ވަރލްޑް ކަޕް ކޮލިފައިން: ފްރާންސް އާއި ޕޯޗުގަލް އަށް މޮޅެއް

ފީފާ ވަރލްޑް ކަޕްގެ ޔޫރަޕުގެ ކޮލިފައިންގައި ރޭ ފްރާންސް އާއި ޕޯޗުގަލް ކުޅުނު މެޗު ކާމިޔާބުކޮށްފިއެވެ.

ކޮލިފައިންގެ ގްރޫޕް ޑީގައި ހިމެނޭ ފްރާންސް މޮޅުވީ ފިންލެންޑް އަތުން 2-0 ގެ ނަތީޖާއަކުންނެވެ. އަދި ޕޯޗުގަލް ކުޅުނު މެޗު އެޓީމުން ކާމިޔާބުކުރީ ރަށުން ބޭރުގައި ރޭ އަޒަރުބައިޖާން އަތުން 0-3 ގެ ނަތީޖާއަކުންނެވެ.

ފްރާންސް އާއި ފިންލޭންޑް ވާދަކުރި މެޗުގައި ފްރާންސުން ކާމިޔާބުކުރި 2 ލަނޑުވެސް އެޓީމަށް ކާމިޔާބުކޮށްދިނީ އެންޓޮއިން ގްރީޒްމަންއެވެ. މެޗުގައި ފްރާންސުން ލީޑު ނެގީ 25 ވަނަ މިނެޓުގައި ކާމިޔާބުކުރި ލަނޑުންނެވެ. އަދި ދެވަނަ ލަނޑު ގްރީޒްމަން ކާމިިޔާބުކޮށްދިނީ މެޗުގެ 52 ވަނަ މިނެޓުގައެވެ. މި ދެ ލަނޑާއެކު އޭނާ މިހާރު ވަނީ 41 ލަނޑާއެކު ފްރާންސަށް އެންމެ ގިނަ ލަނޑު ޖަހައިދިން ލިސްޓުގެ ތިންވަނައިގައި އޮތް ފުޓްބޯޅަ ލެޖެންޑް މިޝެލް ޕްލެޓިނީއާ އެއްވަރުކޮށްފައެވެ.

ފްރާންސް ހޯދި މި މޮޅާއެކު ކުޅުނު ހަ މެޗުން ލިބުނު 12 ޕޮއިންޓާއި އެކު އެޓީމު އޮތީ ގްރޫޕް ޑީގެ އެއްވަނައިގައެވެ. މި ގުރޫޕުގެ ދެވަނައިގައި އޮތީ ފަސް މެޗުން ފަސް ޕޮއިންޓް ހޯދާފައިވާ ޔޫކްރޭނެވެ. ތިންވަނައިގައި އޮތީ ހަ ޕޮއިންޓާއި އެކު ފިންލެންޑެވެ.

މީގެ އިތުރުން ވަރލްޑް ކަޕް ކޮލިފައިންގައި އަރަޒުބައިޖާން އަތުން ޕޯޗުގަލް މޮޅުވީ 0-3 ގެ ނަތީޖާއަކުންނެވެ. މި މެޗުގައި ސަސްޕެންޝަންގެ ސަބަބުން ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. މި މެޗުގައި ޕޯޗުގަލް އިން ލީޑު ނެގީ 26 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ، ބެނާޑޯ ސިލްވާއެވެ.  މި ލަނޑަށް ފަހުވެސް ޕޯޗުގަލްއިން މޮޅަށް ކުޅެމުން ދިޔައިރު، އެޓީމުގެ ދެވަނަ ލަނޑު ޖަހާ ލީޑު ފުޅާކުރީ މެޗުގެ 31 ވަނަ މިނެޓުގައި އެންޑްރޫ ސިލްވާ ކާމިޔާބުކޮށްދިން ލަނޑުންނެވެ. ޕޯޗުގަލްގެ ތިންވަނަ ލަނޑު އެ ޓީމުން ކާމިޔާބުކުރީ 75 ވަނަ މިނެޓުގައެވެ. މި ލަނޑު ޖަހައިދިނީ ޑިއޭގޯ ޖޮޓާއެވެ.

މި މޮޅާއެކު ގްރޫޕް އޭގެ އެއްވަނައިގައި ޕޯޗުގަލް އޮތީ ފަސް މެޗުން 13 ޕޮއިންޓާއެކުއެވެ. ސާބިއާ ދެވަނައިގައި 11 ޕޮއިންޓާއެކު އޮތްއިރު ތިންވަނައިގައި އޮތީ ހަ ޕޮއިންޓާއެކު ލަގްޒެމްބާގްއެވެ.