މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ ބެލުމުގެ ދަށުގައިވާ ޤައިދީންނާއި ބަންދުމީހުންގެ ފައިސާއާބެހޭ މުޢާމަލާތްތައް ފަސޭހަކަމާއެކު ބަލަހައްޓާ ނިޒާމެއް ތައާރަފްކޮށް ބޭނުންކުރަން ފަށައިފިއެވެ.
“ޕްރިޒަނަރ އެކައުންޓްސް މެނޭޖްމަންޓް ސިސްޓަމް (ޕެމްސް)”ގެ ނަމުގައި މިއަދު ބޭނުން ކުރަން ފަށާފައިވާ މި ސިސްޓަމްގެ ބޭނުން ކޮށްގެން، އާއިލާތަކުން، ކޮންމެ މަހަކު ބަނޑޭރި ޕޭ މެދުވެރިކޮށް ކަނޑައެޅިފައިވާ އަދަދަށް ފޮނުވާ ފައިސާއާއި އަދި އެލަވަންސް ފަސޭހައިން ބެލެހެއްޓޭނެއެވެ. އަދި މީގެ އިތުރުން މި ސިސްޓަމްގެ ބޭނުން ކޮށްގެން، ގައިދީންނާއި ބަންދުމީހުން ވިޔަފާރި އުޞޫލުންކުރާ މުޢާމަލާތްތައް ފަސޭހައިން ބެލެހެއްޓޭނެކަމަށްވެސް ކަރެކްޝަންސްއިން ހާމަ ކޮށްފައި ވެއެވެ.
ޕެމްސްއަކީ ޓޯޓަލް އޮފެންޑަރ މެނޭޖްމަންޓް ސިސްޓަމް (އެޓަމްސް)ގެ އެކައުންޓްސްތަކާބެހޭ މޮޑިއުލްއެވެ. މިގޮތުން އެޓަމްސް، ގައިދީންގެ ހުރިހާ ރެކޯޑަތަކެއް ބެލެހެއްޓުމަށް ބޭނުން ކުރެވޭއިރު، ޕެމްސް ބޭނުން ކޮށްގެން ބަލަހަޓަމުންދާނީ ގައިދީންނާ ބަންދު މީހުންގެ ފައިސާއާބެހޭ ހުރިހާ މުޢާމަލާތްތަކެއް ކަންވެސް ކަރެކްޝަންސްއިން ހާމަ ކޮށްފައި ވެއެވެ.
ކަރެކްޝަނަލް ސާވިސްއިން ހާމަ ކޮށްފައިވާ ގޮތުގައި، މި ސިސްޓަމްގެ ޒަރީއާއިން، ޖަލުތަކާއި ހެޑްއޮފީސްތައް ގުޅުވައިދިނުމުގެ އިތުރުން، އެއް ޑޭޓާބޭސްއެއް ބޭނުންކޮށްގެން ގައިދީންގެ ހުރިހާ ރެކޯޑްތަކެއް ބެލެހެއްޓި، އަދި ކުރަންޖެހޭ މަސައްކަތްތައް ލުއި ވެގެން ދިއުމުގެ އިތުރުން، މި ސިސްޓަމްގެ ސަބަބުން ކަރުދާސް ބޭނުން ކުރަންޖެހޭ މިންވަރުވެސް މަދުވެގެން ދާނެއެވެ.
އަދި މި ސިސްޓަމަކީ އަބަދުވެސް އަޕްޑޭޓް ވަމުންދާ ސިސްޓަމަކަށް ވުމާއެކު، މި ސިސްޓަމް ބޭނުން ކުރަން ފެށުމުން މުވައްޒަވުން އިތުރަށް ޒިންމާދާރުވެ، މަސައްކަތުގެ ފެންވަރުވެސް ރަގަޅުވެގެން ދާނެކަމުގައިވެސް ކަރެކްޝަންސްއިން ބުނެފައި ވެއެވެ.
އެޓަމްސްއާއި އަދި ޕެމްސްއަކިވެސް ކަރެކްޝަނަލް ސަވިސްގެ ފަންނީ މުވައްޒަފުން ފަރުމާ ކޮށްފައިވާ ދެ ސިސްޓަމެވެ.
