ރެއިލްވޭ ސްޓޭޝަނެއްގައި ލަވަކިޔައިގެން މަޝްހޫރުވި ރާނޫ މޮންޑަލްގެ ހަޔާތުގެ މައްޗަށް ފިލްމެއް ހެދުމަށް ނިންމައިފިއެވެ.
ރެއިލްވޭ ސްޓޭޝަންގައި ސަލާންޖަހަން އުޅުނު ރާނޫ ވަނީ އޭނާގެ ލަވަ ކިއުމުގެ ހުނަރު ދައްކާލައި ބޮޑު މަގުބޫލު ކަމެއް ހޯދާފައެވެ.
ބެންގާލީ ބަހުން ހަދާ މި ފިލްމްގެ ޝޫޓިން ވަރަށް އަވަހަށް ފަށާނެ ކަމަށް ބޮލީވުޑް ހަންގާމާއިން ބުނެއެވެ. ފިލްމަށް ދީފައިވާ ނަމަކީ "މިސް ރާނޫ މާރިއާ" އެވެ. ރާނޫ ގެ ރޯލުން ފެންނާނީ ބެންގާލީ ފިލްމުތަކުން ފެންނަ އެޝިކާ ޑޭއެވެ.
View this post on Instagram
ރިޝިކޭޝް މޮންޑާލް ހަދާ މި ފިލްމުގައި ބައިވެރިވުމަށް މިހާރު ހިމޭޝް ރޭޝަމިޔާއަށް ވެސް ހުށައަޅާފައިވާ ކަމަށް ރިޕޯޓްތައް ބުނެއެވެ. ހިމޭޝް އަކީ ރާނޫ ސްޓޭޝަން ގައި ލަވަ ކިޔަނިކޮށް ފެނި، މި ދާއިރާއިން ކުރިއަށް ދިއުމަށް ރާނޫ އަށް މަގުހުޅުވައިދިން މީހާއެވެ.
2019 ވަނަ އަހަރު ރާނޫ "އެކް ޕިޔާރު ކަ ނަގްމާ ހޭ" ލަވަ ކިޔަނިކޮށް ނަގާފައިވާ ވީޑިއޯއެއް ސޯޝަލް މީޑިއާގައި ވައިރަލްވިއެވެ. އެއާއެކު ހިމޭޝް ވަނީ ރާނޫ ކުރިއަށް ދިއުމަށް މަގުފަހި ކޮށްދީފައެވެ. އަދި ހަމަ އެހެންމެ ހިމޭޝް ވަނީ ރާނޫ ލައްވާ ބައެއް ލަވަތައް ރެކޯޑްވެސް ކޮށްފައެވެ. އެގޮތުން އޭނާގެ ފިލްމް "ހެޕީ ހާޑީ އެންޑް ހީރު" އަށް ވަނީ ރާނޫ ލައްވާ ލަވަކިއުވާފައިއެވެ.
މި ފިލްމް ސިނަމާތަކަށް ގެންނަން ނިންމާފައި ވަނީ އަންނަ އަހަރުގެ މާރިޗު ނުވަތަ އޭޕްރިލް މަސް ހިސާބުގައެވެ.
