައި، 2010ވަނަ އަހަރުނެ ފެށިގެން އިސްމާއިލް އަބުދުއްލަތީފްވަނީ، އެގޭގެ ހުރިހާ ހައްގެއް ދޫކޮށްލާ، ގެ ޖާބިރަށް ވިއްކަވާލައްވާފައެވެ. އެހެންނަމަވެސް އޭގެފަހުން ފާއިތުވި 11 ވަރަކަށް އަހަރުގެ ތެރޭގައި، އެގޭގެ ރަޖިސްޓްރީ ޖާބިރުގެ ނަމަށް ބަދަލު ކޮށްފައިވާކަމުގެ އެއްވެސް ލިޔެ ކިޔުމެއް ދިޔާނާ ސައީދު ހާމަ ކުރައްވާފައެއް ނުވެއެވެ.
ޖާބިރުގެ ގެ ވިއްކާލަން ކޯޓުން ކޮށްފައިވާ އަމުރާއި ގުޅޭގޮތުން، ދިޔާނާ ވިދާޅުވެފައިވަނީ، ޖާބިރުގެ ހައްގު ޤާއިމްނުކޮށް މިއިމާރާތް ވިއްކާނުލެވޭނެކަމަށެވެ. އަދި ދިޔާނާ ވިދާޅުވެފައިވަނީ، ޖާބިރަށް ނޯޓިސްވެސް ދިނުމަކާނުލާ، ފުލުހުން އެގެއަށްވަދެ، މ. އަތަމާ ޕްލާޒާގެ 7 ބުރީގެ ދޮރުތައްހަލާކު ކޮށްލާފައިވާ ކަމަށާއި، އެ އިމާރާތުގެ ދޮރުތައް އިސްމާއިލް އަބުދުއްލަތީފް ހިތުހުރި ގޮތަކަށް ބަދަލުކޮށް، އެއިމާރާތް އޭނާ އަމިއްލަކުރުމަށް މަގުފަހި ކޮށްދިނުމަށް ފުލުހުން ހިންގާފައިވާ އަމަލަކީ އައިރު ގާނުނީ އަމަލެއް ކަމުގައެވެ.
ދިޔާނާ ވިދާޅުވީ އެއްވެސް ކޯޓު އަމުރަކުން އިސްމާއިލް އަބުދުއްލަތީފަށް އެއިމާރާތް އަމިއްލަކުރުމަށް އެހީތެރިވެދިނުމަށް ހުއްދަ ކޮށްފައި ނުވާކަމަށާއި، ކޯޓު އަމުރުގައި ބުނެފައިވަނީ، އިމާރާތް ގަންނަން ޝައުގުވެރިވާ ފަރާތްތަކަށް ބެލޭނެ އިންތިޒާމް ހަމަޖައްސާ ދިނުމަށް ކަމަށެވެ. އަދި ބާރުގެ ބޭނުންކުރުން ހުއްދަވާނީ، އިމާރާތުގެ ވެރިފަރާތާ ވާހަކަ ދައްކާ އެ އިމާރާތް އިންސްޕެކްޓު ކުރެވޭ ގޮތް ހަދާ ދިނުމަށް އެފަރާތުގެ ކިބައިން އެދި އެކަމަށް އެފަރާތުން ހުރަސް އަޅާނަމަ ކަމަށާއި، އެއްވެސް ހާލެއްގައި އެތަނުގެ ތަޅުތައް ބަދަލުކޮށް އަސާސީ ޚިދުމަތް ކެނޑުމަށް މަގުފަހި ކޮށްދިނުމަށް ކޯޓު އަމުރުގައި ނެތްކަމަށްވެސް ދިޔާނާ ވިދާޅުވެފައި ވެއެވެ.
އަދި ދިޔާނާ ވަނީ މުލައްދަޑީގެ ބާރަކީ އިންސާފު ކަމުގައި ނުހެއްދެވުމަށްވެސް އެދިވަޑައިގެންފައެވެ.
ޖާބިރު އެ ގެ ބައްލަވައިގަތް ނަމަވެސް އެގޭގެ ލިޔެކިޔުންތައް އޭނާގެ ނަމަށް ބަދަލުކޮށްފައެއް ނުވެއެވެ. އެ ގޭގެ ރަޖިސްޓްރީ ޖާބިރުގެ ނަން މައްޗަށް ބަދަލު ނުވެ އޮތީ ގާނޫނީ ގޮތުން ކޯޓުން އެކަމަށް ފުރުސަތު ނުދޭތީކަމަށްވެސް ޖާބިރު ވަނީ ވިދާޅުވެފައެވެ.
