ސަންޖޭ ލީލާ ބަންސާލީގެ ވެބް ސީރީޒް "ހީރާމަންޑީ"އިން ކުރީގެ މަޝްހޫރު ފިލްމީ ބަތަލާ ޖޫހީ ޗާވްލާ ފެނިގެންދާނެކަމަށް ރިޕޯޓްތައް ބުނެފިއެވެ.
ސަންޖޭ އާއި ނެޓްފްލިކްސް ގުޅިގެން ހަދާ މި ސިރީޒް އިއުލާން ކޮށްފައިވީ ނަމަވެސް ސީރީޒާއި ގުޅޭ މާގިނަ މައުލޫމާތެއް މިހާތަނަށް ވެސް ހިއްސާ ކޮށްފައިއެއް ނުވެއެވެ. ނަމަވެސް މި ސީރީޒުން ބަތަލާ ސޮނާކްޝީ ސިންހާ ފެނިގެން ދާނެ ކަމަށް މީގެ ދުވަސްކޮޅެއް ކުރިން ވަނީ ކަށަވަރު ވެފައެވެ.
މި ސީރީޒުން ގިނަ މޫނުތަކެއް ފެނިގެން ދާނެކަމަށް ބެލެވޭއިރު މަޝްހޫރު ތަރިންގެ ހާއްސަ ފެނިލުން ތަކެއް ވެސް ފެނިގެން ދާނެކަމަށް ރިޕޯޓްތަށް ބުނެއެވެ.
އޭގެ ތެރޭގައި ހުމާ ގްރޭޝީ، މަނީޝާ ކޮއިރަލާ، ނިމްރަތު ކޯރް، ޑަޔާނާ ޕެންޓީ އަދި ޓީވީ ސިލްސިލާތަކުން މަޝްހޫރުކަން ސަންޖީދާ ޝައިހް ހިމެނެ އެވެ. މީގެ އިތުރުން މާދުރީ ޑިކްސިޓް ވެސް ލަވައަކުން ފެންނާނެ ކަމަށް ދާދި ފަހުން ބައެއް މީޑިއާތަކުން ވަނީ ރިޕޯޓްކޮށްފައެވެ.
ރިޕޯޓްތަށް ބުނާގޮތުގައި ވަރަށް ގްރޭންޑްކޮށް ހަދާ "ހީރާމަންޑީ" ބަންސާލީ ހަމައެކަނި ޕްރޮޑިއުސް ކުރާގޮތަށް އޮތް ނަމަވެސް މިހާރު ސީރީޒްގެ ބައެއް އެޕިސޯޑްތައް އޭނާ ޑައިރެކްޓު ކުރުމަށް ވެސް ވަނީ ނިންމާފައެވެ. އަދި ބާކީ ހުރި އެޕިސޯޑްތައް ޑައިރެކްޓްކުރާނީ ޑައިރެކްޓަރ ވިބޫ ޕޫރީ އެވެ.
