ޔުނައިޓެޑުގެ ފަރިތަކުރުންތަކުގައި ރޮނާލްޑޯ ބައިވެރިވާން ފަށައިފި

ޔުވެންޓަސް ދޫކޮށް މެންޗެސްޓަރ ޔުނައިޓެޑަށް ބަދަލުވި، ކްރިސްޓިއާނޯ ރޮނާލްޑޯ އެ ކްލަބުގެ ފަރިތަކުރުންތަކުގައި ބައިވެރިވާން ފަށައިފިއެވެ.

އުމުރުން 36 އަހަރުގެ ރޮނާލްޑޯ ޔުނައިޓެޑުގެ ފަރިތަކުރުންތަކުގައި ބައިވެރިވާން ފަށާފައިވަނީ އިއްޔެ އެ ކްލަބުން ކުރިޔަށްގެންދިޔަ ފަރިތަކުރުންތަކުގައެވެ. ޔުނައިޓެޑުގެ ފަރިތަކުރުންތަކުގައި ރޮނާލްޑޯ ބައިވެރިވާން ފަށާފައިވަނީ ފަސް ދުވަހުގެ ކަރަންޓީނު މުއްދަތެއް ފުރިހަމަކުރުމަށްފަހު އެވެ. އެއީ އިނގިރޭސިވިލާތުގެ އުސޫލުތައް ހަމަޖެހިފައިވާ ގޮތުން ރަށުންބޭރުން އަންނަ ކޮންމެ މީހަކު ފުރިހަމަކުރަން ޖެހޭ ކަރަންޓީނު މުއްދަތެެވެ.

ޔުނައިޓެޑުގެ ފަރިތަކުރުންތަކުގައި ރޮނާލްޑޯ ބައިވެރިވާން ފަށާފައިވާއިރު، ޕްރިމިއާ ލީގުގައި އަންނަ ހޮނިހިރު ދުވަހު ނިއުކާސަލް ޔުނައިޓެޑާ ދެކޮޅަށް ޔުނައިޓެޑް ކުޅޭ މެޗުގައި ރޮނާލްޑޯ ފެންނާނެ ކަމަށް ރިޕޯޓްތައް ބުނެއެވެ.

ޕޯޗުގަލުގެ ސްޕޯޓިން ލިޒްބަން ދޫކޮށް 2003 ވަނަ އަހަރު ރޮނާލްޑޯ އެންމެ ފުރަތަމަ ޔުނައިޓެޑަށް ބަދަލުވީ އޭރުގެ ރިކޯޑު ފީއެއް ކަމަށްވާ 12.24 މިލިޔަން ޕައުންޑަށެވެ. އެކަމަކު 2008 ވަނަ އަހަރު ރޮނާލްޑޯ ވަނީ ޔުނައިޓެޑް ދޫކޮށް ރެއާލް މެޑްރިޑަށް ބަދަލުވެފައެވެ. އެހެންކަމުން ރޮނާލްޑޯ އަލުން ޔުނައިޓެޑުގެ 7 ނަންބަރު ޖާޒީގައި ފެނިގެންދާނީ 12 އަހަރުގެ މެދުކެނޑުމަކަށްފަހުއެވެ.