ކުރީގެ އެސިސްޓެންޓް ކޮމިޝަނަރު އޮފް ޕޮލިސް ޑރ. އަބްދުﷲ ފައިރޫޝް މަގާމުން ޝަރަފްވެރިކަމާއެކު ރިޓަޔާ ކޮށްދީފައިވަނީ އޭނާއާ ގުޅޭ ގޮތުން ހުރި މައްސަލަތައް ރަނގަޅަށް ނުބަލައި ކަމަށް ރައްޔިތުންގެ މަޖިލީހުން ދެންމެ ފާސްކޮށްފިއެވެ.
ކޮމިޓީން އެކުލަވާލާފައިވާ ރިޕޯޓް ތަޅުމުގައި ފާސްކުރީ 36 މެންބަރުންގެ ވޯޓުންނެވެ. ރިޕޯޓް ފާސް ކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ. މަޖިލީހުގައި 87 މެންބަރުން ތިއްބަވާއިރު، މިރިޕޯޓް ފާސްކުރުމަށްޓަކައި މަޖިލީހަށް ގިނަ މެމްބަރުން ވަޑައިގެންފައިނުވެއެވެ. މިވޯޓުގައި ބައިވެރިނުވުމަށް ބައެއް މެމްބަރުން ކުޑަ ދޮށުގައިވެސް މަޑުކޮށްގެން ތިއްބެވިއެވެ.
241 ކޮމިޓީން މައްސަލަ ދިރާސާ ކުރުމަށް ފަހު އެކުލަވާލާފައިވާ ރިޕޯޓްގައި ލިޔެފައިވަނީ، ޑރ. ފައިރޫޝްގެ އަމަލުތައް ޕާލަމަންޓަރީ ރިކޯޑިންތަކުގައާއި، އާންމުވެފައިވާ އޯޑިއޯ އަދި ވީޑިއޯ ރިކޯޑިންތަކުން ފެންނަން ހުރި މަންޒަރުތަކަށް ބަލާއިރު ޝަރަފުވެރިކަމާއެކު އޭނާ ވަޒީފާއިން ރިޓަޔާ ކުރެއްވުމަށް ނިންމި ނިންމުމަކީ ބަލައިގަނެވޭނެ ކަމެއް ނޫން ކަމަށެވެ.
މިމައްސަލަގާއި ކޮމެޓީންވަނީ ހޯމް މިނިސްޓަރާއި ފުލުނުންގެ އިސްވެރިންނާއި އަދި ކަމާގުޅުންހުރި އެހެން ބޭފުޅުންނާވެސް ބައްދަލުކޮށް 2 ކަމެއް ރިޕޯޓުގައި ހުށަހަޅާފައެވެ. އެގޮތުން މި މައްސަލާގައި ބަޔާންކޮށްފައިވާ ބާވަތްތަކުގެ ތުހުމަތުތަކަކީ ޢާންމު އިޖުތިމާޢީ މިންގަނޑުތަކުން ބަލާއިރު ބޮޑެތި ތުހުމަތުތަކެއް ކަމަށްވާތީ، ކުރިއަށް އޮތް ތަނުގައި އެފަދަ ތުހުމަތުތަކެއް ކުރެވިފައިވާ ފަރާތެއް މަޤާމުން ރިޓަޔަރ ކުރުމަށް އެދުމުން، އެފަދަ ފަރާތެއް ޝަރަފުވެރިކަމާއެކު ރިޓަޔަރ ކުރުމުގައި އެތުހުމަތުތަކަށް ރިޢާޔަތްކުރުމަށް ދިވެހި ފުލުހުންގެ ޚިދުމަތުގައި ދެންނެވުމަށް ފެންނަކަމަށް ވަނީ އެދިފައެވެ.
އަދި ކުރިއަށް އޮތްތަނުގައި މި ބާވަތުގެ މައްސަލައެއް ތަކުރާރުވިޔަ ނުދިނުމަށާއި އެކަމުގައި ޢަމަލުކުރެވޭނެ ގޮތް ހަރުދަނާކުރުމަށްޓަކައި ޢަމަލުކުރާނެ ގޮތުގެ އުޞޫލެއް ނުވަތަ ޤަވާޢިދެއް ހަދައި އެ ޤަވާޢިދަށް ޢަމަލުކުރަމުން ގެންދިއުމަށާ، އެ ޤަވާޢިދު ތައްޔާރުކޮށް ނިންމުމުން އެކަން ކޮމިޓީއަށް ހުށަހެޅުމަށް ދިވެހި ފުލުހުންގެ ޚިދުމަތުގައި ދެންނެވުމަށްވެސް ރިޕޯޓުގައި ވަނީ ކަނޑައަޅާފައެވެ.
މޯލްޑިވިސް ޕޮލިސް ސަރވިސްގެ، އެސިސްޓަންޓް ކޮމިޝަނަރ އޮފް ޕޮލިސްގެ މަޤާމުގައި ހުންނެވި، ޑރ.ޢަބްދުﷲ ފައިރޫޝް ރިޓަޔަރ ކުރައްވާފައިވަނީ މިއަހަރުގެ ޖެނުއަރީ މަހުގެ 2ވަނަ ދުވަހުއެވެ. ފުލުހުންގެ ޚިދުމަތުން ޑރ.ފައިރޫޒް ރިޓަޔަރކުރެއްވިއިރު އޭނާ ހުންނެވީ ފުލުހުންގެ ހެޑް އޮފް ރިސޯސް މެނޭޖްމެންޓްގެ މަޤާމުގައެވެ. މިއީ ފުލުހުންގެ ފައިނޭންސާއި އިންސާނީ ވަސީލަތްތަކާއި އިންޖިނިއަރިން އަދި މެކޭނިކަލް ސާވިސް ހިމެނޭ ޑިޕާޓްމެންޓެވެ.
ފައިރޫޝްއަކީ އޮސްޓްރޭލިއާގެ މެކުއަރީ ޔުނިވާސިޓީން ލޯ އެންފޯސްމަންޓް އިންޓެލިޖެންސްއިން ޕީއެޗްޑީ ހާސިލުކުރައްވާފައިވާ ބޭފުޅެކެވެ. ފުލުހުންގެ ޚިދުމަތާ 1998ވަނަ އަހަރުގެ އޮކްޓޫބަރުމަހުގެ 12ވަނަ ދުވަހު ގުޅިވަޑައިގަތް ފައިރޫޝް ވަނީ 20 އަހަރާއި 1 މަސްދުވަސް ޚިދުމަތުގައި ހޭދަކުރައްވާފައެވެ. ފުލުުހުންނަށް ދޭ 9 ކުލައަކާއި 6 މެޑަލް ފައިރޫޝް ހާސިލްކުރައްވާފައިވާއިރު، އޭނާ ވަނީ ރާއްޖެއާއި ރާއްޖެއިން ބޭރުން ތަފާތު އެކި ތަމްރީންތައް ފުރިހަމަކުރައްވާފައެވެ.
