ސާފް ޗެމްޕިއަންޝިޕް ފުޓްބޯޅަ މުބާރާތައް ތައްޔާރުވުމުގެ ގޮތުން ގަތަރަށް ކުރިޔަށްގެން ގެންދިޔުމަށް ހަމަޖެހިފައިވާ ޓްރެއިނިން ކޭމްޕަށް ގެންދާ ކުޅުންތެރިން ފައިނަލްކޮށްފިއެވެ.
އަންނަ އޮކްޓޯބަރ މަހުގެ 1 އިން 16 އަށް ދިވެހިރާއްޖޭގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތައް ތައްޔާރުވުމަށް ގައުމީ ޓީމު ގަތަރަށް ފުރުމަށް ހަމަޖެހިފައިވަނީ އަންނަ ހުކުރު ދުވަހުއެވެ. އަދި ކޭމްޕަށް ފަހު އެނބުރި ގައުމީ ޓީމު ރާއްޖެ އަންނަނީ މިމަހުގެ 29 ވަނަ ދުވަހުއެވެ. މި ޓްރެއިނިން ކޭމްޕްގައި މެޗުތަކެއް ކުޅުމަށް ހަމަޖެހިފައިވާކަމަށް އެފްއޭއެމުން މީގެ ކުރިން ވަނީ މަޢުލޫމާތު ދީފައެވެ.
މުބާރާތައް ތައްޔާރުވުމަށް މާލޭގައި ކުރިޔަށްގެންދިޔަ ފަރިތަކުރުންތަކަށް އެކުލަވާލި ޕްރިލިމިނަރީ ސްކޮޑުގައި 34 ކުޅުންތެރިން ހިމެނިއެވެ. ނަމަވެސް ޓްރެއިނިން ކޭމްޕަށް ގެންދަން ނިންމާފައިވަނީ 30 ކުޅުންތެރިންނެވެ. ޕްރިލިމިނަރީ ސްކޮޑުން ބާކިކުރި ކުޅުުންތެރިންނަކީ ތަޖުރިބާކާރު މިޑްފީލްޑަރ މުހައްމަދު އާރިފް، މުހައްމަދު އިރުފާން، ޑިފެންޑަރ މުހައްމަދު އަޖުފާން، މުހައްމަދު ސާއިފްއެވެ. މީގެ އިތުރުން އީގަލްސްގެ އިމްރާން ނަޝީދު ވަނީ އާއިލީ ކަމެއްގައި ޓީމާ ވާހަކަ ދެއްކުމަށްފަހު ޓީމުން ވަކިވެފައެވެ.
ޓްރެއިނިން ކޭމްޕަށްފަހު އެނބުރި މާލެ އައިސް 30 ކުޅުންތެރިންގެ ސްކޮޑުން ސާފް ޗެމްޕިއަންޝިޕަށް ފައިނަލް ސްކޮޑް އެކުލަވާލާނެއެވެ.
ސާފް ޗެމްޕިއަންޝިޕް ފުޓްބޯޅަ މުބާރާތުގައި ރާއްޖޭ ކުޅޭ ފުރަތަމަ މެޗުގައި އޮކްޓޯބަރ މަހުގެ ފުރަތަމަ ދުވަހުގެ ރޭ ނުކުންނާނީ ނޭޕާލް އާއި ދެކޮޅަށެވެ. އަދި އޮކްޓޯބަރ މަހުގެ 7 ވަނަ ދުވަހުގެ ރޭ ބަންގްލަދޭޝް އާއި ދެކޮޅަށް ނުކުންނައިރު، ތިންވަނަ މެޗުގައި ލަންކާ އާއި ދެކޮޅަށް ނުކުންނާނީ 10 އޮކްޓޯބަރ ގައެވެ. އަދި އިންޑިއާ އާއި ދެކޮޅަށް ކުޅޭ މެޗު އޮންނާނީ 13 އޮކްޓޯބަރ ގައެވެ.
މިފަހަރުގެ ސާފް ޗެމްޕިއަންޝިޕް ފުޓްބޯޅަ މުބާރާތް ކުރިޔަށްދާނީ ލީގު އުސޫލުންނެވެ. އެއީ 5 ގައުމު ވާދަކުރާތީއެވެ. އެހެންކަމުން ފައިނަލަށް ދަތުރުކުރާނީ ކޮންމެ ޓީމެއް ކޮންމެ ޓީމަކާއި ކުޅުމަށްފަހު އެންމެ ގިނަ ޕޮއިންޓް ހޯދާ ދެ ޓީމެއެވެ.
ކޮމެންޓު ފޮނުވާ